காதில் அழுத்தமாக முத்தமிட்டதால் செவித்திறனை இழந்த பெண்? வல்லுநர்கள் கூறும் விளக்கம்

காதுக்கு அருகில் மென்மையாக முத்தமிடுவது ஒரு இனிமையான, தீங்கு விளைவிக்காத செயலாக தோன்றலாம். ஆனால், அது நிரந்தரமான பாதிப்பை ஏற்படுத்துமா? சாமுவேல் என்ற மருத்துவர் தனது இன்ஸ்டாகிராம் பக்கத்தில், நியூயார்க்கைச் சேர்ந்த ஒரு பெண்ணின் காதில், அவரது குழந்தை அழுத்தமாக முத்தமிட்டதால் அப்பெண்ணுக்கு ஒரு காதில் செவித்திறன் பாதிக்கப்பட்டதாக கூறியிருந்தார். இது உண்மையில் சாத்தியமா என்று நிபுணர்களிடம் கேட்டோம்.

நொய்டாவில் உள்ள சூப்பர் ஸ்பெஷாலிட்டி மருத்துவமனையின் காது, மூக்கு, தொண்டை (ENT) மருத்துவ துறை தலைவர் டாக்டர் ஆஷிஷ் பூஷன் கூறுகையில், முத்தம் கவலைக்குரியது அல்ல, அதனுடன் சேர்ந்து வரும் விஷயங்கள்தான் என்றார். முத்தத்தின் போது காதுக்கு அருகில் திடீரென உரத்த ஒலி அல்லது கிசுகிசுப்பு இருந்தால், கேட்கும் அமைப்பு பாதிக்கப்பட சிறிய வாய்ப்பு உள்ளது. குறிப்பாக, காதுக்கு நெருக்கமான உரத்த ஒலிகள், தற்காலிகமாகவோ அல்லது நிரந்தரமாகவோ செவித்திறன் பாதிப்பை ஏற்படுத்தலாம். மருத்துவர் பூஷன், "காதுக்குள் நேரடியாக ஊதுவது அல்லது அதிகப்படியான அழுத்தத்தைக் கொடுப்பது கேட்கும் திறனில் சிக்கல்களுக்கு வழிவகுக்கலாம், ஆனால் இது அரிதானது" என்று தெரிவித்தார்.

View this post on Instagram

A post shared by Dr Samuel Choudhury (@drsamuelgp)

அழுத்தம் மற்றும் ஒலி

அழுத்த மாற்றங்களுக்கும், அதிக டெசிபல் ஒலிகளுக்கும் காது உணர்திறன் கொண்டது. மென்மையாக முத்தமிடுவது பொதுவாக தீங்கு விளைவிப்பதில்லை. ஆனால், டைவிங் அல்லது விமானத்தில் பறப்பது போன்ற காது அழுத்தத்தை அதிகரிக்கும் செயல்கள் பரோட்ராமா போன்ற அழுத்தத்தால் ஏற்படும் காது காயங்களுக்கு வழிவகுக்க அதிக வாய்ப்புள்ளது. 

இருப்பினும், காதுக்குள் திடீரென காற்றழுத்தத்தை ஏற்படுத்துவது, நேரடியாக ஊதுவதன் மூலமாகவோ அல்லது முத்தத்தின் போது எதிர்பாராத விதமாக உரத்த ஒலி எழுவதன் மூலமாகவோ தற்காலிக கேட்கும் பிரச்சனைகளுக்கு வழிவகுக்கும். இந்த அரிதான சந்தர்ப்பங்களில், மருத்துவ தலையீடு இல்லாமல் செவித்திறன் இழப்பு சரியாகி விடும். ஆனால், காதுக்கு ஏற்படும் உடல் ரீதியான காயம் நிரந்தரமானதாக இருக்கலாம்.

கேட்கும் திறன் இழப்பைத் தாண்டிய சாத்தியமான சிக்கல்கள்

செவித்திறன் பாதிப்பைத் தவிர மற்ற சிக்கல்களும் இதில் ஏற்படலாம். உரத்த ஒலிகளுக்கு நீண்ட நேரம் வெளிப்படுவது டின்னிடஸ் எனப்படும் காதுகளில் இரைச்சல் அல்லது ரீங்காரத்தை ஏற்படுத்தும். டின்னிடஸ் பெரும்பாலும் உள் காது சேதத்தின் விளைவாகும். இது ஒரு லேசான அசௌகரியமாகத் தோன்றினாலும், ஆரம்ப ஒலி வெளிப்பாட்டிற்கு பிறகும் நீண்ட காலம் தொடரலாம் என்று மருத்துவர் பூஷன் விளக்குகிறார்.

கூடுதலாக, சுகாதாரமின்மை அல்லது காற்றை ஊதுவதன் மூலம் காதில் ஈரப்பதம் நுழைவது தொற்றுக்கான ஆபத்தை அதிகரிக்கும். அழுத்த மாற்றங்கள் யூஸ்டாச்சியன் குழாய்களையும் பாதிக்கலாம். இது அசௌகரியம் அல்லது கேட்கும் சிரமங்களுக்கு வழிவகுக்கும். முத்தமிடுவது போன்ற சாதாரண தொடர்புகளில் இந்த விளைவுகள் அரிதானவை என்றாலும், குறிப்பாக அறிகுறிகள் நீடித்தால் கவனிக்க வேண்டியது அவசியம்.

மருத்துவ உதவி எப்போது தேவைப்படும்? 

பெரும்பாலானவர்களுக்கு, காதில் முத்தமிடுவது கவலைப்பட வேண்டிய விஷயம் அல்ல. இருப்பினும், உங்களுக்கு அல்லது உங்களுக்குத் தெரிந்த யாருக்கேனும் திடீரென செவித்திறன் இழப்பு, காதுகளில் இரைச்சல் அல்லது இதுபோன்ற ஒரு தொடர்புக்குப் பிறகு அசௌகரியம் ஏற்பட்டால், மருத்துவ சோதனை செய்வது நல்லது. "கேட்கும் திறனில் ஏற்படும் மாற்றங்களை ஒருபோதும் புறக்கணிக்கக் கூடாது" என்று மருத்துவர் பூஷன் வலியுறுத்துகிறார்.