அடடே! இப்படி தூங்கினால் சீக்கிரம் வயதாகுமா? நிபுணர் விளக்கம்

உறக்கத்திலிருந்து எழும்போது உங்கள் கன்னங்களில் அல்லது கண்களைச் சுற்றி வீக்கம் போன்ற கோடுகளைப் பார்த்திருக்கிறீர்களா? காலப்போக்கில், இந்தத் தற்காலிகத் தடயங்கள் நிலைக்கத் தொடங்கலாம்.

ஆங்கிலத்தில் படிக்க:

வயதாவதற்கான அறிகுறிகளைக் குறைக்க நாம் பெரும்பாலும் சருமப் பராமரிப்புப் பொருட்கள், சிகிச்சைகள் மற்றும் உணவு முறைகளை நாடுகிறோம். ஆனால், நாம் தூங்கும் விதம், வயதாகும் செயல்முறையை எப்படி விரைவுபடுத்துகிறது என்பது பற்றி மிக அரிதாகவே பேசப்படுகிறது. ஆம், உங்கள் தூங்கும் நிலை நீங்கள் நினைப்பதை விட அதிகமாக உங்கள் முகத்தில் தடயங்களை ஏற்படுத்தக்கூடும்.

காலப்போக்கில், இந்தத் தற்காலிகத் தடயங்கள் சருமத்தின் நெகிழ்ச்சித்தன்மையைப் பாதித்து, முகத்தின் சமச்சீரற்ற தன்மையை ஏற்படுத்தலாம்.

ஒரு குறிப்பிட்ட தூங்கும் நிலை உண்மையிலேயே முன்கூட்டிய சுருக்கங்கள் அல்லது சருமம் தொய்வடைவதற்கு பங்களிக்குமா?

பி.எஸ்.ஆர்.ஐ மருத்துவமனையின் இயன்முறை மருத்துவர் டாக்டர் லக்ஷயா பக்தியானி, இது குறித்துக் கூறுகையில், “சில தூக்க நிலைகள் சருமம் வயதாவதற்கு பங்களிக்கின்றன. ஒருபுறம் அல்லது குப்புறப் படுத்து உறங்குவது, முகத்தை தலையணையில் அழுத்தி, உராய்வையும் அழுத்தத்தையும் ஏற்படுத்தும். காலப்போக்கில், இந்த தொடர்ச்சியான அழுத்தம் ‘தூக்கக் கோடுகள்’ எனப்படும் சுருக்கங்களை உருவாக்கலாம். இவை கன்னங்கள், நெற்றி மற்றும் தாடை போன்ற பகுதிகளில் நிரந்தர சுருக்கங்களாக மாறக்கூடும். ஒருபுறம் சாய்ந்து உறங்குவது ஈர்ப்பு விசையின் காரணமாகச் சருமம் தொய்வடைவதற்கும் பங்களிக்கும், குறிப்பாகத் தாடை மற்றும் கழுத்து பகுதியில் இது நிகழலாம்” என்று விளக்கினார்.

காலையில் ஏற்படும் வீக்கம் அல்லது கோடுகள், தூங்கும் பழக்கத்தால் ஏற்படும் ஆழ்ந்த சரும மாற்றங்களின் அறிகுறிகளா?

காலையில் ஏற்படும் வீக்கமும் கோடுகளும் பொதுவாக தற்காலிகமானவை. இது நீர் தேக்கத்தினாலோ அல்லது தூங்கும் நிலையினால் ஏற்படும் அழுத்தத்தினாலோ உண்டாகிறது.

“இருப்பினும், இந்த நிலை தினமும் நீண்ட நாட்களுக்குத் தொடர்ந்தால், அது சருமத்தின் நெகிழ்ச்சித்தன்மை மற்றும் கொலாஜன் சிதைவில் படிப்படியான நிரந்தர மாற்றங்களுக்கு வழிவகுக்கும். தொடர்ச்சியான வீக்கம், நிணநீர் வடிகால் (lymphatic drainage) குறைபாடு அல்லது வேறு சில உடல்நலப் பிரச்சனைகளையும் குறிக்கலாம். ஆனால் பெரும்பாலான நேரங்களில், இது தூங்கும் போது ஏற்படும் அழுத்தத்தின் விளைவாகவே நிகழ்கிறது” என்று டாக்டர் பக்தியானி குறிப்பிட்டார்.

சருமம் வயதாவதைத் தடுக்க அல்லது குறைக்க எந்த வகையான தலையணைகள், துணிகள் அல்லது தூக்க நிலைகள் உதவும்?

டாக்டர் பக்தியானி கூறுகையில், சரியான தலையணையைத் தேர்ந்தெடுப்பதும், சரியான துணியைப் பயன்படுத்துவதும் உதவும். காட்டன் தலையணைகளைக் காட்டிலும் பட்டு அல்லது சாட்டின் தலையணை உறைகள் சருமத்தில் உராய்வைக் குறைத்து, சுருக்கங்கள் ஏற்படுவதைத் தடுக்கின்றன. எலும்பியல் அல்லது மெமரி ஃபோம் தலையணைகள் (Orthopaedic or memory foam pillows) சிறந்த ஆதரவை அளித்து, முகத்தில் ஏற்படும் அழுத்தத்தைக் குறைக்கின்றன.

“குப்புறப் படுப்பதைத் தவிர்த்து, மல்லாந்த நிலையில் உறங்குவது மிகவும் சிறந்தது. ஏனெனில் இது முகத்தில் அழுத்தம் ஏற்படாமல் பாதுகாக்கும். தலையைச் சற்று உயரமாக வைத்துப் படுப்பதும் கண்களைச் சுற்றி நீர் தேங்குவதைக் குறைத்து, காலை நேர வீக்கத்தைத் தடுக்க உதவும்” என்று அவர் தெரிவித்தார்.

பொறுப்பு துறப்பு: இந்த கட்டுரை பொதுவெளியில் உள்ள தகவல்கள் மற்றும் நிபுணர்களின் கருத்துகளின் அடிப்படையில் எழுதப்பட்டுள்ளது. எந்த ஒரு புதிய பழக்கத்தையும் தொடங்குவதற்கு முன், உங்கள் மருத்துவரை அணுகி ஆலோசனை பெறுவது அவசியம்.