98 கிலோ இருந்தேன்… 8 ஆயிரம் சதுர அடி வீட்டுல எல்லா வேலையும் நானே செய்தேன்: குஷ்பு வெயிட்லாஸ் எப்படி சாத்தியமாச்சு?

இன்றைய வேகமான உலகில், நாம் அனைவரும் எதையோ நோக்கி ஓடிக்கொண்டிருக்கிறோம். ஃபாஸ்ட் ஃபுட், ஃபாஸ்ட் லைஃப், ஃபாஸ்ட் எவ்ரிதிங். வேகம்தான் மகிழ்ச்சி என நம்புகிறோம். ஆனால், நடிகை குஷ்பு, இந்த வேகத்துக்கு ஒரு புதிய விளக்கம் தருகிறார். “வேகம் கொல்லும்” என்கிறார் அவர். 

"எனது எடை குறைப்புப் பயணத்தைப் பற்றி நிறைய பேர் என்னிடம் கேட்கிறார்கள். 'நீங்கள் அறுவை சிகிச்சை செய்தீர்களா?', 'நீங்கள் ஊசிகள் போட்டீர்களா?' என்று பல கேள்விகள். எனக்கு இந்த பயணத்தில் பெரும் உதவியாக இருந்தது கொரோனா லாக்டவுன். அதுதான் என் உடல் எடைக் குறைப்புக்கான உந்துதலைக் கொடுத்தது. அந்த உந்துதலை ஏற்படுத்தியவர் என் கணவர். அவர் தினமும் காலையில் நடைப்பயிற்சிக்குச் செல்வதைப் பார்த்தேன். 'அவருக்கு நேரமிருக்கிறது, ஆனால் எனக்கு இல்லை' என்று ஆரம்பத்தில் நினைத்தேன். ஆனால், வீட்டிற்குள்ளேயே இருந்து, அவர் தினமும் ஒரு மணி நேரம் உடற்பயிற்சி, யோகா எனச் செய்வது எனக்கு ஒரு பெரிய உத்வேகத்தைக் கொடுத்தது," என்று குஷ்பு கூறுகிறார்.

அப்போது எங்கள் 8,000 சதுர அடி வீட்டில் வேலைக்கு ஆட்கள் இல்லாததால், காலை 4 மணியிலிருந்து சமைப்பது, வீட்டைச் சுத்தம் செய்வது, பாத்திரம் கழுவுவது, துணி துவைப்பது என எல்லா வேலைகளையும் நானே செய்ய ஆரம்பித்தேன். இந்த வேலைகளைச் செய்ய நான் மேலும் கீழும் ஓடியபோது, எனது சருமம், கூந்தல் என எல்லாமே ஆரோக்கியமாக மாறுவதைக் கண்டேன். நானும் ஃபிட்டாக இருப்பதாக உணர்ந்தேன். இதுதான் எனக்கும் ஆரோக்கியத்தின் மேல் ஒரு விருப்பத்தை உருவாக்கியது.

View this post on Instagram

A post shared by Kushboo Sundar (@khushsundar)

உங்கள் ஆரோக்கியம் உங்கள் கையில்

"மூன்றரை ஆண்டுகளுக்கு முன்பு, நான் கிட்டத்தட்ட 98 கிலோ இருந்தபோது, எனக்கு அதிர்ச்சியாக இருந்தது. ஏனென்றால், நான் இவ்வளவு குண்டாக இருந்ததே எனக்குத் தெரியவில்லை. என்னைச் சுற்றியிருந்தவர்கள் தினமும் பார்ப்பதால், அவர்களுக்கு அந்த மாற்றம் தெரியவில்லை.

என் எடை குறைப்புப் பயணம் மிகவும் மகிழ்ச்சியாக இருந்தது. ஏனெனில், நான் எனக்குப் பிடித்தமான உணவுகளைத் தொடர்ந்து சாப்பிட்டேன். ஐஸ் கிரீம், இனிப்புகள் என எல்லாவற்றையும் அளவோடு சாப்பிட்டேன். எங்கே நிறுத்த வேண்டும் என்று எனக்குத் தெரியும். உடல் எடை குறைப்பது எளிது. அதைத் தக்கவைத்துக் கொள்வதுதான் கடினமான பகுதி. 6 மாதத்தில் எடையைக் குறைத்து, அடுத்த 6 மாதத்தில் மீண்டும் 10 கிலோ அதிகரிப்பது ஒரு பயனும் இல்லை."

உடல் கூறுவதைக் கேளுங்கள்!

"உடல் எடையை குறைக்க விரும்புபவர்களுக்கு ஒரு விஷயம் சொல்ல வேண்டும். நாம் சாப்பிடுவது நமது உடலுக்குத் தேவையானது அல்ல. நம்முடைய நாக்கிற்குப் பிடித்ததை நாம் சாப்பிடுகிறோம். இதுதான் நாம் செய்யும் மிகப்பெரிய தவறு. நான் ஒரு நாளைக்கு நான்கு காஜு கட்லி சாப்பிடுவதைவிட, ஒன்று சாப்பிட்டு போதும் என்று நிறுத்திக் கொள்வேன். நான் என்னுடைய டீ-யில் ஒரு ஸ்பூன் சர்க்கரை சேர்த்து குடிப்பதை நிறுத்த மாட்டேன். ஆனால், வேறு எங்கு என்னுடைய கலோரியைக் குறைக்க வேண்டும் என்பதை அறிவேன்…

உடல் எடையைக் குறைக்கும்போது, நீங்கள் உடல்ரீதியாக மட்டும் அல்ல, மனரீதியாகவும் ஆரோக்கியமாக உணர்வீர்கள். உங்கள் உடல், சருமம், முடி என அனைத்தும் பொலிவு பெறும். நீங்கள் ஒரு மகிழ்ச்சியான மனிதராக மாறுவீர்கள்," என்று குஷ்பு தனது உடல் எடை குறைப்புப் பயணத்தைப் பற்றி மனம் திறந்து பேசுகிறார்.