திருப்பதி கோவிலில் நவம்பர் மாத திருநட்சத்திர உற்சவங்கள்; தேவஸ்தானம் அறிவிப்பு

திருப்பதி ஏழுமலையான் என்றும் திருப்பதி வெங்கடேசப் பெருமாள் என்றும் பக்தர்களால் வழிபடப்படும் திருப்பதி கோயிலில் நவம்பர் மாத நடைபெற உள்ள திருநட்சத்திர உற்சவங்கள் குறித்து திருமலை திருப்பதி தேவஸ்தானம் அறிவித்துள்ளது. 

திருப்பதி ஏழுமலையான் கோயிலில் நாள்தோறும் ஆயிரக் கணக்கான பக்தர்கள் வந்து சாமி தரிசனம் செய்கின்றனர். திருமலை திருப்பதி ஏழுமலையான் கோவிலில் நவம்பர் 9-ம் தேதி வேதாந்த தேசிகரின் சாற்றுமுறை உட்பட பல முக்கிய ஞானிகள் மற்றும் பக்தர்களின் திருநட்சத்திர உற்சவம் நடைபெறுகிறது.

திருமலை திருப்பதி கோவிலில் உற்சவங்கள், விழாக்கள் என ஆண்டுமுழுவதும் பல திருவிழாக்கள் நடைபெறுகின்றன. பெருமாளுக்கு உகந்த தமிழ் மாதமான புரட்டாசி மாதத்தில், திருப்பதி கோவிலில் பிரம்மோற்சவ விழா வெகு விமரிசையாக நடைபெற்றது. ஏழுமலையானின் தீவிர பக்தர்களின் திருநட்சத்திர நாளிலும் சிறப்பு உற்சவங்கள் மற்றும் விழாக்கள் நடத்தப்படுகின்றன. பல நூற்றாண்டுகளுக்குப் பிறகும் பகவானின் சேவையில் தன்னலமற்ற பங்களிப்பிற்காக ஒவ்வொரு பக்தரும் இன்று வரை போற்றப்படுகிறார்கள்.

அந்த வகையில், இந்த ஆண்டு நவம்பர் மாதம் நடைபெறும் திருநட்சத்திர உற்சவங்கள் குறித்து திருமலை திருப்பதி தேவஸ்தானம் சார்பில் அறிவிப்பு வெளியிடப்பட்டுள்ளது.

அதன்படி, “இன்று (நவம்பர் 3) திருமலை நம்பி சாற்றுமுறை, நவம்பர் 6-ம் தேதி மணவாள மகாமுனிகள் சாற்றுமுறை, அதைத்தொடர்ந்து நவம்பர் 9-ம் தேதி வேதாந்த தேசிகரின் சாற்றுமுறை, அத்ரி மகரிஷி, பிள்ளைலோகாச்சார்ய வர்ஷா, பொய்கை ஆழ்வார், பூதத்தாழ்வார் உட்பட பல முக்கிய ஞானிகள் மற்றும் பக்தர்களின் திருநட்சத்திர உற்சவம் நடைபெறுகிறது. நவம்பர் 10-ம் தேதி பேயாழ்வாரின் வர்ஷ திருநட்சத்திரம், நவம்பர் 11-ம் தேதி ஸ்ரீயாக்ஞவல்கிய ஜெயந்தி விழா நடைபெறும் என தெரிவிக்கப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“