மதுரையில் இப்படி ஒரு கோயிலா?... 6.5 ஏக்கர் பரப்பளவில் ஒரே இடத்தில் 108 சன்னதிகளில் 600+ தெய்வங்கள்!

மதுரை மாவட்டம் திருமங்கலம் அருகே மதுரை-விருதுநகர் தேசிய நெடுஞ்சாலையில், ராயப்பாளையம் செல்லும் வழியில் அமைந்துள்ள சத்ய யுக சிருஷ்டி கோயில் பிரம்மாண்டமான மற்றும் தனித்துவமான ஆன்மிகத் தலமாக விளங்குகிறது.

'முக்தி நிலையம்' என்றும் போற்றப்படும் இக்கோயில், 6.5 ஏக்கர் பரப்பளவில் விரிந்து பரந்திருக்கிறது. இந்தக் கோயில் வெறும் வழிபாட்டுத் தலமாக மட்டுமன்றி, ஆன்மிக உலகத்தின் பல பரிமாணங்களை ஒருங்கே கொண்டுள்ள ஒரு மையமாகப் போற்றப்படுகிறது. 

சத்ய யுக சிருஷ்டி கோயிலின் மிக முக்கியமான சிறப்பம்சம் என்னவென்றால், இங்கு அனைத்து தெய்வங்களின் சந்நிதிகளும் ஒரே வளாகத்தில் அமைந்திருப்பதுதான். 108 சந்நிதிகளில், சுமார் 600-க்கும் மேற்பட்ட தெய்வ சிலைகள் பிரதிஷ்டை செய்யப்பட்டு உள்ளன. பக்தர்கள் தங்களுக்கு விருப்பமான எந்த தெய்வத்தையும் ஒரே இடத்தில் தரிசிக்கும் வாய்ப்பை வழங்குகிறது.

விநாயகர், பிரம்மா, மகாவிஷ்ணு, சிவன், சாய் பாபா,  நவகிரகங்கள், 12-ராசிகள், 27 நவகிரகங்கள், பஞ்சபூதங்கள், இந்திரசபை,
குபேரபட்டினம், யமதர்மராஜா மற்றும் சித்திரகுப்தர், ஐயப்பன், ராகவேந்திரா, கருப்பசாமி, 18 கைகள் கொண்ட ஆதிமஹாலக்ஷ்மி, காமதேனு, மஹாமேரு, ஐராவதம், அஷ்டலட்சுமிகள், சப்தமார்கள், சக்தி தேவிகள், துர்கா, காளி, அன்னபூரணி, ஹயக்ரீவர், தன்வந்திரி, காகபுஜேந்தர் 18 கைகளுடன், பகுலாதேவி, சப்த ரிஷிகள், 18 சித்தர்கள், குண்டலினி சக்தி தேவிகள், பூரி ஜெகன்நாத், ஆறுகள், முக்தி ஸ்துபி, புத்தர், இயேசு, சைவம், வைணவம், சக்தி வழிபாடு, சித்தர்கள், முனிவர்கள், நாக தேவதைகள் என பலதரப்பட்ட வழிபாட்டு மரபுகளின் தெய்வங்கள் பிரதிஷ்டை செய்யப்பட்டுள்ளன. 

12 ஆழ்வார்கள், ரங்கநாதர், விஸ்வசேனர், கருடாழ்வார், பாண்டரங்கன், ஸ்ரீமகாலட்சுமி, 4 வேதங்கள் எனப் பல அரிய பிரதிஷ்டைகளைக் காணலாம். குறிப்பாக, 108 நாக தேவதைகள், நாக கன்னிகள், நாகர்கள் ஆகியோருக்கான தனி உலகம் இங்கு உருவாக்கப்பட்டுள்ளது, இது மிகவும் சிறப்பு வாய்ந்தது. 12 ஜோதிர்லிங்கங்கள், முப்பெருந்தேவியர், 16 கணபதி, அஷ்ட வசுக்கள், அறுபடை முருகன், ஷீரடி சாய்பாபா, திருப்பதி, ஆண்டாள், ரிஷிகள், அஷ்ட லட்சுமியர், தச அவதாரங்கள் என இங்கில்லாத தெய்வ வடிவங்களே இல்லை எனலாம்.

மதுரை - விருதுநகர் தேசிய நெடுஞ்சாலையில், திருமங்கலம் தாண்டி, ராயப்பாளையம் கிராமம் செல்லும் வழியில் அமைந்துள்ளது சத்ய யுக சிருஷ்டி கோயில். திறக்கும் நேரம் காலை 8 முதல் இரவு 7:30 மணி வரை. மதுரை சுற்றியுள்ள பகுதிகளைச் சேர்ந்த பக்தர்கள் மட்டுமின்றி, வெளி மாநிலங்களிலிருந்தும் பலர் இந்த அரிய கோயிலைத் தரிசிக்க வருகை தருகின்றனர். இது ஒரு தனித்துவமான ஆன்மிக அனுபவத்தை வழங்கும் பிரம்மாண்டமான வழிபாட்டுத் தலமாகும்.

இந்த கோயில் வளாகம், பூமியில் உள்ள 7 உலகங்களுக்கும், பூமிக்கு அடியில் உள்ள 7 உலகங்களுக்கும் உரிய அனைத்து கடவுள்களும் அருள் பாலிக்கும் இடமாக கருதப்படுகிறது. இங்குள்ள தெய்வீக அதிர்வலைகள், பிரபஞ்ச சக்தி மற்றும் பிராண சக்தி நிரம்பி வழிகிறது என பக்தர்கள் உணர்கின்றனர்.