சமையலறையில் இருக்கும் இந்த பொருள்... பளபளப்பான சருமத்திற்கு நிபுணர்களின் பரிந்துரை

சமீபத்தில், பிரபல யூடியூப் நேர்காணலில், பேஸ் யோகா நிபுணர் விபூதி அரோரா, தனது சரும அழகிற்கு நெய் முக்கிய காரணம் என தெரிவித்து உள்ளார். தினசரி உணவில் சேர்த்துக்கொள்ளும் ஒரு பொருள் சருமத்திற்குப் பொலிவு தரும் என்றால், அது நெய்தான் என நடிகை ரூபினா திலாய்க்கின் கேள்விக்கு அவர் பதிலளித்தார். “நெய்யை சாப்பிடுங்கள், பூசுங்கள், முடியில் தடவுங்கள். நான் நெய்யை மிகவும் நேசிக்கிறேன்,” என்றும் அவர் கூறினார்.

ரூபினா திலாய்க் தனது இரட்டை மகள்களுக்கு நெய்யைக் கொண்டு மசாஜ் செய்ததாகவும், அவர்களின் உணவில் அங்கமாக இருந்ததாகவும் குறிப்பிட்டார். இந்த உரையாடலின் அடிப்படையில், நெய்யின் சருமப் பயன்கள் குறித்து நிபுணர்களிடம் கருத்து கேட்கப்பட்டது.

நெய்யின் நன்மைகள்: தானேவில் உள்ள KIMS மருத்துவமனையின் தோல் சிகிச்சை நிபுணர் டாக்டர் ஸ்வேதா நக்காவா, சுத்தமான நெய்யை சரியான முறையில் பயன்படுத்தும்போது, அது சருமத்திற்குப் பல நன்மைகளைத் தரும் என்று கூறுகிறார். நெய்யை உணவில் சேர்ப்பதன் மூலமும், வெளிப்புறமாகப் பூசுவதன் மூலமும் சரும ஆரோக்கியத்தை மேம்படுத்தலாம். 

இந்த செய்தியை ஆங்கிலத்தில் படிக்க

இதில் உள்ள ஆரோக்கியமான கொழுப்புகள் சரும வெளிப்புறத் தடையை (skin barrier) வலுப்படுத்த உதவுகின்றன. வைட்டமின் A, D மற்றும் E ஆகியவை செல் பழுதுபார்க்கும் வேலையைச் செய்வதோடு, சருமத்திற்குப் பொலிவையும் ஈரப்பதத்தையும் அளிக்கின்றன. நெய்யில் உள்ள ஆன்டிஆக்ஸிடன்ட்கள், முதுமையைத் தாமதப்படுத்தவும், ஃப்ரீ ரேடிக்கல்களின் சேதத்திலிருந்து சருமத்தைப் பாதுகாக்கவும் உதவுகின்றன.

நெய்யைப் பயன்படுத்தும் முறைகள்

சாப்பிடுவது: தினமும் 1-2 தேக்கரண்டி நெய்யை உணவில் அல்லது வெந்நீரில் கலந்து சாப்பிடலாம். அதேநேரம், நெய்யில் கலோரிகள் அதிகம் இருப்பதால், அதிக அளவில் உட்கொள்வதைத் தவிர்க்க வேண்டும் என்றும் டாக்டர் ஸ்வேதா எச்சரித்துள்ளார்.

வெளிப்புறப் பயன்பாடு: உதடுகளுக்கு இயற்கை லிப் பாம் போலவும், வறண்ட முழங்கால், முழங்கை மற்றும் நக இடுக்குகளில் பூசவும் நெய் சிறந்தது. சிலர் நெய்யுடன் மஞ்சள் அல்லது தேன் கலந்து முகமூடியாக (face mask) பயன்படுத்துகின்றனர். ஆனால், அவ்வாறு பயன்படுத்துவதற்கு முன், ஒவ்வாமை உள்ளதா என பரிசோதித்துக்கொள்வது அவசியம்.

சரும வகை: எண்ணெய் பசை, முகப்பரு, அல்லது உணர்திறன் கொண்ட சருமம் உள்ளவர்கள் நெய்யை முகத்தில் நேரடியாகப் பூசுவதைத் தவிர்க்க வேண்டும். ஏனெனில், இது துளைகளை அடைக்கக்கூடும்.  கலப்படமில்லாத, சுத்தமான, அல்லது வீட்டில் தயாரிக்கப்பட்ட நெய்யைப் பயன்படுத்துவது முக்கியம்.

நெய் அதிசயப் பொருள் அல்ல. நல்ல சருமப் பராமரிப்பு மற்றும் ஆரோக்கியமான உணவுப் பழக்கத்துடன் இணைந்தால் மட்டுமே அதன் முழுப் பலன்களும் தெரியும் என்று டாக்டர் ஸ்வேதா கூறுகிறார். நெய், சொரியாசிஸ், அரிக்கும் தோல் அழற்சி (eczema) போன்ற தோல் நோய்களுக்கு மருத்துவ சிகிச்சைக்கான மாற்றாகாது. இது மருத்துவ மேற்பார்வையின் கீழ் மென்மையான துணைப் பொருளாகப் பயன்படுத்தப்படலாம் என்றும் அவர் அறிவுறுத்துகிறார்.