திருப்பதி தெப்பக்குளத்தில் பராமரிப்பு பணிகள் நிறைவு; பக்தர்கள் குளிக்க மீண்டும் அனுமதி

திருப்பதி ஏழுமலையான் கோவில் தெப்பக்குளத்தில் ஒரு மாத காலம் நடைபெற்ற சீரமைப்பு பணிகள் நிறைவடைந்த நிலையில், இன்று (செப்டம்பர் 1) மீண்டும் தெப்பக்குளம் திறக்கப்பட்டது.

திருப்பதி ஏழுமலையான் கோவிலில் அக்டோபர் 4 ஆம் தேதி முதல் வருடாந்திர பிரம்மோற்சவம் கொடியேற்றத்துடன் தொடங்க உள்ளது. ஒவ்வொரு ஆண்டும் பிரம்மோற்சவ விழாவிற்கு முன்னதாக, தெப்பக்குளத்தை சுத்தம் செய்து, பராமரிப்பு பணிகள் மேற்கொள்வது வழக்கம். இதனால் பராமரிப்பு பணிகள் முடியும் வரை தெப்பக்குளம் மூடப்படும்.

இந்த ஆண்டு தூய்மைப் பணி மற்றும் சீரமைப்பு பணிகளுக்காக கடந்த மாதம் 1 ஆம் தேதி திருப்பதி ஏழுமலையான் கோவில் தெப்பக்குளம் (சுவாமி புஷ்கரணி) மூடப்பட்டது. மேலும், தெப்பக்குளத்தில் பக்தர்கள் குளிக்க தடை விதிக்கப்பட்டது.

புஷ்கரணியில் உள்ள தண்ணீர் மின் மோட்டார்கள் மூலம் உறிஞ்சப்பட்டு வெளியேற்றப்பட்டது. சேறுகள் அகற்றப்பட்டு, குப்பைகள் வெளியேற்றப்பட்டன. படிக்கட்டுகள், தடுப்பு கம்பி வேலிகள், தளம் ஆகியவை சீரமைக்கப்பட்டு வர்ணம் பூசப்பட்டது.

ஒரு மாத காலம் நடைபெற்ற தெப்பக்குள பராமரிப்பு பணிகள் நேற்றுடன் (31.08.2024) நிறைவடைந்தன. இதையடுத்து இன்று முதல் (01.09.2024) தெப்பக்குளத்தில் பக்தர்கள் குளிக்க அனுமதி அளிக்கப்படுகிறது.