திருப்பதி செல்லும் பக்தர்களுக்கு குட் நியூஸ்... மேலும் 20 கட்டணமில்லா பேருந்து இயக்கம்

திருப்பதியில் செல்லும் பக்தர்களின் போக்குவரத்து வசதிக்காக திருப்பதி மலையில் மேலும் 20 கட்டணமில்லா பேருந்து சேவை அறிமுகம் செய்துள்ளது. தேவஸ்தானத்தின் 12 இலவச பேருந்துகளுடன் கூடுதலாக 20 பேருந்துகள் இயக்கப்படுகின்றன. திருப்பதி மலைக்குள் ஓரிடத்தில் இருந்து மற்றொரு இடத்திற்கு செல்ல இலவச பேருந்து அறிமுகம் செய்யப்பட்டுள்ளது. திருப்பதி-திருமலை இடையே பக்தர்கள் வழக்கம்போல் கட்டணம் செலுத்தி பயணிக்கலாம்.

இது தொடர்பாக திருமலை திருப்பதி தேவஸ்தானத்தின் கூடுதல் செயல் அதிகாரி வெங்கையா சவுத்ரி பேசுகையில், "திருப்பதி திருமலை முழுவதும் பக்தர்களை ஏற்றிச் செல்வதற்காக இலவச பேருந்து சேவையை ஆந்திரப் பிரதேச மாநில சாலைப் போக்குவரத்துக் கழகம் தொடங்குகிறது. தனியார் வாகனங்களின் அதிகப்படியான கட்டணங்களைக் கட்டுப்படுத்தவும், மாசுபாட்டைக் குறைக்கவும் இந்த முயற்சி நோக்கமாகக் கொண்டுள்ளது. 

ஆந்திரப் பிரதேச மாநில சாலைப் போக்குவரத்துக் கழக நிர்வாகத்தின் நேர்மறையான பதில் மற்றும் ஆதரவிற்காக நன்றி. ஆர்.டி.சி பேருந்துகள் ஸ்ரீவாரி தர்ம ரதங்களைப் போலவே அதே வழித்தடங்களில் இயக்கப்படும், திருமலையின் பல்வேறு பகுதிகளுக்கு இடையே பக்தர்களுக்கு இலவச போக்குவரத்தை வழங்கும்." என்றும் அவர் கூறியுள்ளார்.