பழைய முட்டையை கடைக்காரர் உங்க தலையில கட்டுறாரா? உஷார்... இதை தெரிஞ்சுக்கோங்க!

சமையலில் முட்டை என்பது ஒரு முக்கியமான இடத்தைப் பிடித்திருக்கிறது. வெறும் முட்டையிலேயே பல்வேறு ஊட்டச்சத்து நிறைந்த உணவுகளை எளிதாக தயாரிக்க முடியும். முட்டையில் சோடியம், பொட்டாசியம், இரும்பு போன்ற தாதுக்கள், கொழுப்பு மற்றும் புரதச் சத்து நிறைந்துள்ளதால் அது ஒரு சிறந்த ஆரோக்கிய உணவாக கருதப்படுகிறது. ஆனால் சில சமயங்களில் முட்டை அழுகி கெட்டுப்போகும் நேரங்களும் உண்டு. அத்தகைய முட்டைகளை சமையலில் பயன்படுத்துவது உணவு விஷம், வயிற்று வலி, வாந்தி மற்றும் பல்வேறு உடல் பாதிப்புகளை ஏற்படுத்தும் அபாயம் உள்ளது. இதனைத் தவிர்க்க, வீட்டிலேயே மிகவும் எளிதாக முட்டை கெட்டுப்போனதா என்பதை கண்டறிய சில வழிகள் உள்ளன.

1. நீரில் மிதக்க விடுதல்

ஒரு கிண்ணத்தில் தண்ணீர் ஊற்றி அதில் முட்டையை மெதுவாக விடுங்கள். புதிய, நல்ல நிலையில் உள்ள முட்டைகள் கிண்ணத்தின் அடியில் அமர்ந்திருக்கும். ஆனால் கெட்டுப்போன முட்டைகள் நீரில் மிதக்கும். எனவே மிதந்த முட்டையை உடனே ஒதுக்கிவிடுங்கள்.

2. நிறத்தை வைத்து அறிதல்

முட்டையை உடைத்தபோது அதன் கருவில் சிவப்பு புள்ளிகள் அல்லது வித்தியாசமான நிற மாற்றங்கள் இருந்தால் அது கெட்டுப்போன முட்டையாக இருக்கலாம். இதன் மூலம் முட்டையில் ஏற்பட்ட வேதியியல் மாற்றங்களை அறிய முடியும்.

3. வாசனையால் கண்டறிதல்

முட்டையை நுகர்ந்து பாருங்கள். நல்ல முட்டைக்கு மெல்லிய இயற்கை மண்வாசனை இருக்கும். ஆனால் சல்பர் துர்நாற்றம் வீசும் வகையில் மணம் வந்தால் அந்த முட்டை கெட்டுப்போனது என்பதில் ஐயமில்லை.

4. குலுக்கி பார்ப்பது

முட்டையை காதருகே வைத்து மெதுவாக குலுக்குங்கள். புதிய முட்டையிலிருந்து எந்த சத்தமும் வராது, ஏனெனில் அதன் கரு உறுதியான நிலையில் இருக்கும். ஆனால் சத்தம் கேட்டால் அது கெட்டுப்போன முட்டை என்பதை குறிக்கும்.

5. உள்ளுணர்வை நம்புங்கள்

முட்டையின் தோற்றம், வாசனை அல்லது அமைப்பில் சிறிய சந்தேகம்கூட இருந்தால் அதனை பயன்படுத்தாமல் ஒதுக்கி விட்டு வேறு முட்டையைத் தேர்ந்தெடுப்பது சிறந்தது.

சமையலில் ஒரு சிறிய கவனக்குறைவாலேயே பெரிய உடல் பாதிப்புகள் ஏற்படலாம். எனவே முட்டையை பயன்படுத்தும் முன் அதன் தரத்தை சோதித்துப் பார்த்து தான் சமையலில் சேர்ப்பது ஆரோக்கியத்திற்கும் பாதுகாப்பிற்கும் அவசியம்.