வீட்டுல டி.வி சீரியல் பார்த்துக் கொண்டே சுகரை குறைக்கலாம்: டாக்டர் கார்த்திகேயன் சூப்பர் யோசனை

உலகம் முழுவதும் உள்ள கோடிக்கணக்கான மக்களுக்கு ரத்த சர்க்கரை அளவை நிர்வகிப்பது சவால். கடுமையான உணவுக்கட்டுப்பாடுகள் முதல் மருந்துகள் வரை, சர்க்கரை அளவை சீராக வைத்திருப்பது குறிப்பிடத்தக்க வாழ்க்கை முறை மாற்றங்களை உள்ளடக்கியது. ஆனால், சோபா (அ) சேரில் இருந்தபடியே ரத்த சர்க்கரை அளவை குறைக்க முடியும் என்றால் நம்ப முடிகிறதா? ஆம்!  ஹூஸ்டன் பல்கலைக் கழகத்தின் ஆராய்ச்சியை அடிப்படையாகக் கொண்டது இந்தப் பயிற்சி முறை.

இந்த பயிற்சியின் முக்கிய அம்சம் உங்கள் காலின் பின் பகுதியில் அமைந்துள்ள சோலியஸ் தசை ஆகும். இந்த தசை, சர்க்கரையை திறம்பட எரிக்கும் தனித்துவமான திறனைக் கொண்டுள்ளது. பெரும்பாலான தசைகள் ஆற்றலுக்கு கிளைகோஜனைப் பயன்படுத்தும் நிலையில், சோலியஸ் தசை நேரடியாக ரத்தத்தில் உள்ள குளுக்கோஸ் மற்றும் கொழுப்பை எரிபொருளாகப் பயன்படுத்துகிறது.

பயிற்சி முறை: ஒரு நாற்காலியில் நீங்கள் டிவி பார்க்கும் அல்லது புத்தகம் படிக்கும் போது அமர்வது போல வசதியாக உட்காருங்கள். உங்கள் இரு கால்களையும் ஒரே நேரத்தில் மெதுவாகத் தூக்கி இறக்குங்கள். இந்த எளிய அசைவு சோலியஸ் தசையைத் தூண்டுகிறது. இந்த தசை செயல்படத் தொடங்கும் போது, அது ரத்த ஓட்டத்தில் இருந்து குளுக்கோஸை உறிஞ்சி எரிப்பதால், ரத்த சர்க்கரை அளவு குறைய உதவுகிறது.

இந்த பயிற்சி நீரிழிவு நோயாளிகளுக்கு கூடுதல் வழிமுறையாக இருக்கும். உடல் ரீதியாக அதிக சுறுசுறுப்பாக இருக்க முடியாதவர்களுக்கு இது பயனுள்ளதாக அமையும். டிவி பார்க்கும்போது அல்லது ஓய்வெடுக்கும்போது இந்த பயிற்சியைச் செய்வதன் மூலம், இரத்த சர்க்கரை அளவைக் குறைக்க முடியும் என்றும், இது நீரிழிவு மருந்துகளின் அளவைக் குறைப்பதற்கான வாய்ப்பையும் அளிக்கும் என்றும் ஆய்வுகள் கூறுகின்றன.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.