கெண்டைக்கால் தசை 'இரண்டாவது இதயம்' என அழைக்கப்படுவது ஏன்? அதை வலுப்படுத்தும் பயிற்சிகள் இதோ!

டாக்டர் மிக்கி மேத்தா

நமது கெண்டைக்கால் தசை நமது இரண்டாவது இதயம். நீங்கள் நாள் முழுவதும் உட்கார்ந்திருந்தாலோ அல்லது நின்றிருந்தாலோ, உங்கள் ரத்தம் கீழ் உடலை நோக்கிச் செல்கிறது. அது கீழ் நோக்கிச் சென்றதும், எப்படி மீண்டும் திரும்பி மூளைக்கு வருகிறது? ரத்தத்தை மேல்நோக்கித் தள்ளும் வேலையை கெண்டைக்கால் தசை செய்கிறது. நாம் நடப்பதற்கு நமது கெண்டைக்கால் தசையைப் பயன்படுத்துகிறோம், ஆனால், ரத்தத்தை மேல்நோக்கித் தள்ளும் விதத்தில் நாம் அவற்றைப் பயன்படுத்துகிறோமா?

ஆங்கிலத்தில் படிக்க:

நமது கெண்டைக்கால் தசை வெறும் நிற்பது, நடப்பது மற்றும் பிற செயல்பாடுகளுக்கு மட்டும் பயன்படுத்தப்படுவதில்லை. அவை ரத்தத்தை மீண்டும் இதயத்திற்குத் தள்ளுவதன் மூலம் ரத்த ஓட்டத்தைப் பராமரித்து, பலவிதமான உடல்நலப் பிரச்சினைகளைத் தடுக்கின்றன. குறிப்பாக நீண்ட நேரம் அசையாமல் இருக்கும்போது, இந்த உந்தித் தள்ளும் இயக்கம், திறமையான ரத்த ஓட்டத்தை உறுதிசெய்து, இதயத்தின் மீதான அழுத்தத்தைக் குறைக்கிறது. கெண்டைக்கால் தசை சரியாகச் செயல்படாதபோது, அவை ரத்த ஓட்டத்தைப் பாதித்து, சோர்வு, தசைப்பிடிப்பு மற்றும் தீவிர சூழ்நிலைகளில், ரத்தக் கட்டிகளை உருவாக்குகின்றன. பின்வரும் பயிற்சிகளைச் செய்யத் தொடங்குங்கள்:

நின்ற நிலையில் கெண்டைக்கால் தசை உயர்த்துதல்: நேராக நின்றுகொண்டு, உங்கள் குதிகால்களை முடிந்தவரை உயரமாகத் தூக்கி, பின்னர் மெதுவாக மீண்டும் கீழே இறக்குங்கள். கட்டுப்பாடுடனும், முழு அளவிலான அசைவுடனும் இதைச் செய்யுங்கள். 15-20 முறை மூன்று செட்களாக இதைச் செய்யலாம். தீவிரத்தை அதிகரிக்க நீங்கள் ஒரு இயந்திரத்தைப் பயன்படுத்தலாம் அல்லது டம்ப்பெல்ஸைப் பிடித்துக்கொள்ளலாம்.

அமர்ந்த நிலையில் கெண்டைக்கால் தசை உயர்த்துதல்: ஒரு பெஞ்ச் அல்லது இயந்திரத்தில் அமர்ந்தபடி, உங்கள் முழங்கால்கள் மீது ஒரு எடையை வையுங்கள். உங்கள் குதிகால்களைத் தூக்கி, உச்சத்தை அடைந்ததும் நிறுத்தி, பின்னர் படிப்படியாகக் கீழே இறக்குங்கள். இது கேஸ்ட்ரோக்னிமியஸ் தசையை விட சோலியஸ் தசையில் அதிக கவனம் செலுத்துகிறது. ரத்த ஓட்டத்தையும் வலிமையையும் அதிகரிக்க இது சிறந்தது.

ஒற்றை காலில் கெண்டைக்கால் தசை உயர்த்துதல்: நின்ற நிலையில் செய்யும் கெண்டைக்கால் தசை உயர்த்துதல் போலவே, இதை ஒரு நேரத்தில் ஒரு காலில் செய்ய வேண்டும். இது தசைகளின் சமச்சீர், வலிமை மற்றும் சமநிலையை மேம்படுத்துகிறது.

கால் விரல்களில் நடப்பது: 30 முதல் 60 வினாடிகள் வரை உங்கள் கால் விரல்களில் நடங்கள். இது வலிமையை அதிகரித்து, இரண்டு கெண்டைக்கால் தசைகளையும் ஈடுபடுத்துகிறது.

மேலும் தீவிரமான பயிற்சிகளைச் செய்ய விரும்புபவர்கள் பின்வருவனவற்றைச் செய்யலாம்:

தத்தி குதித்தல் (ஸ்கிப்பிங்): கெண்டைக்கால் தசையை விரைவாக ஈடுபடுத்தும் ஒரு சிறந்த இதயப் பயிற்சி. இது இரத்த ஓட்டம் மற்றும் வலிமையை அதிகரிக்கிறது.

மாடிப்படி ஏறுதல்: மாடிப்படிகளில் ஏறுவது அல்லது படிக்கட்டு இயந்திரத்தைப் பயன்படுத்துவது கெண்டைக்கால் தசைக்குத் தொடர்ந்து பயிற்சி அளிக்கிறது. இது இதய ஆரோக்கியம் மற்றும் செயல்பாட்டு வலிமையை மேம்படுத்துகிறது. அவை சுறுசுறுப்பு, நோய் எதிர்ப்பு சக்தி மற்றும் நிலைத்தன்மைக்கும் நல்லது.

ஜம்பிங் ஜாக்ஸ்: உங்கள் கால்களைத் தோள்பட்டை அகலத்தில் வைத்து, உங்கள் கைகளை பக்கவாட்டில் வைத்து நேராக நில்லுங்கள். உங்கள் கால்களை பக்கவாட்டில் குதித்து விரிக்கும் அதே நேரத்தில், உங்கள் கைகளை மேலே உயர்த்துங்கள். உங்கள் கால்களை மீண்டும் ஒன்றாகக் குதித்து, கைகளை மீண்டும் தொடக்க நிலைக்குக் கொண்டு வாருங்கள். ஒரு சீரான வேகத்தைப் பராமரித்து, நீங்கள் விரும்பும் நேரம் வரை இந்த குதிக்கும் இயக்கத்தைத் தொடருங்கள்.

இந்த பயிற்சிகள் நீண்ட ஆயுள், நோய் எதிர்ப்பு சக்தி மற்றும் சுறுசுறுப்புக்கு நல்லது. கீழ் உடல் பயிற்சிகள் மூலம் ஒருவர் நிலைத்தன்மையுடனும், சிறந்த ஒருங்கிணைப்புடனும் இருக்க முடியும்.

(டாக்டர் மிக்கி மேத்தா, சுகாதார நிபுணர்)