தாயின் வயிற்றில் குழந்தை எப்படி சுவாசிக்கிறது?

தாய்மை என்பது ஒவ்வொரு பெண்ணுக்கும், மிகவும் மகிழ்ச்சியான தருணம். இருப்பினும் அது அவ்வளவு சுலபமானதும் இல்லை. விடாத வாந்தி, தலைச்சுற்றல், குமட்டல், சோர்வு என இந்நாளில் கர்ப்பிணிகள் உடல் ரீதியாக பல சிக்கல்களை சந்திக்கின்றனர். கர்ப்ப காலத்தில், ஒரு பெண்ணின் உடல் பல மாற்றங்களுக்கு உட்படுகிறது.

இப்படி பல விஷயங்கள் இருந்தாலும் தாயின் வயிற்றில் இருக்கும் போது, குழந்தை எப்படி சுவாசிக்கிறது என்பது உங்களுக்கு தெரியுமா?

வயிற்றில், கருவில் இருக்கும் குழந்தை சுவாசத்தில் ஈடுபடாது, பிறந்த பிறகு அதை நாம் புரிந்துகொள்கிறோம் என்று மகப்பேறியல் மற்றும் மகளிர் மருத்துவர் காயத்ரி தேஷ்பாண்டே கூறினார்.

மாறாக, குழந்தையின் ஆக்ஸிஜன் சப்ளை தாயின் ரத்த ஓட்ட அமைப்பு மூலம் வழங்கப்படுகிறது.

கர்ப்ப காலத்தில் உருவாகும் நஞ்சுக்கொடி, தாயை தொப்புள் கொடி வழியாக குழந்தையுடன் இணைக்கும் ஒரு சிறப்பு உறுப்பு மூலம் செயல்முறை எளிதாக்கப்படுகிறது, என்று டாக்டர் தேஷ்பாண்டே கூறினார்.

எனவே, தாய்  மூச்சை உள்ளிழுக்கும்போது, ​​ஆக்ஸிஜன் அவரது நுரையீரல் வழியாக அவரது ரத்த ஓட்டத்தில் உறிஞ்சப்படுகிறது. இந்த ஆக்ஸிஜனேற்றப்பட்ட ரத்தம் நஞ்சுக்கொடியை நோக்கி செலுத்தப்படுகிறது.

நஞ்சுக்கொடி இடைமுகத்தில், தாயின் ரத்தத்திலிருந்து ஆக்ஸிஜன் மற்றும் பிற முக்கிய ஊட்டச்சத்துக்கள் ஒரு மெல்லிய சவ்வைக் கடந்து குழந்தையின் ரத்த ஓட்டத்தில் நுழைகின்றன, பின்னர் அது தொப்புள் கொடி வழியாக குழந்தைக்கு கொண்டு செல்லப்படுகிறது, என்று டாக்டர் தேஷ்பாண்டே விவரித்தார்.

மகப்பேறு மற்றும் மகளிர் மருத்துவர் ரஷ்மி வர்ஷ்னி குப்தா, கர்ப்பத்தின் மூன்றாவது வாரத்தில் குழந்தையின் நுரையீரல் கருப்பைக்குள் வளர ஆரம்பிக்கிறது என்று குறிப்பிட்டார்.

16 வது வாரத்தில், நுரையீரல் பொதுவாக வளர்ந்துவிடும். நுரையீரலின் நுண்குழாய்கள் விரைவாக விரிவடைந்து, அவற்றின் காற்றுப்பாதைகள் நீட்டிக்கப்படுவதன் மூலம் அவை தொடர்ந்து வளர்கின்றன. இதைச் செய்வதன் மூலம் நுரையீரல் ஆக்ஸிஜன் மற்றும் கார்பன் டை ஆக்சைடைப் பரிமாறிக் கொள்ளக் கற்றுக்கொள்ள முடியும், என்று டாக்டர் குப்தா கூறினார்.

இந்த நேரத்தில், குழந்தையின் நுரையீரல் அம்னோடிக் திரவத்தில் (amniotic fluid) மூழ்கியுள்ளது. சுவாரஸ்யமாக, நுரையீரலின் சரியான வளர்ச்சி மற்றும் பெரிதாக்கும் திறன் அம்னோடிக் திரவத்தைச் சார்ந்தது. 10 மற்றும் 11வது வாரங்களில், குழந்தை நுண்ணிய அளவு அம்னோடிக் திரவத்தை உள்ளிழுக்கத் தொடங்குகிறது, என்று டாக்டர் குப்தா பகிர்ந்து கொண்டார்.

முதிர்ந்த கரு சுவாசம் போன்ற இயக்கங்களைச் செய்கிறது, அதன் நுரையீரலை விரிவுபடுத்துகிறது மற்றும் சுருக்குகிறது.

இது நுரையீரல் முதிர்ச்சிக்கு பங்களிக்கிறது. இந்த உள்ளிழுத்தல், விழுங்குவதைப் போலவே செயல்படுகிறது, நுரையீரலின் மேலும் வளர்ச்சிக்கு உதவுகிறது, டாக்டர் குப்தா சுட்டிக்காட்டினார்.

இருப்பினும், வாயுக்களின் உண்மையான பரிமாற்றம் ஆக்ஸிஜனை எடுத்துக்கொள்வது மற்றும் கார்பன் டை ஆக்சைடு வெளியிடுவது ஆகியவை குழந்தையின் நுரையீரலில் பிறக்கும் வரை தொடங்குவதில்லை என்று டாக்டர் தேஷ்பாண்டே குறிப்பிட்டார்.

ஆனால் கடைசி மூன்று மாதங்களில், நாம் ‘சுவாசத்துடன்’ தொடர்புபடுத்தும் நுரையீரலின் சுருக்கம் மற்றும் விரிவாக்கம் போன்ற இயக்கங்களை குழந்தை பயிற்சி செய்ய ஆரம்பிக்கும். உலகிற்கு கொண்டு வரப்படுவதற்கு முன், குழந்தை பொதுவாக குறைந்தது நான்கு வாரங்களுக்கு சுவாசத்தை பயிற்சி செய்கிறது என்று டாக்டர் குப்தா குறிப்பிட்டார்.

குழந்தை பிறந்து அதன் முதல் சுவாசத்தை எடுக்கும்போது, ​​அழுகை நுரையீரலில் இருந்து திரவத்தை அகற்ற உதவுகிறது, அது சுதந்திரமாக செயல்பட அனுமதிக்கிறது, ஒவ்வொரு அடுத்தடுத்த சுவாசத்திலும் காற்றில் இருந்து ஆக்ஸிஜனை உறிஞ்சுகிறது. இந்த முக்கிய மாற்றம் குழந்தையின் சுதந்திரமான இருப்புக்கான முதல் படிகளைக் குறிக்கிறது என்று டாக்டர் தேஷ்பாண்டே குறிப்பிட்டார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“