உமிழ்நீரால் முகப்பரு குணமாகுமா? தமன்னாவின் கூற்றுக்கு தோல் மருத்துவர்களின் விளக்கம்!

தென்னிந்திய திரை உலகில் மட்டுமின்றி இந்திய திரை உலகில் பிரபல நடிகையாக இருந்து வருபவர் தமன்னா. சில வருடங்களாக தனி பாடலுக்கு நடனமாடி மிகப்பெரிய ரசிகர்கள் பட்டாளத்தை அவருக்காக உருவாக்கியுள்ளார். ஜெயிலர் படத்தில் இடம்பெற்ற காவலா பாடலுக்கு அவர் ஆடிய நடனம் பட்டி தொட்டி எங்கும் பிரபலமானது. மீண்டும் சினிமாவில் பிசியாக பல படங்களை நடிக்க தொடங்கி இருக்கிறார்.

அண்மையில் தனக்கு வரக்கூடிய முகப் பருக்கள் குறித்து நடிகை தமன்னா, லல்லண்டோப் போட்காஸ்டில் கூறியதாவது; "என் முகத்தில் முகப்பரு வரும் போதெல்லாம் வேறு எந்த சிகிச்சையையும் நான் எடுத்துக் கொள்வதில்லை. அவ்வப்போது பருக்கள் மீது எச்சில் வைப்பேன். இது எனக்கு பயனுள்ளதாக அமைந்து பருக்கள் குணமாகிவிடும்” என்றார்.

இந்த செய்தியை ஆங்கிலத்தில் படிக்க

ஃபோர்டிஸ் மருத்துவமனையின் (டெல்லி) தோல் மருத்துவ நிபுணர் டாக்டர் ரஷ்மி ஷர்மா, தமன்னாவின் இந்த கூற்றை முற்றிலுமாக மறுத்து உள்ளார். "இது மருத்துவ ரீதியாக சாத்தியமற்றது. பிரபலங்கள் இதுபோன்ற பரிசோதிக்கப்படாத சிகிச்சை முறைகளைப் பற்றி பொதுவெளியில் பேசும்போது, மக்கள் அதன் அறிவியலைப் புரிந்து கொள்ளாமல் அவற்றைப் பின்பற்றுகிறார்கள். எந்தவொரு தோல் மருத்துவரும் இத்தகைய சிகிச்சையை ஒருபோதும் ஆதரிக்க மாட்டார்கள்" என்று அவர் தெரிவித்துள்ளார்.

உமிழ்நீர் சருமத்திற்கு தீங்கு விளைவிப்பது ஏன்?

உமிழ்நீர் நமது வாயில் இருந்து வந்தாலும், அது கிருமியற்றது என்ற எண்ணம் தவறான கருத்து. உமிழ்நீர் நமது வாய் சுகாதாரத்தைப் பொறுத்து பாக்டீரியாக்கள் மற்றும் பிற நுண்ணுயிரிகளைக் கொண்டுள்ளது. இவை சருமத்திற்கு தீங்கு விளைவிப்பவையாக இருக்கலாம். சருமத்தில் வெடிப்புகள் இருக்கும்போது, மேல் தோல் ஏற்கனவே பாதிக்கப்பட்டிருக்கும். உமிழ்நீரை அத்தகைய பாதிக்கப்பட்ட தோலில் தடவுவது நோய்க் கிருமிகளை சருமத்தின் உட்புற அடுக்குகளுக்குள் செலுத்தி, தொற்றுநோய்களை ஏற்படுத்தக்கூடும். குழந்தைகள் முகத்தில் உமிழ்நீர் பட்டு சிவந்த தடிப்புகள் ஏற்படுவது "வாயில் வழியும் எச்சில் தடிப்பு" (drool rash) என்றழைக்கப்படுவதற்குக் காரணம் இதுதான்.

உமிழ்நீரில் உள்ள என்சைம்கள் அதன் சற்று அமிலத்தன்மை கொண்ட pH, உணர்திறன் வாய்ந்த சருமத்தில் எரிச்சல் அல்லது வறட்சியை ஏற்படுத்தலாம். உமிழ்நீரில் உள்ள என்சைம்கள் சருமத்தின் பாதுகாப்பு அடுக்கை உருவாக்கும் லிப்பிடுகள் மற்றும் புரதங்களை உடைக்கலாம். இது தொடர்ந்து ஈரப்பதத்துடன் சேர்ந்து சருமத் தடையை எரிச்சலடையச் செய்து பலவீனப்படுத்தலாம். இது சருமத்தை சேதத்திற்கு மேலும் ஆளாக்கும். அனைவருக்கும் வெவ்வேறு தோல் வகைகள் இருப்பதால், சிலர் உமிழ்நீரில் உள்ள கூறுகளுக்கு உணர்திறன் அல்லது ஒவ்வாமை உடையவர்களாக இருக்கலாம், இதனால் தோல் எதிர்வினைகள் ஏற்படலாம். சில சமயங்களில், உமிழ்நீர் 2-ம் நிலை தொற்றையும் தூண்டலாம்.

உமிழ்நீருக்கு அழற்சி எதிர்ப்பு பண்புகள் உள்ளதா?

உமிழ்நீரால் முகப்பரு அல்லது பிற தோல் நிலைகளை திறம்பட குணப்படுத்த முடியும் அல்லது அதிகாலை உமிழ்நீர் பயனுள்ளது என்பதற்கு அறிவியல் பூர்வமான ஆதாரங்கள் இல்லை. உமிழ்நீரில் அழற்சி எதிர்ப்பு பண்புகள் இருந்தாலும், அவை வாய்வழி செயல்பாட்டிற்கு மட்டுமே போதுமானவை மற்றும் முறையான அழற்சியில் குறிப்பிடத்தக்க தாக்கத்தை ஏற்படுத்தும் அளவுக்கு அதிகமாக இல்லை.

நோயாளிகள் பயன்படுத்தும் பிற மாற்று சிகிச்சைகள் யாவை?

பல நோயாளிகள் வேப்பிலை, பற்பசை, மஞ்சள் கலவை, ஏன் வினிகர் போன்றவற்றையும் தடவுகிறார்கள். மாற்று சிகிச்சைகள் அவர்களுக்கு பலனளிக்காததால்தான் அவர்கள் தோல் மருத்துவரிடம் வர வேண்டியுள்ளது என்று டாக்டர் ரஷ்மி ஷர்மா குறிப்பிட்டார்.

முகப்பருவை குணப்படுத்த சிறந்த வழி என்ன?

முகப்பரு சிகிச்சைகள் அறிவியல் ஆராய்ச்சியால் ஆதரிக்கப்படுகின்றன, மேலும் அவை உமிழ்நீரை நம்புவதை விட மிகவும் பயனுள்ளவை மற்றும் நம்பகமானவை. சான்றளிக்கப்பட்ட தோல் மருத்துவரை அணுகி, பரிந்துரைக்கப்பட்ட மருந்துகள் அல்லது மேற்பூச்சு கிரீம்களை அவர் அறிவுறுத்தியபடி பயன்படுத்துவதை உறுதிப்படுத்திக் கொள்ளுங்கள். மருந்து அளவுகளில் சுயமாக எந்த மாற்றமும் செய்ய வேண்டாம் என்றார்.