வானில் சறுக்கும் சிறு தேவதைகள் 'சுகர் கிளைடர்ஸ்'... ஓர் அரிய செல்லப்பிராணி!

சிறுவர்கள் முதல் பெரியவர்கள் வரை பலருக்கும் செல்லப்பிராணிகள் வளர்ப்பது அலாதி இன்பம். பூனைகள், நாய்கள், மீன்கள், பறவைகள் எனப் பல செல்லப் பிராணிகளை நாம் அறிந்திருப்போம். ஆனால், நீங்கள் எப்போதாவது சுகர் கிளைடர்ஸ் (Sugar Gliders) என்ற அரிய மற்றும் அழகான விலங்குகளைப் பற்றி கேள்விப்பட்டிருக்கிறீர்களா?

ஆஸ்திரேலியா, இந்தோனேசியா மற்றும் நியூ கினியா போன்ற வெப்பமண்டலக் காடுகளை பூர்வீகமாகக் கொண்ட இந்த சிறிய பாலூட்டிகள், அவற்றின் தனித்துவமான அம்சங்களால் சமீபகாலமாக உலகெங்கிலும் உள்ள செல்லப்பிராணி பிரியர்களின் கவனத்தை ஈர்த்து வருகின்றன.

சுகர் கிளைடர்கள், கங்காரு மற்றும் வாலபிகளைப் போலவே, மார்சுபியல்ஸ் (Marsupials) வகையைச் சேர்ந்தவை. அதாவது, பெண் சுகர் கிளைடர்கள் தங்கள் குட்டிகளை வளர்க்க சிறப்புப் பை (pouch) கொண்டிருக்கும். ஆனால், இவற்றுக்கு "கிளைடர்ஸ்" என்ற பெயர் வரக் காரணம் என்ன தெரியுமா? இவை தங்கள் முன் மற்றும் பின் கால்களுக்கு இடையில் உள்ள ஒரு மெல்லிய சவ்வு (patagium) மூலம் மரங்களுக்கு இடையே 50 மீட்டர் தூரம் வரை சறுக்கிச் செல்லக்கூடிய (glide) அற்புதமான திறனைக் கொண்டுள்ளன. பறக்கும் அணில்களைப் போலவே இவை காற்றில் சறுக்கிச் செல்லும் அழகிய காட்சியைக் காண்பது ஒரு கண்கொள்ளாக் காட்சியாகும்.

சுகர் கிளைடர்கள் இரவுநேர விலங்குகள் (Nocturnal). அதாவது, பகலில் நன்கு உறங்கி, இரவில்தான் தங்கள் உணவு தேடும் மற்றும் விளையாடும் செயல்களில் ஈடுபடுகின்றன. இயற்கையான வாழ்விடங்களில் இவை பூச்சிகள், மரச் சாறுகள், பூக்களின் தேன் மற்றும் சில தாவரங்களை உண்கின்றன. இவை மிகவும் சமூக விலங்குகள் என்பதால், தனியாக வாழ்வதை விரும்புவதில்லை. காடுகளில் குழுக்களாகவே வாழ்கின்றன. எனவே, நீங்கள் சுகர் கிளைடர்களை செல்லப்பிராணிகளாக வளர்க்க விரும்பினால், அவற்றை ஜோடியாக அல்லது குழுவாக வளர்ப்பது மிகவும் அவசியம். ஏனெனில், தனிமை இவற்றுக்கு மன அழுத்தத்தையும், உடல்நலக் குறைபாடுகளையும் ஏற்படுத்தும்.

சுகர் கிளைடர்கள் செல்லப்பிராணிகளாக மிகவும் பிரியமானவை. இவை தங்கள் உரிமையாளர்களுடன் இணக்கமாகப் பழகும், விளையாட்டுத் தனமான மற்றும் விசுவாசமான இயல்பு கொண்டவை. மேலும், இவை மிகச்சிறிய விலங்குகள் என்பதால், பராமரிப்புக்கு பெரிய இடம் தேவை இல்லை. ஆனால், ஒரு சுகர் கிளைடரை செல்லப்பிராணியாக வளர்ப்பது என்பது கொஞ்சம் கஷ்டம்தான்.

உணவு: இவற்றுக்கு சரியான ஊட்டச்சத்து கொண்ட உணவு மிகவும் முக்கியம். பழங்கள், காய்கறிகள், உயர்தர புரதச்சத்து மற்றும் சிறப்பு சுகர் கிளைடர் உணவுகள் அடங்கிய சமச்சீர் உணவு அவசியம். கால்சியம், வைட்டமின் D அவற்றின் எலும்பு வளர்ச்சிக்கும் ஆரோக்கியத்திற்கும் இன்றியமையாதவை.

வாழ்விடம்: விசாலமான கூண்டுகள், ஏறுவதற்கும் சறுக்குவதற்கும் வசதியாக கிளைகள் (அ) விளையாட்டுப் பொருட்கள், மற்றும் தூங்குவதற்கு மென்மையான பைகள் அல்லது கூடாரங்கள் அவசியம்.

ஆரோக்கியம்: முறையான பராமரிப்புடன், இவை செல்லப்பிராணிகளாக 9 முதல் 12 ஆண்டுகள் வரை வாழக்கூடியவை. ஆனால், தவறான உணவு அல்லது பராமரிப்பு இவற்றுக்கு கடுமையான உடல்நலப் பிரச்னைகளை ஏற்படுத்தும்.

சுகர் கிளைடர்கள் அவற்றின் தனித்துவமான தோற்றம், சறுக்கும் திறன் மற்றும் அன்பு நிறைந்த இயல்பு காரணமாக பலருக்கும் கவர்ச்சிகரமான செல்லப்பிராணிகளாக இருக்கலாம். ஆனால், இவற்றை வளர்ப்பதற்கு முன், அவற்றின் உணவுத் தேவைகள், வாழ்விடத் தேவைகள் மற்றும் பராமரிப்பு குறித்து முழுமையாகப் புரிந்துகொள்வது அவசியம்.