தேங்காய் எண்ணெய் உடன் இந்த 3 சாறுகளை சேருங்க… வெள்ளை முடி கரு கருவென மாறும்; டாக்டர் யோக வித்யா

"ஐயோ, இந்த வயதிலே முடி நரைத்துவிட்டதே" என்று கண்ணாடியைப் பார்த்து கவலைப்படும் இளைஞர்களின் எண்ணிக்கை அதிகரித்துள்ளது. வேலை அழுத்தம், வாழ்க்கை முறை, சுற்றுச்சூழல் மாசுபாடு என பல காரணங்களால், 40 வயதில் வர வேண்டிய வெள்ளை முடி, 20 வயதிலேயே வந்து விடுகிறது. இந்த இளநரைப் பிரச்னைக்கு ரசாயனங்கள் கலந்த டை (Dye) தற்காலிக தீர்வாக இருந்தாலும், அது நீண்ட காலத்திற்குப் பக்க விளைவுகளை ஏற்படுத்தக் கூடும் என்று எச்சரிக்கிறார் மருத்துவர் யோக வித்யா.

நம்முடைய முன்னோர்கள் பின்பற்றிய, இயற்கையான தீர்வுகள் மூலம் இந்த இளநரைப் பிரச்னைக்கு நிரந்தரத் தீர்வு காண முடியும். உங்கள் நரை முடியை மீண்டும் கருப்பாக்கி, கூந்தலுக்கு புத்துயிர் அளிக்கும் இயற்கை ரகசியங்களைப் பற்றி இந்தப் பதிவில் காணலாம்.

வெள்ளை முடிக்கான காரணம் என்ன?

நம் முடிக்கு கருப்பு நிறத்தைக் கொடுப்பது 'மெலனின்' என்ற நிறமி. இந்த மெலனின் உற்பத்தி, நம் மயிர்க்கால்களில் உள்ள 'மெலனோசைட்' செல்களில் நடக்கிறது. வயது மூப்பின் காரணமாகவோ அல்லது சில உடல்நலக் குறைபாடுகள் காரணமாகவோ, இந்த மெலனின் உற்பத்தி குறையும்போது, முடி அதன் கருமை நிறத்தை இழந்து வெண்மையாக மாறுகிறது. இதுவே நரை முடி எனப்படுகிறது.

இளநரைக்கான முக்கிய காரணங்கள்:

இயற்கையான வயோதிகத்தைத் தாண்டி, இளம் வயதில் நரை ஏற்படுவதற்குப் பல காரணங்கள் உள்ளன:

1. ஊட்டச்சத்துக் குறைபாடு: குறிப்பாக வைட்டமின் பி12, பி5, மற்றும் பி7 (பயோட்டின்) போன்ற சத்துக்கள் மெலனின் உற்பத்திக்கு அவசியமானவை. இவற்றின் குறைபாடு இளநரைக்கு வழிவகுக்கும்.
2. சுற்றுச்சூழல் பாதிப்பு: காற்று மாசுபாடு மற்றும் சூரியனின் புற ஊதாக் கதிர்களின் நேரடித் தாக்குதல் உச்சந்தலையை (Scalp) பாதித்து, மெலனின் உற்பத்தியைக் குறைக்கும்.
3. மரபியல்: உங்கள் பெற்றோருக்கு இளநரைப் பிரச்னை இருந்திருந்தால், அது உங்களுக்கும் வர வாய்ப்புகள் அதிகம்.
4. மன அழுத்தம்: நீடித்த மன அழுத்தம் ஹார்மோன் சமநிலையின்மைய ஏற்படுத்தி, முடி நரைப்பதை வேகப்படுத்தும்.

ரசாயனங்களைத் தவிர்த்து, இயற்கையின் உதவியுடன் இளநரையை எப்படி சரிசெய்வது? என்று பார்க்கலாம்.

1. கரிசலாங்கண்ணி: மூலிகைகளின் ராஜா என்று அழைக்கப்படும் கரிசலாங்கண்ணி, முடி வளர்ச்சிக்கு உதவுவதோடு, மெலனின் உற்பத்தியைத் தூண்டி, இழந்த கருமை நிறத்தை மீட்டுத் தருவதில் முதலிடம் வகிக்கிறது. கரிசலாங்கண்ணி எண்ணெயை தினமும் தலையில் தடவி மசாஜ் செய்யலாம். பச்சை இலைகள் கிடைத்தால், அதை அரைத்து சாறெடுத்து தலையில் தடவி 30 நிமிடங்கள் ஊறவைத்து, பின் சீயக்காய் கொண்டு அலசலாம். கரிசலாங்கண்ணி பொடியை, தேங்காய் எண்ணெயுடன் கலந்து ஹேர் பேக்காகவும் பயன்படுத்தலாம்.

2. நெல்லிக்காய்: நெல்லிக்காயில் உள்ள அதிகளவு வைட்டமின் சி, ஒரு சக்திவாய்ந்த ஆன்டி-ஆக்ஸிடன்ட் ஆகும். இது மெலனின் செல்களைப் பாதுகாக்கிறது. மேலும், உடலின் இரும்புச்சத்து உறிஞ்சும் திறனை அதிகரித்து, முடிக்குத் தேவையான ஊட்டச்சத்துக்கள் கிடைப்பதை உறுதி செய்கிறது. தினமும் ஒரு நெல்லிக்காய் சாப்பிடலாம். நெல்லிக்காய் சாறு அருந்தலாம். நெல்லிக்காயை உலர்த்திப் பொடியாக்கி, தேங்காய் எண்ணெயுடன் கலந்து தலைக்குத் தடவலாம்.

3. கறிவேப்பிலை: இது இளநரைக்கான மிக எளிய மற்றும் சக்திவாய்ந்த வீட்டு வைத்தியம். கறிவேப்பிலையில் உள்ள ஊட்டச்சத்துக்கள், மயிர்க்கால்களுக்கு புத்துயிர் அளித்து, முடியைக் கருமையாக்கும். ஒரு கப் தேங்காய் எண்ணெயில், ஒரு கைப்பிடி கறிவேப்பிலையைப் போட்டு, அது கருமை நிறம் அடையும் வரை நன்கு கொதிக்க வைக்கவும். பின் எண்ணெயை ஆறவைத்து, வடிகட்டி, தினமும் தலைக்குத் தடவி வரவும்.

4. உணவே மருந்து: இளநரையைக் கட்டுப்படுத்த உங்கள் தினசரி உணவில் கட்டாயம் சேர்க்க வேண்டியவை: உணவில் சேர்க்கும் கறிவேப்பிலையைத் தூக்கி எறியாமல், நன்கு மென்று சாப்பிடவும். இரும்புச்சத்து மற்றும் வைட்டமின்கள் நிறைந்த முருங்கைக்கீரையை வாரம் இருமுறை உணவில் சேர்க்கவும். கொத்தமல்லிக் கீரை இதுவும் முடி ஆரோக்கியத்திற்கு சிறந்ததாகும் என்கிறார் மருத்துவர் யோக வித்யா.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.