அயோத்தி முதல் ராமேஸ்வரம் வரை... ஒரு டிரிப் பல புனிதத் தலங்கள்: ஐ.ஆர்.சி.டி.சி. ராமாயண சுற்றுலா அறிவிப்பு!

ஸ்ரீராமாயண யாத்திரை என்று பெயர் சூட்டப்பட்டிருக்கும் இந்த சுற்றுலா, ஜூலை 25-ம் தேதி தொடங்குகிறது. அயோத்தியில் தொடங்கி, ஸ்ரீராமருடன் தொடர்புடைய நந்திகிராம், ஜனகபுரி, வாராணசி, பிரயாக்ராஜ், ஹம்பி என இறுதியாக ராமேஸ்வரத்தில் சுற்றுலா நிறைவு பெறுகிறது. மீண்டும் சுற்றுலாப் பயணிகள் டெல்லியில் கொண்டு வந்து இறக்கிவிடப்படுவார்கள் என்றும் அறிவிக்கப்பட்டுள்ளது. ராமரின் வாழ்விடங்கள் அனைத்திற்கும் 17 நாள்கள் ரயில் மூலமாக சென்று திரும்புவதற்கான ஏற்பாடுகளை ஐ.ஆர்.சி.டி.சி செய்து கொடுக்கிறது.

பயண வழித்தடத்தில் உள்ள முக்கிய புனிதத் தலங்கள்:

• அயோத்தி: ஸ்ரீராமர் பிறந்த புண்ணிய பூமி, பிரம்மாண்டமான புதிய ராமர் கோயில் தரிசனம்.
• ஜனகபூரி (நேபாளம்): சீதா தேவி அவதரித்த இடம். ராம் ஜானகி கோயில் நேபாளத்தின் கலாச்சார மற்றும் ஆன்மிகப் பொக்கிஷம்.
• சித்ரகூட்: ராமர், சீதை, லட்சுமணன் வனவாசத்தின் பெரும்பகுதியைக் கழித்த இடம். இங்குள்ள காட்சிகள் அமைதியையும், ஆன்மிக உணர்வையும் தூண்டும்.
• நாசிக்: ராமாயணத்தில் பஞ்சவடி என அறியப்படும் பகுதி, சூர்ப்பனகையின் மூக்கை லட்சுமணன் அறுத்த இடம், சீதையை ராவணன் கடத்திய இடம் எனக் கதைகளில் வரும் முக்கிய தலம்.
• ஹம்பி: கிட்கிந்தையின் அடையாளமாக இருக்கும் அஞ்சனேயா மலை, அனுமன் பிறந்த இடமாகக் கருதப்படுகிறது. இங்கிருந்துதான் சீதையைத் தேடும் பணி தொடங்கியது.
• ராமேஸ்வரம்: இலங்கை செல்லும் முன் ராமர் சிவபெருமானை வழிபட்ட ராமநாதசுவாமி கோயில் மற்றும் தனுஷ்கோடி, இலங்கைக்குப் பாலம் கட்டப்பட்டதாக நம்பப்படும் இடம்.

ஒவ்வொரு இடத்திலும், ராமாயணக் கதையின் ஒரு பகுதி கண்முன்னே விரிவது போன்ற ஒரு அனுபவம் கிடைக்கும். உள்ளூர் வழிகாட்டிகள் அந்தந்த இடங்களின் வரலாற்று மற்றும் ஆன்மிக முக்கியத்துவத்தை விளக்குவார்கள்.