காய்க்காத எலுமிச்சை செடி காய்க்க… இந்த நேரத்தில் தேன் கலவை யூஸ் பண்ணுங்க!

உங்கள் வீட்டில் உள்ள எலுமிச்சை செடி பூ பூத்தும் காய் பிடிக்காமல் இருக்கிறதா? அல்லது சுத்தமாக காயே விடாமல் இருக்கிறதா? கவலை வேண்டாம். ஒரு சில எளிய வழிமுறைகளைப் பின்பற்றுவதன் மூலம் உங்கள் எலுமிச்சை செடியிலும் நிறைய காய்களைப் பெறலாம். இதற்கான எளிய டிப்ஸ் சதா கார்டன் என்ற யூடியூப் சேனலில் குறிப்பிட்டுள்ளது.

1. நுனி கிளைகளை வெட்டுதல் (கவாத்து): எலுமிச்சை செடி காய்க்காமல் இருப்பதற்கு ஒரு முக்கிய காரணம், அதன் வளர்ச்சியில் தேக்கம் ஏற்படுவதுதான். செடியின் நுனிப் பகுதிகளை வெட்டி விடுவது (கவாத்து செய்தல்) புதிய தளிர்களை ஊக்குவிக்கும். செடியின் கிளைகளில் உள்ள நுனிகளை கத்தரித்து விடுங்கள். இது செடிக்கு ஒரு வித அதிர்ச்சியை கொடுத்து, புதிய துளிர்களை வெளிக் கொண்டு வரும். இந்த புதிய தளிர்களில்தான் புதிய இலைகள் மற்றும் மொட்டுக்கள் உருவாகும். மொட்டுக்கள் உருவானால்தான் அவை பூக்களாக மாறி, பின் காய்களாக மாறும்.

2. தேன் மூலம் மகரந்தச் சேர்க்கையை அதிகரித்தல்: பூக்கள் பூக்கும் சமயத்தில் காய் பிடிக்காமல் போவதற்கு, மகரந்தச் சேர்க்கை சரியாக நடக்காதது ஒரு காரணமாக இருக்கலாம். தேனீக்கள் மற்றும் வண்ணத்துப்பூச்சிகள் போன்ற மகரந்தச் சேர்க்கைக்கு உதவும் பூச்சிகளை ஈர்ப்பதன் மூலம் இதைச் சரிசெய்யலாம். ஒரு ஸ்பூன் தேனை எடுத்து, 2 ஸ்பூன் தண்ணீருடன் கலந்து ஒரு ஸ்ப்ரே பாட்டிலில் ஊற்றவும். எலுமிச்சை செடியில் பூக்கள் பூக்கத் தொடங்கும் நேரத்தில், இந்த தேன் கலந்த நீரை பூக்களின் மீது மெதுவாகத் தெளிக்கவும். இதை காலை அல்லது மாலை வேளைகளில் செய்வது நல்லது. தேனின் இனிமையான வாசனை மகரந்தச் சேர்க்கைக்கு உதவும் பூச்சிகளை செடியை நோக்கி ஈர்க்கும். இந்த பூச்சிகள் வரும்போது, அவை பூக்களில் உள்ள மகரந்தத் துகள்களை ஒரு பூவிலிருந்து மற்றொரு பூவிற்கு எடுத்துச் சென்று, மகரந்தச் சேர்க்கை நடைபெற உதவுகின்றன. இதனால் பூக்கள் காய்களாக மாறும் வாய்ப்புகள் அதிகரிக்கும்.

3. கால்சியம் பற்றாக்குறையை நிவர்த்தி செய்தல்: எலுமிச்சை செடி காய் பிடிக்காமல் இருப்பதற்கும், அதன் வளர்ச்சி குன்றுவதற்கும் கால்சியம் சத்து பற்றாக்குறை ஒரு காரணமாக இருக்கலாம். முட்டை ஓடுகளைப் பயன்படுத்துவது ஒரு நல்ல முறை என்றாலும், அவை மண்ணில் கரைந்து செடிக்குச் சத்துக்களைக் கொடுக்க நீண்ட காலம் ஆகும். இதற்குப் பதிலாக, சுண்ணாம்பு கரைசல் ஒரு உடனடி தீர்வாகும். சிறிய அளவு சுண்ணாம்பை எடுத்து தண்ணீரில் கலந்து ஒரு கரைசலைத் தயார் செய்யவும். இந்த சுண்ணாம்பு கரைசலை எலுமிச்சை செடியின் அடியில் உள்ள மண்ணில் ஊற்றவும். இது செடிக்குத் தேவையான கால்சியத்தை உடனடியாகக் கிடைக்கும்படி செய்யும். இது செடியின் ஒட்டுமொத்த ஆரோக்கியத்திற்கும், குறிப்பாக பழ வளர்ச்சிக்கும் மிகவும் அவசியம்.