கேஸ் பர்னரில் அடைப்பு? பாதி லெமனை இப்படி யூஸ் பண்ணுங்க!

உங்கள் சமையல் அறையில் கேஸ் அடுப்பு சரியாக எரியாமல், தீப்பிழம்புகள் சீரற்று எரிவதை எப்போதாவது கவனித்திருக்கிறீர்களா? சமையல் எரிவாயு சரியாக வெளியேறாததால், பர்னரில் ஏற்படும் அடைப்புதான் இதற்குக் காரணம். இந்த அடைப்பு, சமையல் நேரத்தை அதிகரிப்பது மட்டுமின்றி, எரிவாயு விரயத்திற்கும் வழிவகுக்கிறது. இதை சரிசெய்ய, விலை உயர்ந்த பர்னர் க்ளீனர்கள் தேவையில்லை. உங்கள் வீட்டில் உள்ள சில பொருட்களைப் பயன்படுத்தி, எளிதாகவும், மலிவாகவும் இந்த அடைப்பை நீக்கலாம். இதனை எப்படி செய்வது என்று சுதா சந்தோஷ் விலாக்ஸ் யூடியூப் பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

சுடுநீர்
பர்னர்
எலுமிச்சை பழம்
ஈனோ (ENO) லெமன் ஃபிளேவர் ஒரு பாக்கெட்
உப்பு ஒரு ஸ்பூன்
பேக்கிங் சோடா அரை ஸ்பூன்
பாத்திரம் தேய்க்கும் லிக்விட் சோப்பு

செய்முறை:

முதலில், அடைக்கப்பட்ட பர்னர்களை ஒரு பாத்திரத்தில் வைக்கவும். அதில், பர்னர்கள் முழுவதுமாக மூழ்கும் அளவுக்கு சுடுநீர் ஊற்றவும். இப்போது, தண்ணீரில் ஒரு எலுமிச்சை பழத்தை பிழிந்துவிடவும். பாக்கெட் ஈனோ லெமன் ஃபிளேவரை கொட்டவும். ஈனோவில் உள்ள சிட்ரிக் அமிலம், அடைப்பை நீக்குவதில் முக்கிய பங்கு வகிக்கிறது.

அடுத்து, ஒரு ஸ்பூன் உப்பு மற்றும் அரை ஸ்பூன் பேக்கிங் சோடாவை சேர்க்கவும். இந்த கலவை, பர்னரில் உள்ள அழுக்குகளை மென்மையாக்கி, எளிதாக நீக்க உதவும். இந்த கரைசலில், பர்னர்களை குறைந்தது 4 மணி நேரம் ஊற வைக்கவும். இது, பிடிவாதமான கறைகள் மற்றும் அடைப்புகள் கரைந்து போவதற்கு உதவும். 

4 மணி நேரம் கழித்து, பர்னர்களை எடுத்து, பாத்திரம் தேய்க்கும் லிக்விட் சோப்புடன் ஒரு பிரஷ் பயன்படுத்தி தேய்க்கவும். அழுக்குகள் எளிதாக நீங்கி, பர்னர் பளபளவென மாறும். பர்னரை நன்றாக கழுவிய பின், அதை முழுவதுமாக ஆறவிடவும். ஈரம் முற்றிலும் காய்ந்த பின், மீண்டும் அடுப்பில் பொருத்தி பற்ற வைக்கவும். இப்போது, உங்கள் பர்னர் சீராகவும், நல்ல நீல நிறத்திலும் எரியும். இந்த எளிய குறிப்பை பின்பற்றி, உங்கள் கேஸ் பர்னரை புதியது போல் பராமரிக்கலாம்.