இந்த தைலம் தேய்த்து குளிங்க… பகலிலே நட்சத்திரம் பார்க்கலாம்; டாக்டர் ஜெயரூபா

கண் பார்வை மேம்படுத்துவது, அதனுடன் தொடர்புடைய தலைவலி, சைனஸ் போன்ற பிரச்னைகளை சரிசெய்வது குறித்து சில முக்கிய குறிப்புகளை டாக்டர் பிளஸ் யூடியூப் சேனலில் பேசிய டாக்டர் ஜெயரூபா வழங்கியுள்ளார்.

கண் பார்வை குறைவதற்கான காரணங்கள்

தற்போது, குழந்தைகள் முதல் பெரியவர்கள் வரை அனைவரும் நீண்ட நேரம் மொபைல் போன் மற்றும் கம்ப்யூட்டர் மானிட்டர்களைப் பயன்படுத்துகின்றனர். குறிப்பாக, இருட்டில் அதிக நேரம் பார்ப்பது கண் பார்வைக் குறைபாட்டிற்கு முக்கிய காரணமாகிறது. குழந்தைகள் ரீல்ஸ் பார்ப்பது அல்லது உணவு ஊட்டும்போது கூட மொபைல் போனைப் பயன்படுத்துவது அவர்களின் கண் ஆரோக்கியத்தை வெகுவாகப் பாதிக்கிறது என்கிறார் டாக்டர் ஜெயரூபா.

பாரம்பரிய கண் சிகிச்சை முறைகள்

1. தைல குளியல் கண் ஆரோக்கியத்தை மேம்படுத்த சிறந்த வழி, சித்த மருத்துவ முறையான தைல குளியல் (Oil bath) ஆகும்.

பொன்னாங்கண்ணி தைலம்: பொன்னாங்கண்ணி கீரையை அரைத்து, நல்லெண்ணெய்யுடன் சேர்த்து சூடாக்கி தைலமாக காய்ச்ச வேண்டும். இந்த தைலத்தை தலையில் தேய்த்து, சூடான தண்ணீரில் குளிப்பது கண் பார்வைக்கு மிகவும் நல்லது. சைனஸ் பிரச்னை உள்ளவர்களுக்கு சுக்கு (இஞ்சி) தைலம் சிறந்தது. இது சைனஸைக் குறைப்பதுடன் கண் பார்வையையும் மேம்படுத்தும்.

2. பஞ்சகற்ப முறை: வேம்பு, கடுக்காய், நெல்லிக்காய், கஸ்தூரி மஞ்சள் மற்றும் மிளகு ஆகிய 5 பொருட்களைப் பொடி செய்து, காய்ச்சாத பசும்பாலுடன் கலந்து தலைக்கு தேய்த்து குளிக்கலாம். இது சைனஸ், ஒற்றைத் தலைவலி மற்றும் அடிக்கடி வரும் தலைவலியை சரிசெய்யும்.

3. நேத்ர பூண்டு தைலம்: நேத்ர பூண்டை அரைத்து, நல்லெண்ணெய்யுடன் சேர்த்து காய்ச்சி, அந்த தைலத்தை தலைக்கு தேய்த்து வருவதன் மூலம் கண் பார்வை தெளிவாகும்.

கண்களுக்கான பயிற்சிகள் & உணவுமுறை

ஒவ்வொரு 20 நிமிடங்களுக்கு ஒருமுறை, கணினியை விட்டுவிட்டு, தூரத்தில் உள்ள ஒரு பொருளை (உதாரணமாக, சுவர்) 20 வினாடிகள் பார்ப்பது அவசியம். வைட்டமின் சி நிறைந்த உணவுப் பொருட்கள் கண் ஆரோக்கியத்திற்கு மிகவும் உதவும். குழந்தைகளுக்கு எண்ணெய் குளியலை வழக்கமாக்க வேண்டும். மேலும், அவர்களின் உணவில் பொன்னாங்கண்ணி கீரை, கேரட் மற்றும் பப்பாளி போன்றவற்றைச் சேர்ப்பது கண் பார்வையை மேம்படுத்தும் என்கிறார் டாக்டர் ஜெயரூபா.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.