மிக்ஸி ஜார் பின்னால் இருக்கும் அழுக்கை ஒரு நிமிடத்தில் சுத்தம் செய்யலாம்… எலுமிச்சை சாறுடன் இத மட்டும் சேருங்க போதும்!

ஒவ்வொரு சமையலறையிலும் மிக்ஸி கிரைண்டர் ஒரு அத்தியாவசியம். நம்மில் பலருக்கு, காலை பரபரப்பில் இட்லி மாவு அரைப்பது முதல், இரவில் சட்னி அரைப்பது வரை, மிக்ஸிதான் சமையல் வேலைகளை எளிதாக்குகிறது. மிக்ஸி கிரைண்டரை சரியாகப் பராமரிப்பது அதன் ஆயுளை நீட்டிப்பதோடு, எப்போதும் சிறந்த செயல்திறனையும் உறுதி செய்யும். உங்கள் மிக்ஸி கிரைண்டரை சுத்தமாகவும், திறமையாகவும் வைத்திருக்க உதவும் சில சூப்பர் டிப்ஸ்கள் இங்கே!

சரியான முறையில் வைப்பது:

மிக்ஸியை எப்போதும் ஒரு தட்டு அல்லது ட்ரே மீது வைக்கவும். இது மேடையை சுத்தம் செய்வதை எளிதாக்குவதுடன், மிக்ஸியின் புஷ் (bush) தேய்மானம் அடைவதையும் தடுக்கும்.

வழிவதைத் தடுத்தல்:

மில்க் ஷேக் அல்லது தேங்காய்ப் பால் போன்ற திரவங்களை அரைக்கும்போது, அவை வழிவதைத் தவிர்க்க, ஒரு பழைய டி-ஷர்ட்டை மிக்ஸிக்கு மூடியாகப் பயன்படுத்தலாம். இது மோட்டாரை சுத்தமாக வைத்திருக்க உதவுவதுடன், மிக்ஸி அழுக்காவதையும் தடுக்கும்.

சுத்தம் மற்றும் பராமரிப்பு:

கெட்ட வாசனையை நீக்குதல்: இஞ்சி, பூண்டு போன்ற வாசனைமிக்க பொருட்களை அரைத்த பிறகு, ஜாரில் துர்நாற்றம் இருந்தால், சிறிதளவு தண்ணீருடன் எலுமிச்சைத் தோல்களைச் சேர்த்து ஒரு நிமிடம் அரைக்கவும். இது ஜாரை பளபளப்பாகவும், துர்நாற்றமற்றதாகவும் மாற்றும்.

மிக்ஸி ஜாரின் அடிப்பகுதியை சுத்தம் செய்தல்

மிக்ஸி ஜாரின் அடிப்பகுதியில் சேரும் அழுக்கை சுத்தம் செய்ய, இரண்டு டேபிள்ஸ்பூன் சமையல் சோடாவை ஒரு டேபிள்ஸ்பூன் எலுமிச்சை சாற்றுடன் கலந்து, அழுக்குள்ள பகுதிகளில் தடவவும். 20-30 நிமிடங்கள் அப்படியே விட்டுவிட்டு, பழைய டூத் பிரஷ் கொண்டு தேய்க்கவும்.

கத்திகளை கூர்மையாக்குதல்

மிக்ஸி ஜாரின் கத்திகளை கூர்மையாக்க, முட்டை ஓடுகள் அல்லது கல் உப்பை ஜாரில் சேர்த்து 20-30 வினாடிகள் அரைக்கவும். இது கத்திகளின் அடியில் படிந்திருக்கும் கறைகளையும் நீக்க உதவும்.

பயன்பாட்டிற்குப் பின் ஜாரை சுத்தம் செய்தல்

மாவு அரைத்த பிறகு, உடனடியாக ஜாரில் சிறிது பாத்திரம் கழுவும் திரவம் மற்றும் தண்ணீர் சேர்த்து அலசவும். இது மாவு காய்ந்து சுத்தம் செய்ய கடினமாவதைத் தடுக்கும்.

அடைய முடியாத பகுதிகளை சுத்தம் செய்தல்

மிக்ஸியின் அடைய முடியாத பகுதிகளை சுத்தம் செய்ய, ஒரு டூத் பிரஷை சூடுபடுத்தி வளைத்து பயன்படுத்தலாம். இது எளிதில் பிளவுகளுக்குள் சென்று சுத்தம் செய்ய உதவும்.

மிக்ஸியின் வெளிப்புறத்தை சுத்தம் செய்தல்

மிக்ஸியின் வெளிப்புறத்தை முழுமையாக சுத்தம் செய்ய, பற்பசை மற்றும் உலர்ந்த டூத் பிரஷைப் பயன்படுத்தவும். பற்பசையை மிக்ஸியின் மீது தடவி, கறைகளையும் அழுக்கையும் நீக்க தேய்க்கவும்.

மிக்ஸி மூடி ரப்பர் வளையத்தை சுத்தம் செய்தல்

மிக்ஸி மூடியின் ரப்பர் வளையத்தை சுத்தம் செய்ய, ஒரு ஸ்பூன் அல்லது பட்டர் கத்தி கொண்டு ரப்பர் வளையத்தை கவனமாக அகற்றவும். அதன் அடியில் சேர்ந்திருக்கும் அழுக்கை சுத்தம் செய்து, பின்னர் ரப்பர் வளையத்தை மீண்டும் பொருத்தவும்.

இந்த எளிய குறிப்புகளைப் பின்பற்றுவதன் மூலம், உங்கள் மிக்ஸி கிரைண்டரை நீண்ட காலம் புதுமையாகப் பயன்படுத்தலாம்!