மீனாட்சி கோயில் முதல் வண்டியூர் மாரியம்மன் கோயில் வரை... வெறும் 1,400 ரூபாயில் ஒன் டே ட்ரிப்; ஆடி சிறப்புப் பயணம்!

ஆடி மாதம் தொடங்கவுள்ள நிலையில், அம்மன் வழிபாட்டிற்கு உகந்த இந்த மாதத்தில் கோயில்களை தரிசிப்பது சிறப்பு வாய்ந்ததாகக் கருதப்படுகிறது. தமிழகத்தின் தொன்மையான நகரங்களில் ஒன்றான மதுரை, மீனாட்சி அம்மன் கோயிலுக்குப் பெயர் பெற்றது என்றாலும், ஆடி மாதத்தில் சுற்றுவட்டார அம்மன் கோவில்களும் திருவிழாக் கோலத்துடன் காட்சியளிக்கும். இந்த ஆன்மீகச் சிறப்புமிக்க ஆடி மாதத்தைப் பயன்படுத்திக்கொள்ளும் வகையில், தமிழ்நாடு சுற்றுலா மேம்பாட்டுத் துறை (TTDC), மதுரை மற்றும் அதைச் சுற்றியுள்ள முக்கிய அம்மன் கோயில்களை ஒரே நாளில் தரிசிக்கும் சிறப்பு சுற்றுலாப் பேக்கேஜை அறிமுகப்படுத்தியுள்ளது.

உங்கள் ஒரு நாள் ஆன்மிகப் பயணம்:

ஒருநாள் ஆன்மிகப் பயணத்தில், புகழ்பெற்ற 6 அம்மன் கோவில்களை தரிசிக்கும் வாய்ப்பு கிடைக்கும். பக்தர்கள் இந்த கோயில்களில் வழிபட்டு, ஆடி மாதத்தின் ஆன்மீக அதிர்வுகளை முழுமையாக உணர்ந்து கொள்ளலாம்.

மதுரை மீனாட்சி அம்மன் கோயில் உலகப் புகழ்பெற்ற இந்தக் கோயில், தமிழ்க் கட்டிடக்கலையின் தலைசிறந்த எடுத்துக் காட்டாகும். வண்டியூர் மாரியம்மன் கோயில் மதுரை நகரின் மையப்பகுதியில் அமைந்துள்ள இந்த கோயில், தெப்பக்குளத்துடன் கூடிய அழகிய ஆலயம். மடப்புரம் காளியம்மன் கோயில் சக்தி வாய்ந்த காளியம்மனாக வணங்கப்படும் இக்கோயில், பக்தர்களின் மனக்குறைகளை நீக்கும் தலமாகப் பார்க்கப்படுகிறது. விட்டனேரி வெட்டுடையார் காளியம்மன் கோயில் தனித்துவம் வாய்ந்த வழிபாடுகளுக்கும், அம்மனின் உக்கிரமான தோற்றத்திற்கும் பெயர் பெற்றது. தாயமங்கலம் முத்து மாரியம்மன் கோயில் செட்டிநாட்டுப் பகுதியில் அமைந்துள்ள இக்கோயில், வேண்டுதல்களை நிறைவேற்றும் அம்மனாக பக்தர்களால் போற்றப்படுகிறது. ராக்காயி அம்மன் கோயில் அழகர் கோவிலின் துணை தெய்வமாக விளங்கும் ராக்காயி அம்மன், பெருமாள் கோயிலுக்கு வரும் பக்தர்களுக்கும் அருள் பாலிக்கிறார்.

கட்டண விவரங்கள்:

இந்த 6 கோயில்களையும் பேருந்து மூலம் சுற்றிப் பார்ப்பதற்கான கட்டணம் வெறும் ரூபாய் 1,400 மட்டுமே. இந்தக் கட்டணத்தில் குடிநீர் மற்றும் மதிய உணவு ஆகியவை அடங்கும். இது, பக்தர்கள் சிரமமின்றி ஆன்மீகப் பயணத்தை மேற்கொள்ள உதவும்.

முன்பதிவு செய்வது எப்படி?

இந்த ஒருநாள் சுற்றுலாப் பயணத்தில் பங்கேற்க விரும்புவோர், https://ttdconline.com/என்ற தமிழ்நாடு சுற்றுலா மேம்பாட்டுத் துறையின் அதிகாரப்பூர்வ இணையதளம் மூலம் தங்கள் விவரங்களைப் பதிவு செய்து கொள்ளலாம். 1800 4253 1111 என்ற கட்டணமில்லா தொலைபேசி எண்ணை அழைத்தும் முன்பதிவு செய்யலாம்.