தினமும் நாள் முழுவதும் ஷூ அணிவது பாதங்கள் என்னவாகும்? எலும்பு மருத்துவர்கள் எச்சரிக்கை

காயம், அழுக்கு, மற்றும் கடுமையான வானிலை போன்றவற்றிலிருந்து நமது பாதங்களைப் பாதுகாக்கவே நாம் பெரும்பாலும் ஷூ அணிகிறோம். ஆனால், தினமும் நாள் முழுவதும் ஷூ அணிவது நன்மையைவிட அதிக தீங்கை ஏற்படுத்தும்.

ஆங்கிலத்தில் படிக்க:

மும்பையில் உள்ள கோகிலாபென் மருத்துவமனையின் குழந்தைகள் எலும்பு அறுவை சிகிச்சை நிபுணர் டாக்டர் விகாஸ் பாசா கூறுகையில், நீண்ட நேரம் ஷூ அணிவது உங்கள் பாதங்களை ஒரு குறிப்பிட்ட நிலையில் வைத்திருப்பதால், பாதங்களில் உள்ள தசைகள் விறைப்பாகவும் பலவீனமாகவும் மாறும். இந்தத் தொடர்ச்சியான அழுத்தம், இயற்கையான அசைவுகளைக் குறைத்து, நீண்ட கால கால் பிரச்னைகளுக்கு வழிவகுக்கும்.

நாள் முழுவதும் ஷூ அணிவது உங்கள் பாதங்களை எவ்வாறு பாதிக்கும்?

குறிப்பாகப் பொருத்தமில்லாத அல்லது பாதத்தைச் சுற்றி இறுக்கமாக மூடப்பட்ட ஷூக்கள் பல்வேறு கால் பிரச்னைகளை ஏற்படுத்தும்:

கொப்புளங்கள், பருக்கள் மற்றும் தழும்புகள்: உங்கள் தோல் மற்றும் ஷூவின் உட்புறம் இடையே ஏற்படும் தொடர்ச்சியான உராய்வு இந்த வலிமிகுந்த நிலைகளை ஏற்படுத்துகிறது. பொருத்தமில்லாத ஷூக்கள், அல்லது பாதங்களின் சரியான அசைவுக்கு இடம் கொடுக்காத ஷூக்கள், இந்தப் பிரச்னைகள் ஏற்படும் வாய்ப்பை அதிகரிக்கும் என்று டாக்டர் பாசா கூறினார்.

பூஞ்சை மற்றும் பாக்டீரியா தொற்றுகள்: வெப்பமான மற்றும் ஈரப்பதமான சூழலில், குறிப்பாக இந்தியாவில், நாள் முழுவதும் ஷூ அணிவது அதிக வியர்வைக்கு வழிவகுக்கும். அப்பல்லோ மருத்துவமனையின் எலும்பு முறிவு சிகிச்சை ஆலோசகர் டாக்டர் சித்தார்த் யாதவ் கூறுகையில், ஷூவினுள் தேங்கும் ஈரப்பதம், பாக்டீரியா மற்றும் பூஞ்சைகள் வளர ஏற்ற சூழலை உருவாக்குகிறது. இது 'அத்லீட்ஸ் ஃபுட்' போன்ற தொற்றுகளை ஏற்படுத்தும்.

பாத பலவீனம்: ஷூ அணிந்து கால்களை ஒரு நிலையான நிலையில் வைத்திருப்பது பாதத்தில் உள்ள சில தசைக் குழுக்களை பலவீனப்படுத்துகிறது என்று டாக்டர் பாசா விளக்கினார். இந்தத் தசை வலிமை இழப்பு, கால் வலி, பிளாண்டர் ஃபேசியிட்டிஸ் (plantar fasciitis) மற்றும் உங்கள் பாதங்கள் உடலின் எடையைத் தாங்க முடியாமல் போவதால் ஏற்படும் தோரணை பிரச்னைகள் (posture problems) போன்ற சிக்கல்களுக்கு வழிவகுக்கும்.

தோரணை பிரச்னைகள்: சரியான ஆதரவு இல்லாத அல்லது பொருந்தாத ஷூக்கள் உங்கள் உடலின் சமநிலையைக் குலைத்து, முதுகுவலி அல்லது இடுப்பு வலி போன்ற தோரணை தொடர்பான பிரச்னைகளுக்கு வழிவகுக்கும். நீண்ட நேரம் தவறான கால் நிலையில் இருப்பது, உடலின் மற்ற பாகங்களிலும் நாள்பட்ட பிரச்னைகளை ஏற்படுத்தும்.

உங்கள் பாதங்களை எவ்வாறு பராமரிப்பது?

உங்கள் பாதங்களை ஆரோக்கியமாக வைத்திருக்க, ஷூக்களிலிருந்து அவற்றுக்கு ஓய்வு கொடுப்பது அவசியம். உங்கள் பாதங்கள் சுவாசிக்க அனுமதிக்கும் வகையில், வழக்கமான இடைவெளிகளில் ஷூக்களை அகற்றுமாறு டாக்டர் பாசா பரிந்துரைக்கிறார். டாக்டர் யாதவ் கூறியுள்ள பாதங்களைப் பராமரிக்க உதவும் சில வழிகள் இங்கே:

பயிற்சிகள்: வழக்கமான நீட்டிப்புப் பயிற்சிகள் (stretching) நெகிழ்வுத்தன்மையையும் வலிமையையும் பராமரிக்க உதவுகின்றன.

தினசரி பராமரிப்பு: உங்கள் பாதங்களை தினமும் கழுவி, உலரவைத்து, ஈரப்பதமூட்டுங்கள்.

சுத்தமான ஷூ: பூஞ்சை தொற்றுகளைத் தடுக்க உங்கள் ஷூக்களைச் சுத்தமாகவும் உலர்ந்ததாகவும் வைத்திருங்கள்.

வெயிலில் உலரவிடுங்கள்: பாக்டீரியாக்களைக் கொல்லவும், துர்நாற்றத்தை அகற்றவும் ஷூக்களை வெயிலில் உலர விடுங்கள்.