தொப்பை இருந்தாலும் ஸ்லிம்மா தெரியலாம்; இப்படி புடவை கட்டி பாருங்க!

புடவை கட்டுவது என்பது நம் பாரம்பரியத்தின் ஒரு அங்கம். ஆனால், பலருக்கு புடவை கட்டும்போது ஒரு தயக்கம் இருக்கும், குறிப்பாக தொப்பை தெரிந்துவிடுமோ என்ற பயம். இந்த அச்சம் காரணமாகவே பலர் புடவை கட்டிப் பார்ப்பதைக்கூடத் தவிர்த்துவிடுகிறார்கள். ஆனால், தொப்பையை அழகாக மறைத்து, ஸ்டைலாக புடவை கட்ட சில சூப்பர் டிப்ஸ்கள் உள்ளன. 

பிளவுஸ் லெந்த்தை மாற்றுங்கள்

பெரும்பாலான பெண்கள் செய்யும் ஒரு தவறு, மிகக் குட்டையான பிளவுஸை அணிவதுதான். இது தொப்பையை மேலும் எடுத்துக்காட்டும். பழைய திரைப்படங்களில் நடித்த நடிகைகளான காஞ்சனா, சாவித்திரி போன்றோரின் ஸ்டைலை நீங்கள் பார்த்திருந்தால், அவர்கள் அணிந்த பிளவுஸ்கள் நீளமாக இருக்கும். அது அவர்களின் உடல் அமைப்புக்கு மேலும் அழகைக் கொடுத்திருக்கும்.

இதேபோல், நீங்களும் சற்று நீளமான பிளவுஸைத் தைக்கலாம். இது பழைய ஃபேஷன் என்று எண்ண வேண்டாம். இப்போது நீளமான பிளவுஸ்களிலும் லேஸ், ஃப்ரில்ஸ், எம்பிராய்டரி போன்ற பல டிசைன்கள் வந்துவிட்டன. இவை தொப்பையை மறைப்பதுடன், ஒரு புதுமையான தோற்றத்தையும் கொடுக்கும்.

ப்ளீட்ஸ்கள் மீது கவனம் செலுத்துங்கள்

பக்கவாட்டில் ப்ளீட்ஸ்:

புடவையின் ப்ளீட்ஸ்களை முன்புறம் நடுவில் வைப்பதற்குப் பதிலாக, சற்றுப் பக்கவாட்டில் டக் செய்யுங்கள். இது வயிற்றுப் பகுதியை மறைப்பதுடன், உடலுக்கு ஒரு அழகான வடிவத்தையும் கொடுக்கும்.

குறைவான ப்ளீட்ஸ்:

அதிக ப்ளீட்ஸ்களை வைக்கும்போது, வயிற்றுப் பகுதியில் வீக்கம்போல் தோன்றும். இதற்குப் பதிலாக, குறைவான ப்ளீட்ஸ்களை அழகாக அமைத்தால், புடவை எடுப்பாகவும், தொப்பை மறைந்தும் இருக்கும். மேலும், புடவையின் முந்தானையைத் தாராளமாகப் பயன்படுத்திக்கொள்ளலாம்.

புடவை கட்டும் முறை

புடவையை மிகத் தாழ்வாகவோ அல்லது மிக உயரமாகவோ கட்டுவதைத் தவிர்த்து, சரியான உயரத்தில் கட்டுங்கள். உங்கள் தொப்புளுக்கு நேராக புடவையை டக் செய்வது சரியானதாக இருக்கும். இப்படிச் செய்வதால், புடவை உங்களை இறுக்கிப் பிடிப்பது போன்ற உணர்வு ஏற்படாது.

கவனத்தை திசை திருப்புங்கள்

தொப்பையின் மீது எல்லோரின் கவனமும் செல்லாதபடி, மற்ற பகுதிகளில் ஹைலைட் செய்யுங்கள்.

பிளவுஸ் டிசைன்கள்: உங்கள் பிளவுஸை ஹெவியான எம்பிராய்டரி, லேஸ் வேலைப்பாடுகள், வித்தியாசமான ஸ்லீவ் டிசைன்களான பெல் ஸ்லீவ்ஸ் அல்லது பல்லூன் ஸ்லீவ்ஸ் போன்றவற்றைக் கொண்டு தைக்கலாம்.

நகைகள்: கண்கவர் நெக்லெஸ், காதணிகள் அல்லது நெற்றிச் சுட்டி போன்ற அணிகலன்களை அணிவதன் மூலம், கவனம் உங்கள் முகத்தின் மீதும், பிளவுஸின் மீதும் திரும்பும்.

சரியான துணி வகையைத் தேர்ந்தெடுங்கள்

மெல்லிய, உடலுடன் ஒட்டிக்கொள்ளும் புடவைகளைத் தவிர்ப்பது நல்லது. அதற்குப் பதிலாக, சற்றுத் தடிமனான ஃபேப்ரிக் கொண்ட புடவைகளைத் தேர்ந்தெடுக்கலாம்.

தேர்ந்தெடுக்க வேண்டியவை: ஆர்கன்சா, க்ரேப், கனகாம்பரம் பட்டு, பனாரஸ், பிராகேட் போன்ற துணி வகைகள் உடலை ஒட்டாமல், தொப்பையை மறைக்க உதவும்.

தவிர்க்க வேண்டியவை: நெட், ஷிஃபான், ஜார்ஜெட் போன்ற துணி வகைகள் உடலை ஒட்டி, தொப்பையை வெளிப்படையாகக் காட்டும்.

பலவித ஸ்டைல்கள்

சாரி கட்டுவதில் பலவித ஸ்டைல்கள் உள்ளன. தொப்பையை மறைக்க இந்த ஸ்டைல்களை முயற்சி செய்யலாம்.

ஃப்ரீ பல்லு (Free Pallu): புடவையின் முந்தானையை மடித்து வைப்பதற்குப் பதிலாக, அதைத் தளர (free) விட்டுவிடுவது. இது பார்ப்பதற்கு ஸ்டைலாகவும், நாகரிகமாகவும் இருக்கும். அதேசமயம், இது உங்கள் தொப்பையை மறைக்கவும் உதவும்.ரஃபிள் சாரீஸ் (Ruffle Sarees): ரஃபிள் சாரீஸ் பார்ப்பதற்கு மிகவும் ஃபேஷனாகவும், ஸ்டைலாகவும் இருக்கும். இதில் உள்ள அடுக்கடுக்கான ரஃபிள்கள் உங்கள் வயிற்றுப் பகுதியை மறைக்க உதவும்.

கார்செட் பிளவுஸ் (Corset Blouse): இது நீளமாகவும், உடலோடு ஒட்டியும் இருக்கும். இது உங்கள் உடலை இறுக்கமாகப் பிடித்து, தொப்பையை மறைப்பதுடன், ஒரு அழகான தோற்றத்தையும் கொடுக்கும்.

தொப்பை என்பது உடலின் ஒரு பகுதிதான். அதனை மறைத்து, அழகான புடவைகளை அணிவது உங்கள் விருப்பம். இந்த டிப்ஸ்களைப் பின்பற்றி, உங்களுக்கேற்ற ஸ்டைலைக் கண்டறிந்து, தைரியமாக சாரி கட்டி மகிழுங்கள்!