ஜெயலலிதா நூலகத்தில் 8376 புத்தகங்கள்... இதை கவனித்ததா உலகம்?

சென்னையில் உள்ள அண்ணா நூற்றாண்டு நூலகத்தை சூப்பர் ஸ்பெஷாலிட்டி மருத்துவமனையாக மாற்றப்படும் என 2012 மே மாதம் ஜெயலலிதா அறிவித்தார். இது கருணாநிதியால் கட்டப்பட்ட, நாட்டிலேயே மிகப்பெரிய நூலகம்.

நூலகத்தில் இருந்த பொக்கிஷங்களை விலையாகக் கொடுத்து, அப்போதைய முதல்வர் அரசியல் சாணக்கியத்தை வெளிப்படுத்தியதைக் கண்டு புத்தக ஆர்வலர்கள் அதிர்ச்சியடைந்தனர். ஆனால் நூலகம் பிழைத்தது மற்றொரு கதை.

சென்னை போயஸ் கார்டன் பகுதியில் உள்ள ஜெயலலிதாவின் வேதா நிலையம் இல்லத்தை கையகப்படுத்தி, மறைந்த முதல்வரின் நினைவாக அருங்காட்சியகம் அமைக்க தமிழக அரசு நடவடிக்கை எடுத்து வரும் நிலையில், தற்போது மற்றொரு கதையும் வெளியாகி உள்ளது. அது, ஜெயலலிதா ஒரு புத்தகப் பிரியர், மேலும் தமிழின் உன்னதமான திருக்குறள் முதல் ஜவஹர்லால் நேருவின் தி டிஸ்கவரி ஆஃப் இந்தியா வரை, சுயசரிதைகள் முதல் பத்திரிகைகள் வரை 8,376 புத்தகங்களின் உரிமையாளராக இருக்கிறார்.

ஜெயலலிதாவுக்கும் அவரது இல்லத்துக்கும் நேரடி அணுகல் இருந்த அதிகாரிகளும், நெருக்கமானவர்களும் வரிசை எண்கள் மற்றும் தலைப்பு ஸ்டிக்கர்களுடன் அவர் தனது புத்தகங்களை ஆர்வத்துடன் பராமரித்ததையும்,  வேதா நிலையத்தின் முதல் தளத்தில் அவர் நீண்ட நேரம் படித்துக் கொண்டிருந்ததையும் நினைவு கூர்ந்தனர்.

8,376 புத்தகங்கள் மாநில அரசால் பட்டியலிடப்பட்டுள்ள வேதா நிலையத்தில் உள்ள 32,721 ‘அசையும் சொத்துக்களில்’ ஒரு பகுதியாகும்.

அவரது நூலகத்தைப் பார்வையிட்ட அதிகாரி ஒருவர், அவரது சேகரிப்பில் 75 சதவிகிதம், ஆங்கில படைப்புகள் என்று கூறினார். அவரது தமிழ் சேகரிப்பில் பெரியார் ஈ வி ராமசாமி மற்றும் முன்னாள் முதல்வர் சி என் அண்ணாதுரை ஆகியோரின் படைப்புகள் இருந்தன.

திருக்குறள் மொழிபெயர்ப்புகள், ஆதி சங்கராச்சாரியாரின் சில படைப்புகள் மற்றும் கவிஞர் கண்ணதாசனின் அர்த்தமுள்ள இந்து மதம், முக்கியமாக தி டிஸ்கவரி ஆஃப் இந்தியா ஆகியவை அவரது நூலகத்தில் உள்ளன, என்று அதிகாரி கூறினார்.

ஜெயலலிதாவின் சேகரிப்பில் அண்ணாதுரை, அவரது ஆசான் மற்றும் அதிமுக நிறுவனர் எம்.ஜி.ஆர் மற்றும் ஜெயலலிதாவின் அரசியல் வாழ்க்கையைப் பற்றி மாநில பல்கலைக்கழகங்கள் வெளியிட்ட பல முனைவர் பட்ட ஆய்வுகள்   மற்றும் சட்டம் பற்றிய புத்தகங்கள் அடங்கியிருந்தன.  மேலும்  அகதா கிறிஸ்டியின் நாவல்கள், குஷ்வந்த் சிங்கின் படைப்புகளும் கூட அதில் இருந்தன.

அவருக்கு "பிடித்தவைகளில்", முன்னாள் அமெரிக்க ஜனாதிபதிகள் ரொனால்ட் ரீகன் மற்றும் ஆபிரகாம் லிங்கன் உட்பட உலகத் தலைவர்களின் சுயசரிதைகள் இருந்ததாக நெருக்கமானவர்கள் தெரிவித்தனர்.

இந்தப் புத்தகங்கள் அனைத்திலும் அவர் மார்க் செய்த அடையாளங்கள் அல்லது படித்த அத்தியாயங்களுக்கான புக்மார்க்குகள் இருந்தன, என்று ஒரு அதிகாரி கூறினார்.

ஜெயலலிதாவின் நூலகத்தில் இரண்டு பகுதிகள் இருந்தன: ஒன்று புத்தக அலமாரிகள், மற்றொரு பகுதி படிக்கும் இடம் மற்றும் அவரது பத்திரிகைகளின் தொகுப்பு. அவளுக்கு முழங்காலில் பிரச்சனை இருந்ததால், முதல் மாடிக்கு லிப்ட் இருந்ததே தவிர, வீடு மிகவும் சாதாரணமானது தான். விருந்தினர்கள் மற்றும் கீழே உள்ள மற்றவர்களுடன் தொடர்பு கொள்ள இண்டர்காம் அமைப்பும் உள்ளது, என்றார்.

மூன்று தசாப்தங்களாக, ஜெயலலிதா இந்த வீட்டில் வி.கே.சசிகலா, இளவரசி மற்றும் அவரது குழந்தைகளுடன் வசித்து வந்தார். ஜெயலலிதாவுடன் சொத்துக் குவிப்பு வழக்கில் தண்டனை பெற்ற பிறகு சசிகலா, இளவரசி ஆகியோர் பெங்களூரு சிறையில் அடைக்கப்பட்டனர்.

ஜெயலலிதாவின் படுக்கையறை, பெரியதாக இருந்தாலும், எளிமையானது. சசிகலாவின் படுக்கையறை மிகவும் சிறியது, இங்கு நிறைய எழுதுபொருட்கள், மனுக்கள் மற்றும் காகிதங்கள் இருக்கும், என்று அதிகாரி ஒருவர் கூறினார்.

பத்தாண்டுகளுக்கும் மேலாக ஜெயலலிதாவின் தனிச் செயலாளராக இருந்த கார்த்திகேயன் நினைவு கூர்ந்து பேசும் போது, “அவர் புதிய புத்தக வெளியீடுகளைப் பார்த்து அவற்றை ஆர்டர் செய்யும்படி என்னிடம் கேட்பார். போயஸ் கார்டன், சிறுதாவூர் பங்களா (சென்னைக்கு அருகில்) மற்றும் கொடநாடு எஸ்டேட் என - ஒவ்வொரு புத்தகத்திற்கும் மூன்று பிரதிகளை ஆர்டர் செய்வோம். அவர் என்னையும் படிக்கச் சொல்வார், ஆனால் நான் ஒருபோதும் செய்யவில்லை.

இளவரசியின் மகள் ஜே.கிருஷ்ணப்ரியா, 1991-ல் தனது தந்தையின் மறைவுக்குப் பிறகு, தனது தாயார் இளவரசி மற்றும் சகோதரர் விவேக் ஜெயராமனுடன் வேதா நிலையத்திற்குச் சென்றபோது, ​​10 வயதுடையவர், மறைந்த முதல்வர் ஒரு நாளைக்கு குறைந்தது ஐந்து மணிநேரமாவது படித்ததாகக் கூறினார்.

வீட்டில் ஆங்கில கிளாசிக்ஸ், நாவல்கள் மற்றும் விசித்திரக் கதைகள் இருந்தன, இது என்னை ஆரம்பத்திலேயே படிக்கக் கவர்ந்தது. அந்த புத்தகங்கள் நிறைய அவர் திரைப்பட நட்சத்திரமாக இருந்த நாட்களில் இருந்து வந்தவை,” என்று அவர் கூறினார்.

2000 ஆம் ஆண்டுக்குப் பிறகு, ஜெயலலிதாவின் பெரும்பாலான வாசிப்பு செய்திகளுக்கு மட்டுப்படுத்தப்பட்டாலும், புத்தகங்கள் மீதான அவரது காதல் குறையவில்லை என்றும் கிருஷ்ணப்ரியா கூறினார்.

அவர் மருத்துவமனையில் இருந்தபோது Wayne Dyer எழுதிய Wishes Fulfilled என்ற புத்தகம்தான் நான் கடைசியாக அவருக்குக் கொடுத்தேன். அதற்கு முன், பெங்களூரு சிறைக்கு அனுப்பப்பட்டபோது, ​​சி ராஜகோபாலாச்சாரியின் மகாபாரதத்தை அனுப்பும்படி என்னிடம் கேட்டார். அதுதான் அவள் கடைசியாகப் படித்த தமிழ்ப் புத்தகம் என்று கிருஷ்ணப்ரியா கூறினார்.

ஜெயலலிதாவின், செருப்பு எண்ணிக்கை, புடவை எண்ணிக்கை பரவலாக மீடியாவில் வந்தது, ஆனால் அவர் புத்தகங்களையும் விரும்பி வாங்கி சொத்து போல பாதுகாத்தது இன்னும் பலராலும் அறியப்படாமல் உள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“