அதர்வா - ஆகாஷ் தெரிந்த முகம்; இவர்களின் சகோதரி தெரியுமா? மறைந்த நடிகர் முரளியின் அழகான குடும்பம்

தமிழ் சினிமாவில் உச்ச நட்சத்திரமாக வலம் வந்தவர் நடிகர் முரளி. இயக்குநரும், திரைக்கதை ஆசிரியரும் மற்றும் தயாரிப்பாளருமான எஸ். சித்தலிங்கையாவின் மகனான இவர் பூவிலங்கு படத்தின் மூலம் தமிழில் அறிமுகமானார். இதன்பின் இவர் நடிப்பில் வெளிவந்த பல படங்கள் சூப்பர் ஹிட் அடித்துள்ளது.

குறிப்பாக, இதயம் திரைப்படம் மிகப்பெரிய வெற்றியை முரளிக்கு தேடி தந்தது. இதனால் தான் இன்றும் நடிகர் முரளியை இதயம் முரளி என ரசிகர்கள் அழைக்கிறார்கள். தமிழ், கன்னடம் என 100-க்கும் மேற்பட்ட படங்களில் இவர் நடித்துள்ளார்.

நடிகர் முரளி சோபா என்பவரை கடந்த 1987 ஆம் ஆண்டில் திருமணம் செய்து கொண்டார். இவருக்கு மூன்று பிள்ளைகள். மூத்த மகள் காவ்யா, இரண்டாவது மகன் அதர்வா மற்றும் மூன்றுவது மகன் ஆகாஷ் ஆவர்.

இதில் அதர்வா தமிழ் சினிமாவில் பிரபலமான நடிகராக வலம் வருகிறார். ஆகாஷ் கடந்த ஆண்டு வெளிவந்த நேசிப்பாயா படத்தின் மூலம் நடிகராக அறிமுகமானார். நடிகர் முரளி கடந்த 2010 ஆம் ஆண்டு மாரடைப்பால் காலமானார் என்பது குறிப்பிடத்தக்கது.

இந்நிலையில், நடிகர் முரளியின் குடும்பத்தினர் இடம்பெற்றுள்ள புகைப்படம் ஒன்று சமூக வலைதள பக்கங்களில் வைரலாகி வருகிறது. அந்தப் படத்தில் தனது தம்பிகளுடன் அக்கா காவ்யா இருக்கிறார். மற்றொரு படத்தில் அம்மா சோபா உடன் மூவரும் இருக்கிறார்கள்.

சினிமாத்துறையில் தனது தம்பிகள் தடம் பதித்தாலும், அக்கா காவ்யா நடிப்பில் பெரிய அளவில் ஆர்வம் காட்டவில்லை. மருத்துவரான காவ்யா சென்னை காவேரி மருத்துவமனையில் காது, மூக்கு மற்றும் தொண்டை நிபுணராகப் பணிபுரிகிறார். அவர் 2011 இல் மலேசியாவைச் சேர்ந்த மென்பொருள் பொறியாளரான ஆதித்யாவை மணந்தார். தற்போது தனது கணவர் மற்றும் குழந்தைகளுடன் வசித்து வருகிறார்.