உரம் வைப்பது இருக்கட்டும்… மல்லிகை செடிக்கு முதலில் இதை பண்ணுங்க; செடி பூரா பூக்கும்!

உங்கள் வீட்டில் மல்லிகைச் செடி இருக்கிறதா? அது பூக்காமல் வெறும் இலைகளுடன் நின்று உங்களை ஏமாற்றுகிறதா? கவலைப்படாதீர்கள்! ஒரு சாதாரண கத்திரிக்கோல் இருந்தால் போதும், உங்கள் மல்லிகைச் செடியை பூக்களின் கூடாரமாக மாற்றலாம். இது உண்மையிலேயே சாத்தியம்!

பொதுவாக, மல்லிகைச் செடிக்கு கவாத்து (Pruning) மிகவும் முக்கியம். செடியில் உள்ள தேவையில்லாத கிளைகளை வெட்டி விடுவதன் மூலம், செடியில் புதிய தளிர்கள் உருவாகி, அவற்றில் இருந்து ஏராளமான பூக்கள் பூக்கும்.

மேலும், ஒரு முறை பூத்து முடிந்த பிறகு, அந்தப் பூத்த காம்புகளை வெட்டி விடுவது அவசியம். இப்படிச் செய்வதால், வெட்டிய இடத்தில் இருந்து இரண்டு புதிய தளிர்கள் உருவாகி, அந்த இரண்டு தளிர்களிலும் மொட்டுகள் வைத்து பூக்கள் பூக்கும். இது செடியின் வளர்ச்சிக்கும், அதிக பூக்கள் பூப்பதற்கும் மிகவும் உதவும்.

இரும்புச்சத்து குறைபாட்டை சரிசெய்தல்

கவாத்து செய்வதற்கு முன், உங்கள் மல்லிகைச் செடியின் இலைகளை உற்று கவனியுங்கள். இலைகள் மஞ்சள் நிறத்தில் இருந்து, பச்சை நிறக் கோடுகளுடன் இருக்கிறதா என்று பாருங்கள். அப்படி இருந்தால், உங்கள் செடிக்கு இரும்புச்சத்து குறைபாடு (Iron deficiency) உள்ளது என்று அர்த்தம். இந்த நிலையில், நீங்கள் எந்த உரங்களை இட்டாலும், செடி அதை முழுமையாக உறிஞ்சாது.

வாழைக்காய் தோல்   

நீங்கள் சமையலுக்குப் பயன்படுத்தும் வாழைக்காயின் தோலில் இரும்புச்சத்து நிறைந்துள்ளது.  வாழைக்காய் தோலை தண்ணீரில் ஊறவைத்து, அந்த தண்ணீரை இலைகள் மீது தெளிக்கலாம் அல்லது, வேர் பகுதியிலும் ஊற்றலாம். இது இரும்புச்சத்து குறைபாட்டை சரிசெய்து, செடி ஆரோக்கியமாக வளர உதவும்.

இந்த எளிய பராமரிப்பு குறிப்புகளைப் பின்பற்றி உங்கள் மல்லிகைச் செடியை ஆரோக்கியமாக வளர்த்து, அழகான பூக்களைப் பெறுங்கள்!