மஞ்சள் சாப்பிடும் முன் யோசிங்க: சிறுநீரக பாதிப்பு வருமா? ஊட்டச்சத்து நிபுணர் விளக்கம்

இந்திய கலாச்சாரத்தில் மஞ்சள், அதன் மகத்துவத்தால் "தங்க மசாலா" என்று போற்றப்படுகிறது. நமது சுபநிகழ்ச்சிகள் அனைத்திலும் மங்கலப் பொருளாகப் பயன்படுத்தப்படும் மஞ்சள், ஆயுர்வேதத்தின்படி பல நோய்களுக்கு ஒரு மாயாஜால நிவாரணியாகவும் செயல்படுகிறது. அதன் அழற்சி எதிர்ப்பு மற்றும் ஆக்ஸிஜனேற்ற பண்புகள் சிறுநீரக செயல்பாட்டை மேம்படுத்துவதாக பரவலாக நம்பப்படுகிறது. ஆனால், நாம் அறியாத ஒரு மறுபக்கமும் மஞ்சளுக்கு உண்டு. ஆம், சில சமயங்களில் மஞ்சள் சிறுநீரக ஆரோக்கியத்திற்கு பாதகமாகவும் அமையலாம்!

சிறுநீரக ஆரோக்கியத்தில் மஞ்சளின் எதிர்மறை விளைவுகள்

மஞ்சளில் உள்ள அழற்சி எதிர்ப்பு பண்புகள் சிறுநீரக செயல்பாட்டை பராமரிக்க உதவுகின்றன, மேலும் அதன் ஆக்ஸிஜனேற்ற பண்புகள் சிறுநீரக செல்களில் ஆக்ஸிஜனேற்ற அழுத்தத்தால் ஏற்படும் சேதத்தைத் தடுக்கலாம் என்பதில் சந்தேகமில்லை. எனினும், சிறுநீரக ஆரோக்கியத்திற்கு மஞ்சளால் சில எதிர்மறை விளைவுகளும் ஏற்படலாம்.

"மஞ்சளின் முதன்மை கூறான குர்குமின், சிறுநீரில் ஆக்ஸலேட் அளவை உயர்த்தும். இது சிறுநீரக கற்கள் உருவாகும் வாய்ப்பை அதிகரிக்கலாம், குறிப்பாக ஏற்கனவே சிறுநீரக கற்கள் ஏற்படும் அபாயம் உள்ளவர்களுக்கு," என்று உணவு நிபுணரும், நீரிழிவு கல்வியாளருமான கனிக்கா மல்ஹோத்ரா கூறுகிறார். மேலும், மஞ்சளின் இரத்தத்தை மெலிதாக்கும் பண்புகள், இரத்தப்போக்கு கோளாறுகள் உள்ளவர்களுக்கும் அல்லது இரத்தத்தை மெலிதாக்கும் மருந்துகளைப் பயன்படுத்துபவர்களுக்கும் பிரச்சனையாக இருக்கலாம், ஏனெனில் இது அதிக இரத்தப்போக்குக்கு வழிவகுக்கும்.

மஞ்சளை எந்த அளவு உட்கொள்வது நல்லது?

சிறுநீரக கற்களின் பாதிப்பு ஏற்கெனவே உங்களுக்கு இருந்தால் அல்லது அதற்கான ஆபத்து இருந்தால், மஞ்சள் சப்ளிமெண்ட்ஸ் பயன்படுத்துவதற்கு முன் அல்லது உங்கள் மஞ்சள் பயன்பாட்டை கணிசமாக அதிகரிப்பதற்கு முன் ஒரு சுகாதார நிபுணரை அணுகுவது அவசியம்.

"மிதமான அளவுகள் பொதுவாக பாதுகாப்பானதாகக் கருதப்பட்டாலும், அதிக அளவு அல்லது அடர்த்தியான சப்ளிமெண்ட்ஸ் அதிகப்படியான பயன்பாடு எதிர்மறை விளைவுகளின் அபாயத்தை அதிகரிக்கலாம், இதில் சிறுநீரக பிரச்சனைகளும் அடங்கும்," என்று கனிக்கா தெரிவிக்கிறார். இதன் பொருள், சமையலில் பொதுவாகப் பயன்படுத்தப்படும் அளவுகள் பாதகமான விளைவுகளை ஏற்படுத்தும் வாய்ப்பில்லை.

இருப்பினும், பிற உடல்நலப் பிரச்சனைகளுக்காக மஞ்சள் மாத்திரைகளைப் பயன்படுத்த நீங்கள் நினைத்தால், லேபிளில் பரிந்துரைக்கப்பட்ட அளவைப் பின்பற்றுவதை உறுதிப்படுத்திக் கொள்ளுங்கள். பொதுவாக, ஒரு நாளைக்கு 500 முதல் 2000 மி.கி வரையிலான அளவுகள் பரிந்துரைக்கப்பட்டுள்ளன. அப்போதும் கூட, குறைந்த டோஸில் தொடங்கி படிப்படியாக தேவைக்கேற்ப அதிகரிக்க கனிக்கா பரிந்துரைக்கிறார்.

முடிவுரை

மஞ்சள் ஒரு சக்திவாய்ந்த மற்றும் பல்துறை மசாலா என்பதில் சந்தேகமில்லை. ஆனால் அதன் நன்மைகளை முழுமையாகப் பெறவும், சாத்தியமான பக்க விளைவுகளைத் தவிர்க்கவும், விழிப்புணர்வுடன் மிதமாகப் பயன்படுத்துவது அவசியம். குறிப்பாக சிறுநீரக பிரச்சனைகள் உள்ளவர்கள் அல்லது மருந்துகளை எடுத்துக்கொள்பவர்கள், மஞ்சள் சப்ளிமெண்ட்ஸ் பயன்படுத்துவதற்கு முன் தங்கள் மருத்துவரை அணுகுவது சாலச் சிறந்தது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.