16 மணிநேர உண்ணாவிரதத்தால் அதிகரிக்கும் இதய நோய்கள்! புதிய ஆய்வு சொல்வது என்ன?

தினமும் 8 மணி நேரத்திற்கும் குறைவாக சாப்பிடுவது, அதாவது 16 மணிநேர இடைப்பட்ட உண்ணாவிரதம் (intermittent fasting - IF), இதய நோய்கள் காரணமாக ஏற்படும் இறப்பு அபாயத்தை 2 மடங்குக்கு மேல் அதிகரிப்பதாக, 'டயாபட்டீஸ் அண்ட் மெட்டபாலிக் சிண்ட்ரோம்' (Diabetes & Metabolic Syndrome) என்ற இதழில் வெளியிடப்பட்ட ஆய்வு கூறுகிறது.

பொதுவாக, இடைப்பட்ட விரதம் எடை குறைப்பு, இன்சுலின் உணர்திறனை மேம்படுத்துவது, ரத்த அழுத்தத்தைக் குறைப்பது, வீக்கத்தை கட்டுப்படுத்துவது மற்றும் சிறந்த லிப்பிட் அளவை உறுதி செய்வது போன்றவற்றிற்கு உதவுவதாகக் கருதப்படுகிறது. ஆனால், இந்த ஆய்வு இதய நோய்கள் ஏற்படும் ஆபத்து மிக அதிகம் என்று குறிப்பிடுகிறது. மிகக் கடுமையான உணவு முறைகள் ஊட்டச்சத்து குறைபாடு, அதிக பசி, எரிச்சல், தலைவலி மற்றும் காலப்போக்கில் உணவு முறையைப் பின்பற்ற முடியாத நிலை போன்றவற்றை ஏற்படுத்தும்.

நேரக் கட்டுப்பாட்டு உணவுமுறை என்றால் என்ன?

இடைப்பட்ட உண்ணாவிரதத்திற்கு என்று குறிப்பிட்ட வரையறை இல்லை. மக்கள் இதை வெவ்வேறு வழிகளில் கடைபிடிக்கின்றனர். சிலர் தினமும் 8, 10 அல்லது 12 மணி நேர காலவரையறைக்குள் மட்டும் சாப்பிட்டு, மீதி நேரங்களில் உண்ணாவிரதம் இருக்கின்றனர்.

தற்போதைய ஆய்வு என்ன கூறுகிறது?

சமீபத்திய ஆய்வு, ஒரு நாளைக்கு 8 மணி நேரத்திற்கும் குறைவாகச் சாப்பிடும் நபர்களுக்கு, 12 முதல் 14 மணி நேரம் சாப்பிடுபவர்களை விட, இதய நோய் (மாரடைப்பு அல்லது பக்கவாதம்) காரணமாக இறக்கும் அபாயம் 135% அதிகமாக இருப்பதாகக் கண்டறிந்துள்ளது. இந்த முடிவுகள், அமெரிக்காவின் தேசிய சுகாதார & ஊட்டச்சத்து பரிசோதனை ஆய்வில் (NHANES) இருந்து பெறப்பட்ட 19,000 பெரியவர்களின் தரவுகளின் அடிப்படையில் அமைந்துள்ளன.

இந்த செய்தியை ஆங்கிலத்தில் படிக்க

இந்த ஆய்வு, இடைப்பட்ட உண்ணாவிரதத்திற்கும் புற்றுநோய் மற்றும் பிற காரணங்களால் ஏற்படும் இறப்புக்கும் இடையே உள்ள தொடர்பை ஆராய்ந்தது. ஆனால், அப்படி எந்தத் தொடர்பையும் ஆராய்ச்சியாளர்கள் கண்டறியவில்லை. இருப்பினும், இனம், சமூகப் பொருளாதார காரணிகள் போன்ற எட்டு வெவ்வேறு துணைப் பிரிவுகளின் அடிப்படையில் முடிவுகள் ஆராயப்பட்டபோதும், இருதய நோய்களுடனான தொடர்பு தொடர்ந்து இருந்ததை ஆய்வாளர்கள் உறுதி செய்தனர்.

"குறுகிய நேர உணவு முறையைப் பின்பற்றுபவர்கள், இதய ஆரோக்கியம் அல்லது நீண்ட ஆயுளுக்காக நீண்ட காலத்திற்கு இதைத் தொடர்வது குறித்து மிகவும் எச்சரிக்கையாக இருக்க வேண்டும். ஏனெனில், இது மனித ஆய்வுகளில் இதுவரை எந்த ஆதரவையும் பெறவில்லை," என்று இந்த ஆய்வின் மூத்த ஆசிரியர் விக்டர் வென்ஸே ஜாங் கூறினார்.

ஆய்வின் வரம்புகள் என்ன?

இந்த ஆய்வறிக்கையுடன், ஃபோர்டிஸ் மருத்துவமனையின் நாளமில்லா சுரப்பித் துறை தலைவர் டாக்டர் அனூப் மிஸ்ரா, ஆராய்ச்சி குறித்த நன்மை தீமைகளை அலசும் தலையங்கத்தையும் வெளியிட்டுள்ளார். "இடைப்பட்ட உண்ணாவிரதம் நம்பிக்கைக்குரிய, குறைந்த செலவிலான மற்றும் எளிய உணவு முறை. ஆனால், இதன் மீதான ஆர்வம் ஆபத்துகளை கவனமாக மதிப்பீடு செய்த பிறகுதான் இருக்க வேண்டும். குறிப்பாக, ஏற்கனவே உடல்நலப் பிரச்னைகள் உள்ளவர்கள், இதை தனிப்பட்ட முறையில் மற்றும் மருத்துவ மேற்பார்வையின் கீழ், குறுகிய காலத்திற்கு மட்டுமே பின்பற்ற வேண்டும்," என்கிறார் டாக்டர் மிஸ்ரா.

தீவிர உண்ணாவிரதம் இதயத்தை எவ்வாறு பாதிக்கிறது?

பெங்களூருவில் உள்ள ஸ்பார்ஷ் மருத்துவமனையின் முன்னணி இருதயநோய் நிபுணர் டாக்டர் ரஞ்சன்ஷெட்டி கூறுகையில், இதுபோன்ற ஆய்வு நடத்தப்படுவது இது முதல் முறை அல்ல. மார்ச் 2024-ல் அமெரிக்க இதய சங்க மாநாட்டில் நடத்தப்பட்ட ஆய்வு, 16 மணி நேர இடைப்பட்ட உண்ணாவிரதம் இதய நோயால் ஏற்படும் இறப்பு அபாயத்தை 91% அதிகரிப்பதாகத் தெரிவித்தது.

"இந்த சமீபத்திய ஆய்வில் உள்ள சிக்கல் என்னவென்றால், இது ஒரு சீரற்ற சோதனை (randomised trial) அல்ல. இதில் பங்கேற்றவர்களின் அடிப்படை உடல்நல நிலை, அவர்களின் எடை மற்றும் பிற ஆபத்து காரணிகள் குறித்து நமக்குத் தெரியாது" என்று அவர் கூறினார்.

இருப்பினும், 8 மணி நேரத்திற்கும் குறைவான உணவு முறையோ அல்லது 16 மணி நேர உண்ணாவிரதமோ சீரற்ற இதயத் துடிப்பு (arrhythmia) உள்ளவர்களுக்கு ஏற்றதல்ல என்று அவர் எச்சரிக்கிறார். "கலோரிகளை அதிகமாகக் கட்டுப்படுத்துவது ரத்த சர்க்கரை அளவைக் குறைக்கும், இது இதயப் படபடப்பு மற்றும் இதயத் துடிப்பை அதிகரிக்கச் செய்து, மாரடைப்பைத் தூண்டும். போதுமான அளவு சாப்பிடாமல், உங்கள் வழக்கமான வேலைகளைச் செய்தால், உங்கள் உடல் ரத்தத்தை வெளியேற்ற அதிக முயற்சி செய்ய வேண்டும்," என்று அவர் கூறுகிறார்.

தேவையான எடை குறைப்பின் அளவையும் மதிப்பிடுவது அவசியம் என்று டாக்டர் ஷெட்டி கருதுகிறார். "ஒருவர் பருமனாக இருந்தால், எடை குறைப்பு ஏற்றுக்கொள்ளக்கூடிய வரம்புக்குள் இருக்கும். ஆனால், அதிக எடை இல்லாத மற்றொருவருக்கு பொருந்தாது. மெலிந்த தசைகளின் இழப்பு இதயத்திற்கு ஒரு மோசமான செய்தி" என்று அவர் மேலும் கூறினார்.

உணவு முறையைப் பற்றி ஆய்வு எங்கேயும் குறிப்பிடவில்லை என்றும் அவர் சுட்டிக்காட்டுகிறார். "நீங்கள் குறைந்த நேரத்திற்குள் அதிக கொழுப்பு, அதிக சர்க்கரை மற்றும் அதிக சோடியம் கொண்ட உணவுகளைச் சாப்பிட்டால், உங்கள் கொலஸ்ட்ரால் மற்றும் கொழுப்பு அளவு தவறான பாதையில் செல்லும்" என்கிறார் டாக்டர் ஷெட்டி. வயதானவர்கள், குழந்தைகள், நீரிழிவு நோய், இதயம், சிறுநீரகம் மற்றும் கல்லீரல் தொடர்பான நாட்பட்ட நோய்கள் உள்ளவர்கள், மற்றும் உண்ணும் கோளாறு உள்ளவர்களுக்கு அவர் இடைப்பட்ட உண்ணாவிரதத்தைப் பரிந்துரைப்பதில்லை. "அனைத்திற்கும் மேலாக, ஒவ்வொருவரின் உடலும் தனித்துவமானது. எந்த ஒரு உண்ணாவிரத முறையைப் பின்பற்றுவதற்கு முன், உங்கள் மருத்துவரை அணுகுவது அவசியம்."