டிரம்ப் ஒரு மோசமான முதலாளி; மிஸ் யுனிவர்ஸ் அமைப்பில் பணியாற்றிய அனுபவம் பகிர்ந்த நடிகை சுஷ்மிதா

பிரபஞ்ச அழகி சுஷ்மிதா சென், பாலிவுட்டின் முன்னணி நடிகையாக வலம் வருபவர். மிஸ் யுனிவர்ஸ் பட்டம் வென்றது மட்டுமல்லாமல், அமெரிக்க முன்னாள் அதிபர் டொனால்ட் டிரம்ப்புடனும் பணியாற்றியுள்ளார். சமீபத்தில் ஒரு தொலைக்காட்சித் தொடரின் விளம்பர நிகழ்ச்சியில் கலந்துகொண்ட சுஷ்மிதா, டிரம்ப்புடனான தனது பணி அனுபவத்தைப் பற்றிப் பகிர்ந்து கொண்டார்.

2010 முதல் 2012 வரை மிஸ் இந்தியா யுனிவர்ஸ் போட்டியின் உரிமையாளராக சுஷ்மிதா சென் இருந்தார். அந்த காலகட்டத்தில் டிரம்ப் தான் மிஸ் யுனிவர்ஸ் அமைப்பின் உரிமையாளராக இருந்தார். தான் எப்படி இந்த உரிமையைப் பெற்றார் என்பது குறித்து சுஷ்மிதா பேசினார். “நான் அப்போது ஒரு நகைக்கடையில் வேலை செய்து கொண்டிருந்தேன், நிறைய விளம்பரப் படங்களிலும் நடித்துக் கொண்டிருந்தேன். அப்போது மிஸ் யுனிவர்ஸ் அமைப்பிலிருந்து எனக்கு ஒரு அழைப்பு வந்தது. ‘நீங்க மிஸ் இந்தியா யுனிவர்ஸ் உரிமையை எடுத்துக்கிறீங்களா?’ என்று கேட்டார்கள். எனக்கு இது ஒரு கனவு போல இருந்தது!” என்றார்.

சுஷ்மிதாவின் டிரம்ப் குறித்த கருத்து

“இந்த உரிமையை நான் எடுத்தபோது ஒரு கடுமையான ஒப்பந்தத்தில் கையெழுத்திட்டேன். அப்போது அந்த அமைப்பின் உரிமையாளர் டொனால்ட் டிரம்ப். அது எனக்குச் சுலபமான அல்லது மகிழ்ச்சியான அனுபவமாக இருக்கவில்லை,” என்று அவர் கூறினார். மேலும், “டிரம்ப் என் முதலாளி கிடையாது. அப்போது எனக்கு முதலாளியாக இருந்தவர்கள் பாராமுண்ட் கம்யூனிகேஷன்ஸ் மற்றும் மேடிசன் ஸ்கொயர் கார்டன் நிறுவனங்கள் மட்டுமே. நான் டிரம்ப்பின் கீழ் ஒரு உரிமையாளராக மட்டுமே செயல்பட்டேன்,” என்றும் விளக்கினார்.

டிரம்ப்பை சிலமுறை சந்தித்ததாகவும், ஆனால் அவரைப் பற்றி மேலும் பேச மறுத்துவிட்டதாகவும் சுஷ்மிதா தெரிவித்தார். “சிலர் அவர்களின் சாதனைகள் அல்லது அதிகாரத்தால் மட்டும் அல்ல, அவர்கள் எப்படிப்பட்ட மனிதர்கள் என்பதாலும் நம் மனதில் ஒரு தாக்கத்தை ஏற்படுத்துவார்கள். அவர் அப்படிப்பட்டவர்களில் ஒருவர் அல்ல,” என்று டிரம்ப் குறித்து தனது எதிர்மறை கருத்தை வெளிப்படையாகவே தெரிவித்தார்.

பணியிடத்தில் ஏற்படும் மோதல்களைக் கையாளுதல்

சுஷ்மிதா சென் கூறிய இந்த அனுபவம், பணியிடத்தில் உள்ள மோதல்களையும் சிக்கலான உறவுகளையும் எப்படி கையாள்வது என்பது குறித்து சிந்திக்க வைக்கிறது. உடன் பணிபுரிபவர்களுடனோ அல்லது முதலாளியுடனோ ஏற்படும் மோதல்கள், பணியாளர்களின் மனநிலை, செயல்திறன் மற்றும் நிறுவனத்தின் ஒட்டுமொத்த வளர்ச்சிக்குத் தடையாக இருக்கலாம். பணியிடத்தில் ஏற்படும் இத்தகைய எதிர்மறையான சூழலைக் கண்டறிந்து, அதைச் சரிசெய்வது அவசியமாகும்.

பி கனெக்ட் கம்யூனிகேஷன்ஸ் (Bconnect Communications)-ன் தலைமை மனிதவள அதிகாரி நேஹா பஹ்ரி, பணியிடத்தில் எதிர்மறை சூழலைக் கையாள்வதற்கான சில ஆலோசனைகளை இந்தியன் எக்ஸ்பிரஸ் இணையதளத்தில் பகிர்ந்துள்ளார்.

வரையறைகளை உருவாக்குங்கள்: உங்களுடைய தனிப்பட்ட நேரம், ஆற்றல் மற்றும் மன அமைதியைப் பாதுகாக்க, உங்களுடன் பணிபுரியும் நபர்களுடன் தெளிவான எல்லைகளை வகுத்துக்கொள்ளுங்கள். அவர்களின் தேவையற்ற விவாதங்கள் அல்லது எதிர்மறை சூழலில் இருந்து விலகி இருங்கள்.

உங்கள் வேலையில் கவனம் செலுத்துங்கள்: உங்களது கவனத்தையும் ஆற்றலையும் உங்கள் வேலை மற்றும் இலக்குகளின் மீது செலுத்துங்கள். இது, எதிர்மறை எண்ணங்கள் உங்களது செயல்பாட்டைப் பாதிக்காமல் இருக்க உதவும்.

நடைமுறையில் இருங்கள்: உடன் பணிபுரிபவர் எப்படி நடந்துகொண்டாலும், நீங்கள் எப்போதும் நிதானமாகவும், ஒரு தொழில்முறைப் பணியாளராகவும் இருங்கள். வதந்திகள், மோதல்கள் ஆகியவற்றில் இருந்து விலகி, உங்கள் கடமைகளில் கவனம் செலுத்துங்கள்.

ஆதரவைத் தேடுங்கள்: உங்களுடைய மேலாளர்கள் அல்லது நம்பகமான சக ஊழியர்களிடம் உங்கள் கவலைகளைப் பற்றிப் பேசுங்கள். இது உங்களுக்குப் புதிய கண்ணோட்டத்தையும், சிக்கலைக் கையாள்வதற்கான வழிகளையும் அளிக்கும்.

சுய-உதவி: பணிக்கு அப்பால், உங்களது உடல் மற்றும் மன ஆரோக்கியத்தைப் பேணுவதில் கவனம் செலுத்துங்கள். உடற்பயிற்சி, பொழுதுபோக்கு, குடும்பத்துடன் நேரம் செலவிடுதல் போன்ற செயல்பாடுகள், பணியிடச் சிக்கல்களை மறந்து புத்துணர்ச்சி பெற உதவும்.

இந்த செய்தியை ஆங்கிலத்தில் வாசிக்க இந்த இணைப்பை கிளிப்பை செய்யவும்.