சொரியாசிஸ் பிரச்னை குணமாக… இந்த மரத்தின் இலைகளை இப்படி யூஸ் பண்ணுங்க; டாக்டர் நித்யா

நீண்டகால சரும நோய்களான சொரியாசிஸ், பூஞ்சைத் தொற்று, தீராத பொடுகு மற்றும் தொடர்புடைய மூட்டு வலி போன்றவற்றுக்கு சித்த மருத்துவத்தில் எளிய மற்றும் பயனுள்ள தீர்வுகள் உள்ளதாக சித்த மருத்துவர் டாக்டர் நித்யா தெரிவித்துள்ளார். உணவு முறை மாற்றங்கள் முதல் வீட்டிலே தயாரிக்கக்கூடிய தைலங்கள் வரை பல்வேறு வழிமுறைகளை அவர் தனது யூடியூப் வீடியோவில் விரிவாகப் பகிர்ந்துள்ளார்.

சொரியாசிஸ் (காலாஞ்சக படை அல்லது செதில் உதிர்நோய்) என்பது தலையிலிருந்து கால் வரை உடலில் எங்கும் ஏற்படக்கூடிய ஒரு நாள்பட்ட சருமப் பிரச்னையாகும்.

ஸ்கால்ப் சொரியாசிஸ்: தலையில் ஏற்படும் சொரியாசிஸ் பெரும்பாலும் பொடுகு என்று தவறாகப் புரிந்துகொள்ளப்படுகிறது. ஆனால், இது தொடர்ந்து செதில் செதிலாக உதிர்ந்து கொண்டே இருக்கும்.

பல்மா / பிளாண்டர் சொரியாசிஸ்: உள்ளங்கைகள் மற்றும் உள்ளங்கால்களில் ஏற்படும் இந்தப் பிரச்னை, வெடிப்பு வெடிப்பாக, சில சமயங்களில் லேசான ரத்தக் கசிவுடன் இருக்கும். சிலருக்கு உடல் முழுவதும் வட்ட வடிவ காய்கள் போல (காயின் ஷேப் லீசியன்) பரவும். இது இளஞ்சிவப்பு நிறத்தில் தொடங்கி உடல் முழுவதும் பரவும்.

பஸ்டுலார் சொரியாசிஸ்: இது சிறிய கொப்புளங்கள் சீழ் கோர்த்து, அதிக வலியையும், எரிச்சலையும் தரக்கூடிய தீவிரமான ஒரு வகையாகும்.

சொரியாட்டிக் ஆர்த்ரைடிஸ்: நீண்ட காலமாக சொரியாசிஸ் இருந்தால், மூட்டு வலி (காலாஞ்சக வாதம்) ஏற்படும் அபாயம் உள்ளது.

சித்த மருத்துவத்தில் சிகிச்சை மற்றும் தடுப்பு முறைகள்:

டாக்டர் நித்யா, சரும நோய்களைக் குணப்படுத்தவும், தடுக்கவும் உதவும் முக்கிய வழிமுறைகளைப் பட்டியலிட்டார்.

புளிப்பான உணவுகள் (எலுமிச்சை, சிட்ரஸ் பழங்கள்), அதிக புளி சேர்த்த உணவுகள், கடல் உணவுகள் மற்றும் அசைவ உணவுகளைத் கண்டிப்பாகத் தவிர்க்க வேண்டும். ரசாயனங்கள் நிறைந்த சோப்புகள் மற்றும் பாடி லோஷன்களைத் தவிர்த்து, நலங்கு மாவைப் பயன்படுத்தலாம்.

வெட்பாலை தைலம்: சித்த மருத்துவத்தில் மிகவும் சிறப்பானதாகக் கருதப்படும் வெட்பாலை தைலம், பூஞ்சைத் தொற்று, சொரியாசிஸ் மற்றும் தீராத பொடுகு போன்றவற்றுக்கு மிகவும் பயனுள்ளதாக இருக்கும். கருஞ்சீரகம், வேப்ப விதைகள் மற்றும் வெட்பாலை இலைகளைக் கொண்டு சூரிய புடத்தில் தயாரிக்கப்படும் சிறப்பு வெட்பாலை தைலம், இரத்தத்தைச் சுத்திகரித்து சருமப் பிரச்னைகளைக் குணப்படுத்தும் சக்தி கொண்டது.

பரங்கிப்பட்டை ரசாயனம், பரங்கிப்பட்டை பதங்கம் போன்ற சித்த மருந்துகள் பயன்படுத்தப்படுகின்றன. குறிப்பாக, ரத்த சுத்தி கஷாயம் மற்றும் ரத்தசுத்தி சூரணம் போன்ற மருந்துகள் ரத்தத்திலுள்ள கழிவுகளை வெளியேற்றி, சருமநோய்களை குணப்படுத்த உதவும். சொரியாட்டிக் ஆர்த்ரைடிஸ் (வாத நோய்) இருந்தால், அஷ்வகந்தா, தண்ணீர் விட்டான் கிழங்கு, கிராம்பு (லவங்கம்) சார்ந்த மருந்துகள் உள்ளுக்கு எடுத்துக் கொள்வதன் மூலம் வாதத்தைக் குறைக்கலாம் என்கிறார் டாக்டர் நித்யா.

நீண்டகால சருமப் பிரச்னைகளால் அவதிப்படுபவர்கள், உரிய மருத்துவ ஆலோசனைகளைப் பெற்று, சரியான மருத்துவச் சிகிச்சையைப் பெறுவதன் மூலம் நிரந்தரத் தீர்வுகளைக் காணலாம்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.