தள்ளிப் போகும் தனுஷ் படம்... புதிய ரிலீஸ் தேதியை அறிவித்த தயாரிப்பாளர்!

டான் பிக்சர்ஸ் ஆகாஷ் பாஸ்கரன் தயாரிப்பில் தனுஷ் இயக்கி நடித்துள்ள திரைப்படம் தான் இட்லி கடை. பா.பாண்டி, ராயன் மற்றும் நிலவுக்கு என்மேல் என்னடி கோபம் ஆகிய படங்களை தொடர்ந்து தனுஷ் இயக்கும் நான்காவது திரைப்படம் தான் இட்லி கடை. கிராமத்து பின்னணியில் உருவாகும் ஒரு பீல் குட் படமான இட்லி கடை திரைப்படத்தில் அருண் விஜய், நித்யா மேனன், சத்யராஜ், ராஜ்கிரண் என பலர் நடித்து வருகின்றனர்.

இந்நிலையில் இப்படம் ஏப்ரல் 10 ஆம் தேதி தமிழ் புத்தாண்டை முன்னிட்டு வெளியாகும் என ஒரு சில மாதங்களுக்கு முன்பே அதிகாரபூர்வமாக அறிவிக்கப்பட்டது. அதையொட்டி இப்படத்தின் வேலைகளை விறுவிறுப்பாக செய்து வந்தார் தனுஷ். அதன் பிறகு அஜித்தின் குட் பேட் அக்லி திரைப்படம் ஏப்ரல் 10 ஆம் தேதி வெளியாகும் என அறிவிப்பு வந்தது.

இதன் காரணமாக இட்லி கடை ரிலீஸ் தள்ளிப்போகும் என பரவலாக பேசப்பட்டது. இருப்பினும் தனுஷ் இட்லி கடை திரைப்படம் ஏப்ரல் 10 ஆம் தேதி வெளியாகும் என ஒரு போஸ்டரின் மூலம் மீண்டும் உறுதிப்படுத்தினார். எனவே தனுஷ் vs அஜித் படங்கள் ஒரே நாளில் மோத இருப்பதால் இரு நடிகர்களின் ரசிகர்களும் சோஷியல் மீடியாவில் மோதி வந்தனர்.

இந்நிலையில் கடந்த ஒரு சில வாரங்களாக இட்லி கடை படப்பிடிப்பு இன்னும் முடியவில்லை, எனவே கண்டிப்பாக இப்படம் ஏப்ரல் 10 ஆம் தேதி வெளியாகாது என தகவல் வந்தது. அந்த தகவலை தற்போது இப்படத்தின் தயாரிப்பாளர் ஆகாஷ் பாஸ்கரன் உறுதிப்படுத்தியுள்ளார். இட்லி கடை படத்தின் படப்பிடிப்பு இன்னும் பாக்கி உள்ளது. படத்தில் அருண் விஜய், சத்யராஜ், ராஜ்கிரண் என மிகப்பெரிய ஸ்டார்கள் நடிக்கின்றனர்.

அனைவரையும் ஒன்று சேர்த்து மீதமுள்ள படப்பிடிப்பை நடத்த வேண்டும். ஒரு சிலர் வெவ்வேறு பட வேலைகளில் பிசியாக இருப்பதால் அனைவரையும் ஒன்று சேர்க்க சற்று தாமதமாகிவிட்டது. மேலும் படமும் எடுத்தவரை சிறப்பாக வந்துள்ளது. எனவே அவரசரப்படுத்த வேண்டாம் என கூறி இப்படத்தின் ரிலீஸை தள்ளிவைக்கலாம் என முடிவெடுத்தோம். புது ரிலீஸ் தேதி இன்னும் பத்து நாட்களில் அறிவிக்கப்படும் என்றார் தயாரிப்பாளர் ஆகாஷ் பாஸ்கரன். இதன் மூலம் தனுஷின் இட்லி கடை ரிலீஸ் தள்ளிப்போவது உறுதியாகியுள்ளது.