எண்ணெய் பிடிக்காத மொறுமொறு பூரி வேணுமா? மாவு பிசையும் போது இதை சேர்க்க மறக்காதீங்க- செஃப் டிப்ஸ்

சில நேரங்களில், மிக எளிமையான உணவுகளே பர்ஃபெக்டாக சமைக்க மிகவும் கடினமாக இருக்கும். பூரி அதற்கு ஒரு சிறந்த எடுத்துக்காட்டு. பார்ப்பதற்கு மிகவும் எளிமையாகத் தோன்றினாலும், அதைச் சமைப்பவர்களுக்குத் தெரியும், சரியான பஃப், மொறுமொறுப்பான பொன்னிற பூரி சமைப்பது எவ்வளவு கடினம் என்று.

மகாராஷ்டிராவில் உள்ள கோர்ட்யார்ட் பை மேரியட் மஹாபலேஷ்வர் உணவகத்தின் துணைத் தலைமைக் சமையல் கலைஞர் சுஷாந்த் கோர்படே, "பல ஆண்டுகளாக, தொழில்முறை மற்றும் வீட்டு சமையலறைகளில் எண்ணற்ற மாற்றங்களையும் நுட்பங்களையும் நான் பரிசோதித்திருக்கிறேன். ஒரு ரகசியம் தொடர்ந்து சிறப்பான பலனைத் தருகிறது என்றால், அது ரவை தான்" என்று இந்தியன் எக்ஸ்பிரஸ் இணையதளத்திடம் கூறினார்.    

"இந்த எளிய சமையலறைப் பொருள் உங்கள் பூரியை சாதாரண நிலையில் இருந்து உயர்ந்த நிலைக்கு உயர்த்தும். ரவை குறைந்த எண்ணெயை உறிஞ்சுகிறது மற்றும் மாவுக்கு ஒரு அழகான டெக்ஸ்ட்சரை அளிக்கிறது. இதனால் பூரி தட்டையாகவோ அல்லது எண்ணெய் பசையுடனோ இருக்காது. அதற்கு பதிலாக, அது லேசான, மொறுமொறுப்பான சுவையைக் கொடுக்கும், அது உங்களை மேலும் சாப்பிடத் தூண்டும்," என்று அவர் விளக்கினார்.

நன்றாகப் பிசையும்போது, ரவை மாவிற்குள் நீராவி நன்றாகச் சேர உதவுகிறது, இதன் விளைவாக பூரி அழகாக உப்பி வரும். இது நாம் விரும்புவது போன்ற பூரியை தரும்.

ஒரு கப் கோதுமை மாவுக்கு, 1 முதல் 2 தேக்கரண்டி வரை நன்றாக அரைத்த ரவையைச் சேர்க்க அவர் பரிந்துரைத்தார். உங்கள் விருப்பத்தைப் பொறுத்து அளவை மாற்றிக்கொள்ளலாம். மொறுமொறுப்பாக வேண்டுமென்றால் கொஞ்சம் அதிகமாகவும், நடுவில் மென்மையாக வேண்டுமென்றால் கொஞ்சம் குறைவாகவும் சேர்த்துக்கொள்ளலாம்.

மாவு மென்மையாக ஆனால் கெட்டியாக வரும் வரை பிசையவும். உருட்டுவதற்கு முன் குறைந்தது 15-20 நிமிடங்கள் வரை ஊற வைக்கவும். "எப்போதும் சூடான எண்ணெயில் பொரிக்கவும் - புகை வரும் அளவுக்கு சூடாக இருக்கக்கூடாது, ஆனால் எண்ணெய் பளபளப்பாக இருக்க வேண்டும்," என்று அவர் அறிவுறுத்தினார்.

சத்தான மற்றும் எண்ணெய் இல்லாத பூரிக்கு சில குறிப்புகள்:

பிரபல சமையல் கலைஞர் அனன்யா பானர்ஜி பூரியை ஆரோக்கியமானதாகச் செய்வது எப்படி என்று சில குறிப்புகளை வழங்கினார்.
நார்ச்சத்து மற்றும் சிறந்த ஊட்டச்சத்துக்காக முழு கோதுமை மாவைப் பயன்படுத்தவும்.

மாவு இறுக்கமாக இருக்க வேண்டும் - மிகவும் மென்மையாக இருக்கக்கூடாது. மென்மையான மாவு அதிக எண்ணெயை உறிஞ்சும்.
உருட்டும்போது உலர்ந்த மாவைப் பயன்படுத்த வேண்டாம். அதற்கு பதிலாக, உங்கள் சப்பாத்திக் கட்டையில் லேசாக எண்ணெய் தடவவும் அல்லது குறைந்த எண்ணெயைப் பயன்படுத்தவும்.

செரிமானத்திற்காக ஒரு சிட்டிகை ஓமம் அல்லது சீரகம் சேர்க்கவும்.
பொரித்த பிறகு, அதிகப்படியான எண்ணெயை அகற்ற பூரியை பேப்பர் டவல் அல்லது எவர்சில்வர் ஸ்டாண்டில் வைக்கவும்.

Read in English: Won’t turn out flat or greasy’: This kitchen staple is the secret to crispy, fluffy puris