குழந்தை உணவுகள்: பெயரில் ஒன்று; உள்ளே மற்றொன்று - அதிர்ச்சி தரும் புதிய ஆய்வு முடிவுகள்

பழங்களின் படங்களிலிருந்து, “சர்க்கரை இல்லாதது” என்ற கூற்று வரை, குழந்தைகளுக்கான உணவு தயாரிப்பாளர்கள், தங்கள் தயாரிப்புகள் ஆரோக்கியமானவை, வசதியானவை மற்றும் குழந்தைகளின் வளர்ச்சிக்கு உகந்தவை என்று பெற்றோரை நம்ப வைக்க முயல்கின்றனர்.

ஆங்கிலத்தில் படிக்க:

ஆனால், எங்களின் புதிய ஆய்வு காட்டுவது போல், பல உணவுப் பொருட்கள் உண்மையில் அப்படி இல்லை.

நியூசிலாந்து பல்பொருள் அங்காடிகளில் கிடைக்கும் குழந்தைகள் மற்றும் மழலையர்களுக்கான 210 உணவுப் பொருட்களின் உறைகளை நாங்கள் ஆய்வு செய்தோம். ஒவ்வொரு உறையிலும் ஏதேனும் ஒரு தகவல் குறிப்பிடப்பட்டிருந்தது. மேலும், பல உறைகளில் பழங்கள் மற்றும் காய்கறிகளின் படங்கள் இருந்தன. ஆனால், அவை அதில் பயன்படுத்தப்பட்ட முக்கிய மூலப் பொருட்களைப் பிரதிபலிக்கவில்லை.

ஒரு குழந்தையின் வாழ்க்கையில் முதல் ஆயிரம் நாட்கள் மிக முக்கியமானவை. இந்த நாட்களில், அவர்களின் மூளை மற்றும் உடல் மற்ற நேரங்களை விட வேகமாக வளரும்.

இந்த காலகட்டத்தில், ஆரோக்கியமான வளர்ச்சி, நல்வாழ்வு, மேம்பாடு மற்றும் வாழ்நாள் முழுவதும் உணவுப் பழக்கங்களை வடிவமைக்க சிறந்த ஊட்டச்சத்து அவசியமானது.

இந்த நேரத்தில், பெற்றோர்கள் பெரும்பாலும் பரபரப்பாக இருப்பார்கள். மேலும், உணவு தயாரிப்பாளர்களுக்கும் இது தெரியும். எனவே, அவர்கள் வசதியைக் காரணம் காட்டி, ஆரோக்கியமற்ற உணவுகளைக் கூட “ஊட்டச்சத்து மிக்கவை” என்று விளம்பரப்படுத்துகிறார்கள்.

உறையின் மீதான கூற்றுகள் ஒரு சக்திவாய்ந்த சந்தைப்படுத்தல் கருவியாகும். மேலும், அவை பயனுள்ளவையாகவும் உள்ளன. அவை நுகர்வோரின் கருத்துக்களை மாற்றுவதோடு, வாங்கும் முடிவுகளைத் தூண்டுகின்றன. மேலும், அதற்குத் தகுதியற்ற பொருட்களுக்கு ஆரோக்கியத்தின் மேல் ஒரு வட்டத்தை உருவாக்குகின்றன.

குறிப்புகளால் குழப்பம்

நாங்கள் ஆய்வு செய்த உணவுப் பொருட்களில், சராசரியாக 7 முதல் 8 குறிப்புகள் அதன் உறையில் இடம்பெற்றிருந்தன. இதில், மோசமான நிறுவனங்களின் தயாரிப்பு உறைகளில் 15 குறிப்புகள் வரை இருந்தன.

அதிகம் இடம்பெற்ற குறிப்புகள், “கூடுதல் பொருட்கள் இல்லாதது”, “நிறமிகள் இல்லாதது” என்பன போன்றவையாகும். இந்த வகையான குறிப்புகள், அந்த உணவில் உள்ள அதிக சர்க்கரை உள்ளடக்கம் அல்லது அதிக பதப்படுத்தப்பட்ட பொருட்களைப் பற்றித் தெரிந்து கொள்வதிலிருந்து பெற்றோரின் கவனத்தைத் திசை திருப்பும்.

மற்ற கூற்றுகள், உணவுப் பொருள் குழந்தைக்கு வளர்ச்சிக்கு நல்லது அல்லது எளிதான தேர்வு என்று விளம்பரப்படுத்தின. இது தங்கள் குழந்தைக்கு சிறந்ததைச் செய்ய வேண்டும் என்ற பெற்றோரின் ஆசையை பூர்த்தி செய்வதோடு, பரபரப்பான குடும்ப வாழ்க்கைக்கு இடமளிப்பதாகவும் அமையும்.

ஆரோக்கியமான விருப்பத்தைத் தேர்ந்தெடுக்கத் தேவையான தகவலைக் கண்டறிய, பெற்றோர்கள் இந்த அனைத்து கூற்றுகளையும் சலித்து ஆராய வேண்டியதில்லை.

அனைத்து உணவுப் பொருட்களில் 60% பழங்களின் படங்களையும், 40% காய்கறிகளின் படங்களையும் கொண்டிருந்தன. ஆனால், பெரும்பாலானவற்றில் முழு பழங்கள் மற்றும் காய்கறிகள் இல்லை.

காய்கறிகளின் படங்களைக் கொண்ட சிற்றுண்டி உணவுகளில், மிகக் குறைந்த அளவிலான காய்கறி சாறு அல்லது தூள் மட்டுமே இருந்தது. மேலும், பழங்களின் படங்களைக் கொண்ட உணவுகளில் பொதுவாக பசைகள் மற்றும் சாறுகள் போன்ற பதப்படுத்தப்பட்ட பழ சர்க்கரைகள் இருந்தன.

அதிர்ச்சி தரும் விஷயம் என்னவென்றால், ஐந்தில் ஒரு பங்கு உணவுப் பொருட்களில் 5%க்கும் குறைவான பழங்கள் மட்டுமே இருந்தன. பழங்கள் மற்றும் காய்கறிகளின் படங்கள், பெற்றோர்கள் மற்றும் பராமரிப்பாளர்களுக்கு ஆரோக்கியம் பற்றிய ஒரு தோற்றத்தை அளித்து, அவர்களின் வாங்கும் முடிவுகளைப் பாதிக்கின்றன.

ஆனால், இந்த தயாரிப்புகளை விற்கும் நிறுவனங்கள், அதில் முழு பழங்கள் மற்றும் காய்கறிகள் இல்லாதபோது, இப்படங்களைப் பயன்படுத்த அனுமதிக்கப்பட வேண்டுமா?

உற்பத்திப் பொருட்களின் பெயர்கள், முக்கிய மூலப் பொருட்களுடன் பொருந்தவில்லை

தயாரிப்புப் பெயர்களும் தவறாக வழிநடத்துகின்றன என்பதை நாங்கள் கண்டறிந்தோம். பாதிக்கும் மேற்பட்ட சுவையான உணவுகளில், பெயர் அதன் முக்கிய மூலப் பொருட்களைச் சரியாகப் பிரதிபலிக்கவில்லை. இறைச்சிகள் அல்லது கீரை அல்லது பருப்பு வகைகள் போன்ற ஊட்டச்சத்து நிறைந்த பொருட்கள் பெரும்பாலும் பெயரில் முன்னிலைப்படுத்தப்பட்டன. ஆனால், அவை சிறிய அளவில் மட்டுமே இருந்தன.

ஆஸ்திரேலியாவிலும் இதே நிலைதான். ஆஸ்திரேலிய ஆய்வாளர்கள் பல்பொருள் அங்காடிகளில் கிடைக்கும் 330 தயாரிப்புகளை மதிப்பீடு செய்தனர். அவர்கள், ஏராளமான கூற்றுகள் மற்றும் தவறான பெயர்கள் உறையில் ஆதிக்கம் செலுத்துவதைக் கண்டறிந்தனர்.

ஆஸ்திரேலிய தயாரிப்புகளில் சராசரியாக எட்டு கூற்றுகள் மற்றும் மூன்றில் ஒரு பங்கு உணவுகளில் அதன் மூலப் பொருட்களைச் சரியாகப் பிரதிபலிக்காத பெயர்கள் இருந்தன. இது ஃபுட் ஸ்டாண்டர்ட்ஸ் ஆஸ்திரேலியா நியூசிலாந்து (FSANZ) மூலம் உருவாக்கப்பட்ட மற்றும் நிர்வகிக்கப்படும் தற்போதைய இரு நாடுகளின் உறையில் இடம்பெற்றுள்ள விளம்பர விதிகளும் போதுமானதாக இல்லை என்பதைத் தெளிவாகக் காட்டுகிறது.

துரதிர்ஷ்டவசமாக, ஆஸ்திரேலியா மற்றும் நியூசிலாந்தில் உள்ள பல குழந்தை மற்றும் மழலையர் உணவுப் பொருட்கள் ஆரோக்கியமான உணவுப் பழக்கங்களை ஆதரிக்கவில்லை. ஆஸ்திரேலியாவில், நான்கில் ஒரு பங்கு தயாரிப்புகள் மட்டுமே உலக சுகாதார அமைப்பின் ஊட்டச்சத்து பரிந்துரைகளுக்கு இணங்குவதாகக் கண்டறியப்பட்டுள்ளது.

நியூசிலாந்து தயாரிப்புகளுக்கான இன்னும் வெளியிடப்படாத ஆய்வில், மூன்றில் ஒரு பங்கு மட்டுமே இந்த தரத்தை பூர்த்தி செய்வதாகக் கண்டறியப்பட்டுள்ளது. எனவே, அவை ஆரோக்கியமானவை என்று விளம்பரப்படுத்தப்படக்கூடாது.

சீர்திருத்தத்திற்கான வாய்ப்பு நமக்கு உள்ளது. இந்த ஆண்டின் தொடக்கத்தில், ஆஸ்திரேலியா மற்றும் நியூசிலாந்தின் உணவுத் துறை அமைச்சர்கள், தயாரிப்புகளில் பயன்படுத்தப்படும் கூற்றுகள் மற்றும் பெயர்கள் மக்களை தவறாக வழிநடத்துவதில்லை என்பதையும், பராமரிப்பாளர்கள் தகவலறிந்த தேர்வுகளைச் செய்ய உதவுவதையும் உறுதி செய்ய, விதிகளை மறுபரிசீலனை செய்ய FSANZ-ஐக் கேட்டுக்கொண்டனர்.

இது ஒரு சிறந்த முதல் படி. இப்போது விதிகளைச் சரியாக அமைப்பது FSANZ-ன் பொறுப்பு. இந்த உணவுகள் பொறுப்புடன் சந்தைப்படுத்தப்படுவதை உறுதிசெய்ய எங்களுக்கு விரிவான மாற்றங்கள் தேவை. குறைந்தபட்சம் இதில் பின்வருபவை அடங்கும்:

குழந்தைகள் மற்றும் மழலையர் உணவுகளில் ஆரோக்கியம், ஊட்டச்சத்து அல்லது தொடர்புடைய கூற்றுகளை அனுமதிக்கக் கூடாது.

முழு பழங்கள் மற்றும் காய்கறிகள் தயாரிப்பின் ஒரு குறிப்பிடத்தக்க பகுதியாக இருந்தால் மட்டுமே, அவற்றின் படங்களை அனுமதிக்க வேண்டும். தயாரிப்புப் பெயர்கள், ஒரு பொருளின் மூலப் பொருட்களைச் சரியாகப் பிரதிபலிக்க வேண்டும்.