பாம்புக்கும் கீரிக்கும் சண்டை... பாம்பின் விஷம் கீரியை பாதிப்பது இல்லை ஏன் தெரியுமா?

பாம்புக்கும் கீரிக்கும் இடையே நடக்கும் மோதலை யாரும் மறக்க முடியாது. கிராமப்புறங்களில் “கீரி இருக்கிற இடத்தில் பாம்பு இருக்காது” என்ற பழமொழி பரவலாக பேசப்படுகிறது. இதற்குப் பின்னால் உள்ள விஞ்ஞான காரணம் பலருக்கும் தெரியாது. பாம்பின் விஷம் மனிதர்களுக்கு உயிருக்கு ஆபத்தானது. ஆனால் அதே விஷம் கீரிக்கு ஒன்றுமே செய்ய முடியாது என்பது ஒரு அதிசயமான உண்மை.

கீரியும் பாம்பும் ஒருவரையொருவர் கண்டாலே சண்டை நிச்சயம். கீரிப்பிள்ளையின் வேகமும் வலிமையும் பாம்பை விட மிக அதிகம் என்பதால் பெரும்பாலான நேரங்களில் வெற்றி கீரிக்கே சொந்தமாகிறது. கீரியின் கூர்மையான பற்களும் வலுவான தாடைகளும் பாம்பின் தலையை நசுக்கக்கூடிய திறனுடையவை. மேலும் கீரி தாக்கும் வேகம் மின்னல் வேகத்துக்கு சமமானது என்பதால், பாம்பு எதிர்க்க முயற்சிக்கும் முன்பே கீரி அதன் கழுத்தைப் பிடித்து செயலிழக்கச் செய்கிறது. இதுவே கீரி–பாம்பு சண்டையின் முக்கிய வெற்றி ரகசியமாகும்.

பாம்பு யாரையும் கடித்தால் அதன் விஷத்தில் உள்ள நியூரோடாக்சின் (Neurotoxin) நரம்பு மண்டலத்தை செயலிழக்கச் செய்து பக்கவாதத்தை ஏற்படுத்தும். இதனால் உடனடி சிகிச்சை இல்லாமல் உயிரிழப்பும் ஏற்படலாம். ஆனால் கீரிக்கு இதனால் எந்தவித பாதிப்பும் ஏற்படாது. இதற்குக் காரணம் இயற்கையே கீரிக்கு அளித்திருக்கும் ஒரு அதிசயமான பாதுகாப்பு அமைப்பு.

கீரியின் உடலில் அசிட்டைல் கொலின் ஏற்பி (Acetylcholine receptor) எனப்படும் ஒரு சிறப்பு நோய் எதிர்ப்பு அமைப்பு உள்ளது. இது பாம்பின் விஷத்தில் உள்ள நச்சுப் பொருளை உடலுக்குள் பரவாமல் தடுக்கிறது. விஷம் நரம்புகளிலும் தசைகளிலும் கலப்பதைத் தடுக்கக் கூடிய இந்த இயற்கை பாதுகாப்பு, கீரியை விஷத்திலிருந்து காக்கும் கவசமாக செயல்படுகிறது.

இதன் காரணமாக, பாம்பு கீரியை கடித்தாலும் அது உயிருக்கு ஆபத்தாக மாறுவதில்லை. விஷம் உடலில் தாக்கமின்றி முறியடிக்கப்படுகிறது. இதுவே கீரி பாம்பைக் கொன்று தின்றாலும் அதற்குச் சிறிதளவும் பிரச்சனை வராததற்கான விஞ்ஞான விளக்கம்.

மேலும், பாம்புகள் மட்டுமல்லாமல் பிற விஷ ஜந்துக்களும் கீரியைத் தாக்கினாலும் அதன் விஷம் எந்தவித சேதத்தையும் உண்டாக்காது. கீரியின் உடல் அமைப்பு மற்றும் நோய் எதிர்ப்பு சக்தி இதற்கான காரணம்.

பாம்பு மற்றும் கீரி சண்டை என்பது இயற்கையின் மிக விறுவிறுப்பான ஒரு நிகழ்வு. ஆனால் அந்த சண்டையின் பின்னால் மறைந்திருக்கும் விஞ்ஞானம் இன்னும் ஆச்சரியமானது. இயற்கை விலங்குகளுக்குத் தந்துள்ள இந்த அதிசய ரகசியங்கள், உயிரியல் ஆராய்ச்சிகளுக்கு ஒரு பெரிய ஊக்கமாக உள்ளன.

கீரி — பாம்பை வெல்லும் வேகமான போர்வீரன் மட்டுமல்ல, விஷத்தையே வெல்லும் இயற்கையின் அதிசயமான உயிரினம் என்பதற்கும் இது ஒரு சான்று!