பாத்ரூம் பளிச்சுணு இருக்க 10 ரூபாய் போதும்… இந்த சிம்பிள் டிப்ஸ் டிரை பண்ணுங்க!

பாத்ரூமில் படிந்திருக்கும் உப்பு மற்றும் அழுக்கு கறைகளை நீக்க சிரமப்படுகிறீர்களா? ரசாயனம் கலந்த சுத்தம் செய்யும் பொருட்களை பயன்படுத்துவதால் ஏற்படும் சுவாசம் தொடர்பான பிரச்னைகள் உங்களுக்கு இருக்கிறதா? வீட்டிலேயே இயற்கையான முறையில் சுத்தம் செய்யும் திரவத்தை எளிதாகத் தயாரித்து பயன்படுத்தலாம். இந்த முறை ரசாயன பொருட்களைப் பயன்படுத்துவதைத் தவிர்த்து, கறைகளை திறம்பட நீக்குகிறது.

தேவையான பொருட்கள்:

சலவை சோப் (Laundry soap) - ஒரு சிறிய துண்டு

பேக்கிங் சோடா (Baking soda) - 2 ஸ்பூன்

எலுமிச்சை அல்லது வினிகர் - ஒரு எலுமிச்சை பழம் (அ) தேவையான அளவு வினிகர்

சூடான தண்ணீர் - ஒரு கப்

தயாரிக்கும் முறை:

முதலில், சலவை சோப்பின் ஒரு சிறிய பகுதியை துருவி எடுத்துக்கொள்ளுங்கள். ஒரு பாத்திரத்தில், இந்த துருவிய சோப்புடன் இரண்டு ஸ்பூன் பேக்கிங் சோடாவை சேர்க்கவும். பிறகு, ஒரு எலுமிச்சைப் பழத்தின் சாற்றை பிழிந்து விடுங்கள். எலுமிச்சைக்குப் பதிலாக வினிகரையும் பயன்படுத்தலாம். எலுமிச்சை சாற்றை சேர்த்ததும், கலவை நுரைத்து பொங்கும். இப்போது, ஒரு கப் சூடான நீரை ஊற்றி, சோப்பு முழுவதுமாக கரையும் வரை நன்கு கலக்கவும். சூடான நீரை பயன்படுத்தினால் சோப்பு வேகமாக கரையும். கடைசியாக, தயாரான இந்த திரவத்தை ஸ்பிரே பாட்டிலில் ஊற்றி வைத்துக்கொள்ளலாம்.

இந்தத் திரவத்தை குளியலறையில் அழுக்கு படிந்த இடங்களில் ஸ்பிரே செய்து, சுமார் 15 நிமிடங்கள் அப்படியே விட்டுவிட வேண்டும். அதன் பிறகு, பிரஷ் அல்லது துணி கொண்டு தேய்த்தால், கறைகள் எளிதாக நீங்கும். ரசாயன பொருட்கள் இல்லாமல், கறைகளை எளிமையாக சுத்தம் செய்ய இந்த முறை மிகவும் பயனுள்ளதாக இருக்கும்.