தாழ்ந்த கண் இமைகளுக்கு விடை கொடுங்கள்: எளிய பயிற்சிகள் மூலம் தீர்வு

கண்ணாடியில் பார்க்கும்போது உங்கள் கண் இமைகள் தாழ்ந்திருப்பது போல் தெரிகிறதா? ப்டோசிஸ் அல்லது ப்ளெபரோப்டோசிஸ் என்று அழைக்கப்படும் இந்த பொதுவான பிரச்னை வலியற்றதாக இருந்தாலும், காலப்போக்கில் உங்கள் பார்வையை வெகுவாக பாதித்து கழுத்து வலியை ஏற்படுத்தலாம்.

தாழ்ந்த கண் இமைகள் உங்களை சோம்பேறியாகக் காட்டுவதோடு, உங்கள் பார்வையையும் பாதிக்கலாம். இந்த நிலை ஒன்று அல்லது இரண்டு கண்களின் மேல் இமைகளையும் பாதிக்கலாம். ஒரு கண்ணில் மற்றொன்றை விட அதிகமாகவும் இருக்கலாம். தாழ்ந்த இமைகள் பிறப்பிலிருந்தே இருந்தால், அது கான்ஜெனிட்டல் ப்டோசிஸ் என்று அழைக்கப்படுகிறது.

காரணங்கள்

சோர்வு, பரம்பரை, அல்லது நரம்பியல் கோளாறுகள் போன்ற பல காரணங்களால் கண் இமைகள் தாழலாம். லேசிக் அல்லது கண்புரை அறுவை சிகிச்சை கூட ப்டோசிஸ்-க்கு பங்களிக்கக்கூடும். மும்பையில் உள்ள சர் ஹெச்.என் ரிலையன்ஸ் ஃபவுண்டேஷன் மருத்துவமனையின் தோல் நோய் நிபுணர் டாக்டர் சோனாலி கோலி, "கண் இமைகளின் நிலையை பராமரிக்கும் லெவேட்டர் பால்பேப்ரே சுப்பீரியரிஸ் தசை மற்றும் அதன் தசைநார்களின் செயல்பாட்டில் ஏற்படும் அசாதாரணத்தினால் இது ஏற்படுகிறது" என்று கூறுகிறார்.

தாழ்ந்த இமைகளை சரி செய்வது எப்படி?

சிலர் முகப் பயிற்சிகள் அல்லது மசாஜ் சருமத்தை தொங்கச் செய்யக்கூடும் என்று நம்பினாலும், முறையாகச் செய்தால் அவை கொலாஜன் உற்பத்தியை அதிகரித்து, ரத்த ஓட்டத்தை மேம்படுத்துகின்றன. இதனால் ஆரோக்கியமான சருமம் உருவாகிறது. மேலும் அவை முக தசைகளில் உள்ள இறுக்கத்தை தளர்த்துகின்றன, இது ரத்த ஓட்டத்தைத் தடுத்து முகத்தின் தோற்றத்தை சிதைக்கிறது.

டாக்டர் கோலி பரிந்துரைக்கும் சில முக மசாஜ்கள் மற்றும் பயிற்சிகள்:

சூடேற்றம் மற்றும் மசாஜ்:

ரத்த ஓட்டம் மற்றும் நெகிழ்வுத்தன்மையை அதிகரிக்க முதலில் மென்மையான சுத்தம் மற்றும் சூடான ஒத்தடம் கொடுங்கள்.

பயிற்சிக்கு தசைகளைத் தயார் செய்ய இமைகளை மெதுவாக மசாஜ் செய்யுங்கள்.

நேரடி தூண்டுதல்:

கண்களை நகர்த்துவதிலும், சிறிய இமை தசைகளைத் தூண்டுவதிலும் கவனம் செலுத்துங்கள்.

இந்த தசைகளை செயல்படுத்த ஒரு எலக்ட்ரிக் டூத்பிரஷைப் பயன்படுத்தலாம்.

எதிர்ப்புப் பயிற்சி (Resistance Workout):

புருவங்களை உயர்த்தி, அதன் அடியில் ஒரு விரலை வைக்கவும்.

கண்களை மூடுவதற்கு முயற்சிக்கும் அதே நேரத்தில் புருவங்களை சில வினாடிகள் மேலே தூக்கிப் பிடிக்கவும். இது பாரம் தூக்குவது போன்ற எதிர்ப்பை உருவாக்குகிறது.

வேகமாகவும், பலமாகவும் கண்களை இமைப்பதும், கண் உருட்டுவதும் இமை தசைகளை ஈடுபடுத்துகின்றன.

த்ரடகா யோகப் பயிற்சி:

கண்களை சிமிட்டாமல் ஒரு குறிப்பிட்ட பொருளை உற்றுப் பாருங்கள்.

கண்களின் ஒட்டுமொத்த ஆரோக்கியத்திற்காக வடிவமைக்கப்பட்ட இந்த பயிற்சி, மறைமுகமாக இமைகளின் அசைவுகளுக்கும் நன்மை பயக்கும்.