பூமியில் நீண்ட காலம் வாழும் ஆமைகள்... வயசு மட்டும் கேட்காதீங்க; தலை சுத்திடும்!

மனிதர்களை விட நீண்ட ஆயுளுடன் பூமியில் வாழும் சில உயிரினங்கள் உள்ளன. அதில் சிறந்த உதாரணமாக ஆமைகள் கருதப்படுகின்றன. பெரும்பாலான ஆமைகள் 10 முதல் 80 ஆண்டுகள் வரை வாழும் திறன் கொண்டவை. ஆனால், சில ஆமைகள் நூற்றாண்டுகளுக்கும் மேலாக உயிர் வாழ்ந்துள்ளன என்பது ஆச்சரியமான தகவல். அவை மனிதர்களின் தலைமுறைகளை கடந்தும், இன்னும் உயிருடன் வாழும் சூழ்நிலையில் உள்ளன. அவற்றின் மெதுவான வாழ்க்கைமுறை, வலுவான உடல் அமைப்பு மற்றும் அமைதியான சூழலில் வாழும் இயல்பு இவற்றுக்கு நீண்ட ஆயுளின் ரகசியம் எனலாம்.

இந்த வகையில் உலகம் முழுவதும் பரிசோதனை செய்யப்பட்டு, பதிவாகியுள்ள மிக அதிக வயதுடைய ஆமைகள் குறித்து பார்க்கலாம்:

அலக்பா – 344 வயது

நைஜீரியாவின் ஓக்போமோசோ அரச அரண்மனையில் வாழ்ந்ததாகக் கூறப்படும் அலக்பா என்ற ஆமையின் வயது 344 என்று 2019 இல் தெரிவிக்கப்பட்டது. இதன் உண்மை வயது குறித்து சர்வதேச அளவில் விவாதங்கள் இருந்தாலும், அலக்பாவின் கதைகள் நைஜீரிய பாரம்பரியத்தில் இன்னும் வாழ்கின்றன.

அத்வைதா – 255 ஆண்டுகள் 

இந்தியாவின் கொல்கத்தாவில் உள்ள அலிப்பூர் மிருகக்காட்சிசாலையில் வாழ்ந்த "அத்வைதா" எனும் ஆல்டாப்ரா ராட்சத ஆமையானது, சுமார் 255 ஆண்டுகள் வாழ்ந்ததாகக் கூறப்படுகிறது. காலனித்துவ காலப்பதிவுகள் இதனை 1757ல் இந்தியா வந்ததாகக் கூறுகின்றன. சரியான ஆவணங்கள் இல்லையென்றாலும், அத்வைதாவின் வாழ்நாள் ஒரு வரலாற்று மரபாக மாறியுள்ளது.

ஜோனாதன் – 190+ ஆண்டுகள்

1832 ஆம் ஆண்டு பிறந்ததாக கருதப்படும் ஜோனாதன், தற்போது உலகில் உயிருடன் உள்ள மிக வயதான நில ஆமையாக பதிவு செய்யப்பட்டுள்ளார். செயிண்ட் ஹெலினா தீவில் வசிக்கும் ஜோனாதன், இன்றும் ஆரோக்கியமாக வாழ்ந்து வருகிறார். இவனது வாழ்க்கை கடந்த இருபது தசாப்தங்களாக உலகத் தரப்பில் ஆர்வமூட்டுகிறது.

துய் மலிலா – 189 ஆண்டுகள் 

மடகாஸ்கரின் கதிர்வீச்சு ஆமையாகிய "துய் மலிலா", டோங்காவின் அரச குடும்பத்திற்கு 1777 இல் பரிசாக வழங்கப்பட்டதாக வரலாற்று பதிவுகள் கூறுகின்றன. 1966 இல் இறந்த இவ்விலங்கு 189 வயதாக இருந்ததாக மதிப்பிடப்பட்டது. இன்றும் அதன் உடல் டோங்காவில் காட்சிக்கு வைக்கப்பட்டுள்ளது.

ஹாரியட் – 175 ஆண்டுகள் 

கலபகோஸ் இராட்சத ஆமையாகிய ஹாரியட், சார்லஸ் டார்வின் தனது 1835 பயணத்தின் போது சேகரித்த ஆமையாக நம்பப்படுகிறது. தனது நீண்ட வாழ்க்கையை ஆஸ்திரேலியாவில் கழித்த ஹாரியட், 2006 இல் 175வது வயதில் இறந்தார். இவளது வாழ்க்கை, உலகமுழுதும் பரபரப்பை ஏற்படுத்தியது.

ஆமைகளின் நீண்ட ஆயுளின் ரகசியம்

இந்த ஆமைகள் வெறும் புவியின் பழைய குடிமக்கள் மட்டுமல்ல, அறிவியல் உலகத்திற்கும் மர்மங்களாகத் திகழ்கின்றன. அவற்றின் மெதுவான வாழ்க்கை, மெட்டாபாலிசம், தாக்குதல்களுக்கு குறைந்த வாய்ப்பு ஆகியவை நீண்ட ஆயுளுக்கான காரணமாகக் கருதப்படுகின்றன.

இந்த ஆமைகள் நமக்கு விலங்குகளின் உலகத்தில் சாத்தியமானதைக் காட்டுகின்றன – காலத்தையும் கடந்து வாழும் ஆற்றல் கொண்ட உயிரினங்கள். இவை வாழ்ந்த வருடங்கள், மனிதனின் வாழ்க்கையைப் பார்வையிடும் விதத்தையே மாற்றக்கூடியவை என்பதில் ஐயமில்லை.