அலாரம் அடித்தால் ஸ்நூஸ் செய்து மீண்டும் தூங்குறீங்களா? டிப்ரஷன் அதிகமாகும்; டாக்டர் அருண்குமார்

காலையில் அலாரம் ஒலித்ததும் அதை அணைப்பதற்குப் பதிலாக, மீண்டும் 'ஸ்னூஸ்' பட்டனை அழுத்திவிட்டு, ஒரு கால் மணி நேரம் கழித்து மீண்டும் எழுவது பலரது வழக்கம். சிலர் இரண்டு மூன்று முறை கூட இப்படிச் செய்வார்கள். ஆனால், இது ஆரோக்கியமானதா இல்லையா என்பது பற்றி இந்த வீடியோவில் விரிவாக பேசுகிறார் டாக்டர் அருண்குமார். 

ஸ்னூஸ் செய்வது ஏன் தவறு?

பொதுவாக, நாம் அலாரத்தை 'ஸ்னூஸ்' செய்யும்போது, இன்னும் கொஞ்சம் தூக்கம் கிடைக்கிறது என்றும், அதனால் நாள் முழுவதும் சுறுசுறுப்பாக இருக்க முடியும் என்றும் நம்புகிறோம். ஆனால், இது ஒரு மிகப்பெரிய தவறு. ஆய்வுகள் என்ன சொல்கின்றன என்றால், இப்படிச் செய்யும்போது சோர்வு அதிகமாகிறது, குழப்பம் அதிகமாகிறது, நாள் முழுவதும் மனச்சோர்வு அதிகரிக்கிறது, தூக்கம் கெடுகிறது என்பதுதான் உண்மை. ஏன் இந்த முரண்பாடு?

தூக்கச் சுழற்சி (Sleep Cycle) எப்படி வேலை செய்கிறது?

இதற்கான பதிலை அறிய, நாம் தூங்கும்போது என்ன நடக்கிறது என்பதைப் புரிந்துகொள்ள வேண்டும். தூக்கம் என்பது 'ஸ்லீப் சைக்கிள்' எனப்படும் சுழற்சிகளாக நடக்கிறது. சுமார் 7-8 மணி நேரம் தூங்கும்போது, கிட்டத்தட்ட 4 முதல் 6 தூக்கச் சுழற்சிகள் நடக்கும். ஒவ்வொரு சுழற்சியும் தோராயமாக 90 முதல் 110 நிமிடங்கள் (சுமார் ஒன்றரை முதல் இரண்டு மணி நேரம்) நீடிக்கும்.

ஒவ்வொரு தூக்கச் சுழற்சியிலும் நான்கு நிலைகள் உள்ளன: இந்த நான்கு நிலைகளும் சீராக நடந்தால்தான் உடல் ஆரோக்கியமாக இருக்கும். 7-8 மணி நேரம் தூங்கும்போது, இந்தச் சுழற்சிகள் குறிப்பிட்ட நேரத்தில் நடக்கும்.

ஸ்னூஸ் செய்தால் என்ன நடக்கும்?

நீங்கள் 'ஸ்னூஸ்' பொத்தானை அழுத்தி, ஒரு கால் மணி நேரம் குட்டித் தூக்கம் போடும்போது, அது 'துண்டுபட்ட லேசான தூக்கம்' (Fragmented Light Sleep) என்று அழைக்கப்படுகிறது. ஒரு முழுத் தூக்கச் சுழற்சிக்கு ஒன்றரை மணி நேரம் ஆகும் நிலையில், இந்தக் கால் மணி நேரத்தில் பெரிய தூக்கம் எதுவும் வராது.

நாம் மீண்டும் தூங்கும்போது, உடல் அடுத்த நிலைக்குச் செல்லலாம் என்று நினைக்கும்போது, அலாரம் மீண்டும் ஒலித்து தூக்கத்தைக் கெடுக்கும். இதனால் நாம் மீண்டும் மீண்டும் N1 (முதல் நிலை) தூக்கத்திற்கே திரும்புகிறோம். இது "ஸ்லீப் இனெர்ஷியா" (Sleep Inertia) எனப்படும் ஒரு குழப்பமான நிலையை ஏற்படுத்தும். தூங்கி எழுந்ததும் எங்கே இருக்கிறோம் என்று ஒருவித மயக்கம் அல்லது குழப்பம் ஏற்படும். இது மனச்சோர்வை அதிகரிக்கும் என்று ஆய்வுகள் தெளிவாக நிரூபித்துள்ளன.

அடிக்கடி 'ஸ்னூஸ்' செய்பவர்கள் அன்றைய தினத்தில் சரியான முடிவுகளை எடுக்க முடிவதில்லை என்றும் தெரிய வந்துள்ளது. மேலும், நமது ஹார்மோன்களும் பாதிக்கப்படலாம். இயற்கையாகவே தூங்கும்போது மெலடோனின் ஹார்மோனும், விழித்திருக்கும்போது கார்டிசால் ஹார்மோனும் சமநிலையில் இருக்க வேண்டும். ஆனால், அடிக்கடி 'ஸ்னூஸ்' செய்வதால் கார்டிசால் ஹார்மோனின் செயல்பாடு குறையும் (blunt ஆகும்), இது பல பிரச்சனைகளை உருவாக்கலாம்.

ஸ்னூஸ் செய்ய முக்கிய காரணம் என்ன?

முக்கியமாக, யார் யாரெல்லாம் அடிக்கடி 'ஸ்னூஸ்' பொத்தானை அழுத்துகிறார்களோ, அவர்களுக்குப் போதிய தூக்கம் இல்லை என்பதே உண்மை. ஒருவேளை நீங்கள் குறைவான நேரம் தூங்குகிறீர்கள், அல்லது இரவு தாமதமாகப் படுக்கிறீர்கள், அல்லது குறட்டை போன்ற ஏதேனும் ஒரு பிரச்சனை காரணமாக உங்களுக்குப் போதுமான தூக்கம் கிடைக்கவில்லை. போதிய தூக்கம் இல்லாததால்தான், அலாரம் ஒலித்தாலும் நம்மால் எழ முடியாமல் மீண்டும் மீண்டும் 'ஸ்னூஸ்' செய்கிறோம்.

இந்தப் பிரச்சனையை சரிசெய்ய 5 எளிய வழிகள்:

தேவையான தூக்கம்: ஒரு நாளைக்குக் கட்டாயம் 7 முதல் 8 மணி நேரம் தூங்குவதை உறுதி செய்யுங்கள். நல்ல தூக்கம் இருந்தால், 'ஸ்னூஸ்' செய்யும் அவசியமே இருக்காது.

ஒரே ஒரு அலாரத்தில் எழுந்து பழகுங்கள். முடிந்தவரை 'ஸ்னூஸ்' பொத்தானைத் தவிர்த்து விடுங்கள்.

தினமும் ஒரே நேரத்தில் எழுந்திருக்கப் பழகுங்கள். தினமும் ஒரு குறிப்பிட்ட நேரத்தில் எழுந்து பழக்கப்படுத்தினால், இந்த பிரச்சனை இருக்காது.

எழுந்தவுடன் உடனே ஜன்னலைத் திறந்து, சூரிய வெளிச்சம் கண்களில் படும்படி நில்லுங்கள். இது மெலடோனின் அளவைக் குறைத்து, சுறுசுறுப்பைக் கொடுக்கும். லேசான உடற்பயிற்சிகள் அல்லது ஸ்ட்ரெச்சிங் செய்வதும் நல்லது.

தூங்குவதற்கு முன் மொபைல் போன் பார்ப்பதைத் தவிர்க்கவும். இது தூக்கத்தின் தரத்தைக் குறைக்கும்.

இந்த ஐந்து விஷயங்களைக் கடைப்பிடித்தால், நீங்கள் 'ஸ்னூஸ்' பொத்தானை அழுத்த வேண்டிய அவசியமே இருக்காது. நல்ல தூக்கம் கிடைக்கும், காலையில் சரியான நேரத்தில் சுறுசுறுப்பாக எழுந்து உங்கள் வேலைகளைக் கவனிக்கலாம். இந்த வழிமுறைகளைப் பின்பற்றிப் பாருங்கள், உங்கள் தூக்கத்தின் தரம் கட்டாயம் மேம்படும்.