சருமத்தில் தெரியும் கல்லீரல் பாதிப்பு அறிகுறிகள்: இந்த 4 மாற்றங்களை புறக்கணிக்காதீங்க- எச்சரிக்கும் மருத்துவ நிபுணர்

நம் உடலில் ஏற்படும் ஒவ்வொரு மாற்றத்திற்கும் ஒரு காரணம் உண்டு. கல்லீரல் உடலின் நச்சுத்தன்மையை நீக்குவதில் முக்கியப் பங்கு வகிக்கிறது. கல்லீரல் சரியாக வேலை செய்யவில்லை என்றால், அதன் அறிகுறிகள் நமது சருமத்தில் வெளிப்படக்கூடும். கல்லீரல் நோய் நிபுணரும், இரைப்பை குடலியல் நிபுணருமான டாக்டர் சௌரப் சேத்தி, கல்லீரல் நோய்களைக் குறிக்கும் நான்கு முக்கியமான சரும மாற்றங்களைப் பற்றி இன்ஸ்டாகிராமில் பகிர்ந்துள்ளார். இந்த அறிகுறிகளை வீட்டிலேயே நாம் சரிபார்க்க முடியும் என்று அவர் கூறுகிறார்.

1. தோல் மற்றும் கண்களில் மஞ்சள் நிறம் (மஞ்சள் காமாலை)    

இது கல்லீரல் நோயின் ஒரு முக்கியமான மற்றும் பொதுவான அறிகுறியாகும். பிளிரூபின் (bilirubin) எனப்படும் ஒரு கழிவுப் பொருள் கல்லீரலால் சரியாக செயலாக்கப்பட்டு வெளியேற்றப்பட முடியாதபோது, அது ரத்தத்தில் அதிகரித்து தோல் மற்றும் கண்களில் மஞ்சள் நிறத்தை ஏற்படுத்துகிறது. இந்த நிலை மஞ்சள் காமாலை (jaundice) என்று அழைக்கப்படுகிறது. பொதுவாக, ரத்தத்தில் பிளிரூபின் அளவு 2 மி.கி/டி.எல்-க்கு மேல் செல்லும் போது இந்த மஞ்சள் நிறம் தெளிவாகத் தெரியும்.

2. சிலந்தி வடிவ இரத்த நாளங்கள் (Spider Angiomas)

இவை சருமத்தின் மேற்பரப்பில் சிலந்தி வலையைப் போலத் தோன்றும் சிறிய, விரிவடைந்த இரத்த நாளங்கள் ஆகும். இவை பெரும்பாலும் முகம், கழுத்து அல்லது மார்பு போன்ற பகுதிகளில் காணப்படும். கல்லீரல் நோய் உள்ளவர்களுக்கு ஈஸ்ட்ரோஜன் (estrogen) ஹார்மோன் அளவு அதிகரிக்கும்போது இந்த வகையான இரத்த நாளங்கள் தோன்றலாம். டாக்டர் விகாஸ் ஜிண்டால் குறிப்பிடுவது போல, ஒருவருக்கு மூன்று அல்லது அதற்கு மேற்பட்ட இந்த சிலந்தி வடிவ இரத்த நாளங்கள் தோன்றினால், அது கல்லீரல் செயலிழப்பு அல்லது சிரோசிஸ் (cirrhosis) நோய்க்கான அறிகுறியாக இருக்கலாம்.

3. உள்ளங்கைகளில் சிவத்தல் (Palmar Erythema)

உள்ளங்கைகள், குறிப்பாக கட்டைவிரல் மற்றும் சுண்டுவிரலின் அடிப்பகுதியில் சிவந்து காணப்படுதல் பால்மர் எரித்மா என்று அழைக்கப்படுகிறது. கல்லீரல் சரியாக இயங்காதபோது, ரத்த ஓட்டம் அதிகரித்து, உடலில் ஈஸ்ட்ரோஜன் அளவு அதிகரிப்பதால் இது ஏற்படுகிறது. சிரோசிஸ் உள்ள நோயாளிகளில் சுமார் 23-72% பேருக்கு இந்த அறிகுறி காணப்படுவதாக ஆய்வுகள் தெரிவிக்கின்றன.

4. காரணம் தெரியாத அரிப்பு

காரணம் இல்லாமல் ஏற்படும் அரிப்பு, குறிப்பாக இரவில் மோசமாவது, கல்லீரல் பிரச்சனைகளின் அறிகுறியாக இருக்கலாம். கல்லீரல் பித்த உப்புகளை (bile salts) முறையாக வெளியேற்றாதபோது, அவை சருமத்தில் சேருவதால் இந்த கடுமையான அரிப்பு உண்டாகிறது. இது பெரும்பாலும் உள்ளங்கைகள் மற்றும் உள்ளங்கால்களில் தொடங்கி பின்னர் உடலின் மற்ற பகுதிகளுக்கு பரவும்.

இந்த அறிகுறிகள் தென்படும்போது அலட்சியமாக இருக்க வேண்டாம் என்று மருத்துவர்கள் வலியுறுத்துகிறார்கள். கல்லீரல் ஆரோக்கியத்தை மேம்படுத்த சரியான நேரத்தில் சிகிச்சைகள் மேற்கொள்வது அவசியமாகும். உங்கள் உடல்நலத்தில் ஏதேனும் மாற்றம் தென்பட்டால் உடனடியாக மருத்துவரை அணுகி ஆலோசனை பெறுவது மிகவும் முக்கியம்.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.