ஆன்லைன் எடை குறைப்பு குறிப்புகளால் விபரீதம்; கேரள இளம்பெண் உயிரிழப்பு: நீர் விரதம் என்றால் என்ன?

கேரளாவின் தலச்சேரியைச் சேர்ந்த 18 வயது இளம்பெண் ஒருவர், ஆன்லைன் எடை குறைப்பு குறிப்பான நீர் விரதத்தை பின்பற்றி உயிரிழந்தார். இச்சம்பவம் இளைஞர்களின் உடல்நலம் தொடர்பான பல்வேறு கேள்விகளை எழுப்பியுள்ளது. சரியான வழிகாட்டுதல்கள் இல்லாமல் எடை குறைப்பு வழிமுறைகளை பின்பற்றினால், அவை என்ன மாதிரியான விளைவுகளை ஏற்படுத்தும் என்று உதாரணமாக இச்சம்பவம் அமைந்துள்ளது.

ஆங்கிலத்தில் படிக்கவும்: Kerala teen dies after water fasting, following online weight loss tips: What this diet fad does to the body

சுமார் 6 மாதங்களாக அப்பெண் சரியான உணவைத் தவிர்த்து உடல் எடையைக் குறைக்க சுடுதண்ணீர் மட்டும் அருந்தியுள்ளார். அப்பெண் உயிரிழப்பதற்கு 12 நாட்களுக்கு முன்பாக தலச்சேரி கூட்டுறவு மருத்துவமனையில் அனுமதிக்கப்பட்டார். அப்பெண்ணின் உடல் எடை 24 கிலோ மட்டுமே இருந்தது என்றும், குறைந்த இரத்த சர்க்கரை அளவு, சோடியம் மற்றும் இரத்த அழுத்தம் ஆகியவற்றால் கடுமையாக பாதிக்கப்பட்டிருந்ததாகவும் மருத்துவர் நாகேஷ் மனோகர் பிரபு தெரிவித்துள்ளார். 

"இன்றைய இளம்பருவத்தினர் தங்கள் தோற்றம் குறித்து மகிழ்ச்சியாக இல்லை. உடல் எடை குறைப்புக்கு தாங்களாகவே ஒரு முறையை பின்பற்றுகின்றனர். இந்த பருவம் தான் அவர்கள் சரியான வளர்ச்சி அடைய முடியும் என்பதையும், போதுமான ஊட்டச்சத்துகள் தேவை என்பதையும் அவர்கள் மறந்து விடுகின்றனர். கேரளப் பெண்ணுக்கு எலக்ட்ரோலைட் சமநிலையின்மை இருந்தது. இதனால் அப்பெண்ணின் உடல் உறுப்புகள் செயல் இழந்தன" என்று டெல்லி சர் கங்கா ராம் சிட்டி மருத்துவமனையின் ஆலோசகர் உணவியல் நிபுணர் முக்தா வசிஷ்டா தெரிவித்துள்ளார்.

தண்ணீர் விரதம் என்றால் என்ன? இது நம்பகமானதா?

தண்ணீர் உண்ணாவிரதம் என்பது ஒரு ஆன்லைன் கட்டுக்கதை. இது உணவு இல்லாமல் தண்ணீரை உட்கொள்வதை ஆதரிக்கிறது. செல்கள் மறுசுழற்சி செய்து தங்களைத் தாங்களே புதுப்பித்துக்கொள்ளும் போது, ​​இது தன்னியக்கத்திற்கு உதவுகிறது என்று பயனர்கள் நினைக்கிறார்கள். உண்மை என்னவென்றால், இந்த வழக்கத்திற்கு எந்த அறிவியல் ஆதாரமும் இல்லை. இதை எப்படியும் ஒரு நாள் அல்லது இரண்டு நாட்களுக்கு மேல் தொடர முடியாது.

அறிவியல் சான்றுகள் இல்லாத போதிலும், இந்த பழக்கத்தை பெரும்பாலானவர்கள் கடைபிடிக்கின்றனர். உடற்பயிற்சி, உணவு முறை மற்றும் வாழ்க்கை முறை மாற்றம் போன்றவற்றை கடைபிடிக்காமல் இது எளிமையாக இருப்பதனால் இதை பின்பற்றுகின்றனர்.

தண்ணீர் விரதத்தின் விளைவுகள் என்ன?

மேக்ரோ மற்றும் மைக்ரோ நியூட்ரியண்ட்ஸ் இரண்டிலும் பெரிய குறைபாடுகள் உள்ளன. சோடியம் மற்றும் பொட்டாசியம் போன்ற எலக்ட்ரோலைட்டுகள் குறைவாக இயங்கலாம். இதன் குறைபாடு உடலின் முக்கிய செயல்பாடுகளுக்கான நரம்பு சமிக்ஞைகளை சீர்குலைக்கிறது. இது ஒழுங்கற்ற இதயத் துடிப்பு, தசை பலவீனம், குழப்பம், வலிப்பு மற்றும் மாரடைப்பு போன்றவற்றுக்கு வழிவகுக்கும். 

எனவே, சரியான மருத்துவ ஆலோசனையின் படி மட்டுமே உணவு முறையை கடைபிடிக்க வேண்டும். இது பல்வேறு உடல் உபாதைகளை தடுக்க உதவுகிறது. இது போன்று ஆன்லைனில் இருந்து பின்பற்றப்படும் பழக்கத்தை தடுத்து நிறுத்துவதற்காக, சரியான ஆலோசனைகளை இளம்பருவத்தினருக்கு வழங்க வேண்டும். இத்தகைய பிரச்சனைகள் குறித்து குழந்தைகளிடம் பெற்றோர் பேச வேண்டும்.

- Rinku Ghosh