வைஃபை மூளையின் செயல்பாட்டை பாதிக்குமா? இரவில் அணைத்து வைக்க வேண்டுமா? நரம்பியல் நிபுணர் விளக்கம்

சமீப காலமாக, இரவில் வைஃபை இணைப்பை அணைத்து வைக்க வேண்டுமா என்பது குறித்து ஒரு விவாதம் இணையத்தில் பரபரப்பாக பேசப்பட்டு வருகிறது. வைஃபை அணைத்து வைக்கப்படாவிட்டால், அது தூக்கம் மற்றும் மூளையின் செயல்பாட்டைப் பாதிக்கும் என்று சிலர் அச்சப்படுகின்றனர். சாதனங்களிலிருந்து வரும் ரேடியோ அலைகள் (ஆர்.எஃப்) மூளையின் செயல்பாட்டைக் கெடுக்கும் அல்லது தொந்தரவு செய்யும் என்ற பயம் இருந்தாலும், அறிவியல் ஆதாரங்கள் அத்தகைய தீவிரமான விளைவுகளைக் காட்டவில்லை.

ஆங்கிலத்தில் படிக்க:

“பெரும்பாலான எச்சரிக்கை ஆய்வுகள் மனிதர்களை விட விலங்குகளில்தான் நடத்தப்படுகின்றன. காரணம் மற்றும் விளைவை நிறுவுவதற்கு இன்னும் தனிப்பயனாக்கப்பட்ட ஆய்வுகள் தேவை. எலிகள் மீது நடத்தப்பட்ட வைஃபை ஆய்வுகள், அவை மலட்டுத்தன்மையை ஏற்படுத்தக்கூடும் என்று குறிப்பிட்டன. ஆனால், இது மனித ஆய்வுகளில் நிரூபிக்கப்படவில்லை” என்று குருகிராமில் உள்ள மாரெங்கோ ஆசியா மருத்துவமனையின் நரம்பியல் நிறுவனத்தின் தலைவர் டாக்டர் பிரவீன் குப்தா தெரிவித்தார்.

கவலைக்கு என்ன காரணம்?

வைஃபை என்பது ஒரு வயர்லெஸ் ரூட்டரில் இருந்து அருகிலுள்ள சாதனத்திற்கு அனுப்பப்படும் ஒரு ரேடியோ சிக்னல் ஆகும். இந்த சிக்னல் நாம் பார்க்கவும் பயன்படுத்தவும் கூடிய தரவுகளாக மாற்றப்படுகிறது. இது கதிர்வீச்சு மூளையை சேதப்படுத்தும் என்ற குழப்பமான கோட்பாடுகளுக்கு வழிவகுத்தது. உண்மை என்னவென்றால், வைஃபை, சிடி ஸ்கேன்கள் அல்லது எக்ஸ்ரேவை விட பல மடங்கு பலவீனமான, அயனியாக்கமற்ற கதிர்வீச்சைப் பயன்படுத்துகிறது. அயனியாக்கமற்ற ரேடியோ அதிர்வெண் அலைகள் மூளை செல்களைப் பாதிக்கவோ அல்லது ஒருவரின் டி.என்.ஏ-வை மாற்றவோ போதுமான வலிமையானவை அல்ல. இதுவரை மேற்கொள்ளப்பட்ட பல ஆய்வுகள், வைஃபை பயன்பாட்டிற்கும் மூளைக் கட்டிகள், ஞாபக மறதி அல்லது நரம்பு மண்டல நோய்களுக்கும் நேரடி தொடர்பு இருப்பதற்கான ஆதாரத்தைக் கண்டறியவில்லை.

எனினும், சில ஆய்வுகள், ரேடியோ அதிர்வெண் அலைகளுக்கு நீண்ட நேரம் வெளிப்படுவது தூக்க சுழற்சிகளில் மூளை செயல்பாட்டை லேசாகப் பாதிக்கும் என்று கூறி குழப்பத்தை ஏற்படுத்தியுள்ளன. வைஃபை அல்லது மொபைல் கதிர்வீச்சு ஆழ்ந்த உறக்கத்தின் போது மூளை அலைகளை லேசாகப் பாதிக்கக்கூடும் என்றாலும், இந்த மாற்றங்கள் புறக்கணிக்கத்தக்கவை மற்றும் பொதுவாக மக்களின் வாழ்க்கையைப் பாதிக்கும் அளவுக்கு முக்கியத்துவம் வாய்ந்தவை அல்ல. மோசமான தூக்கத்தின் தரம் பெரும்பாலும் மன அழுத்தம், தூங்குவதற்கு முன் செல்போன், கணினி, டிவி ஸ்ட்கிரீன்களைப் பார்ப்பது சீரற்ற தூக்கம் அல்லது தூக்கக் கோளாறுகள் ஆகியவற்றுடன் தொடர்புடையது, வைஃபை சிக்னல்களால் அல்ல.

மூளை ஆரோக்கியத்திற்கு மிக முக்கியமானது எது?

மூளை ஆரோக்கியத்திற்கு மிக முக்கியமானது, நன்றாக தூங்கும் பழக்கத்தைக் கடைப்பிடிப்பதுதான். தூங்குவதற்கு முன் திரைகளைப் பயன்படுத்துவதைத் தவிர்ப்பது, அமைதியான மற்றும் இருண்ட சூழலில் தூங்குவது, மற்றும் ஒரு குறிப்பிட்ட நேர அட்டவணையைப் பின்பற்றுவது போன்றவை இதில் அடங்கும். இரவில் வைஃபை அணைத்து வைப்பது மறைமுகமாக உதவக்கூடும். ஏனெனில் அது இணையத்தில் தாமதமாக ஈடுபடுவதைத் தடுக்கிறது. ஆனால் வைஃபை சிக்னல்களால் நேரடி தீங்கு விளைவுகள் இல்லை.

இரவில் வைஃபையை அணைக்காமல் வைத்திருப்பது மூளைக்கு தீங்கு விளைவிக்கும் என்பதற்கு வலுவான அறிவியல் ஆதாரம் இல்லை. ஆனால், கவனச்சிதறல்களைத் தடுக்கவும் அல்லது நீங்கள் நன்றாகத் தூங்கவும் அது உதவுகிறது என்றால், அதை அணைத்து வைப்பது ஒரு நல்ல பழக்கம். தொடர்ந்து தூக்கமின்மை, மோசமான வாழ்க்கை முறை மற்றும் வாழ்க்கை தரம் ஆகியவற்றால் மூளை ஆரோக்கியம் குறையும்.

புற்றுநோயுடன் ஏதேனும் தொடர்பு உள்ளதா?

வைஃபை புற்றுநோயை ஏற்படுத்துகிறது என்பது ஒரு கட்டுக்கதை. உலக சுகாதார அமைப்பு (WHO) மற்றும் பிற புகழ்பெற்ற சுகாதார அமைப்புகளால் நடத்தப்பட்ட ஆய்வுகள் உட்பட விரிவான ஆராய்ச்சிகள், வைஃபை பயன்பாட்டிற்கும் புற்றுநோய் வளர்ச்சிக்கும் இடையே எந்தவித காரண உறவையும் கண்டறியவில்லை. இந்த அமைப்புகள், நிலையான பாதுகாப்பு வரம்புகளுக்குள் பயன்படுத்தப்படும்போது வைஃபை பாதுகாப்பானது என்று கூறுகின்றன.

வைஃபை குறித்த பிற கட்டுக்கதைகள் என்ன?

இது கர்ப்பிணிப் பெண்களுக்கும், கருவில் உள்ள குழந்தைகளுக்கும் ஆபத்தானது. ஆனால், வைஃபை கதிர்வீச்சால் கரு வளர்ச்சிக்கு ஆபத்துகள் ஏற்படவில்லை என்பது நிரூபிக்கப்பட்டுள்ளது.

வைஃபை மருத்துவ சாதனங்களில் தலையிடுமா?

வைஃபை, பேஸ்மேக்கர்கள் மற்றும் காது கேட்கும் கருவிகள் போன்ற மருத்துவ சாதனங்களில் தலையிடக்கூடும் என்ற நம்பிக்கை உள்ளது. இருப்பினும், நவீன மருத்துவ சாதனங்கள் ரேடியோ அலைகள் தலையிடுவதைத் தாங்கும் வகையில் வடிவமைக்கப்பட்டுள்ளன. மேலும், பல ஆய்வுகள் வைஃபை அவற்றின் செயல்பாட்டைத் தொந்தரவு செய்யாது என்பதைக் காட்டியுள்ளன. வைஃபை சாதனங்கள் மற்றும் மருத்துவ சாதனங்கள் இரண்டும் பாதுகாப்பாகச் செயல்படுவதை ஒழுங்குமுறை தரநிலைகள் உறுதி செய்கின்றன.