பிரபஞ்சமே பிரசவித்த பூமியின் கருவறை: ஐஸ்வர்யா ராஜேஷ் போன இந்த கோயில்ல அப்படி என்ன ஸ்பெஷல் தெரியுமா?

அசாம் மாநிலம் குவஹாத்தியில் உள்ள நீலாச்சல் குன்றுகளின் பசுமையான மடியில் அமைந்துள்ள காமாக்யா கோவில், இந்தியாவின் 51 சக்தி பீடங்களில் முதன்மையானதாகவும், தாந்திரீக வழிபாட்டின் மையமாகவும் விளங்குகிறது. சதி தேவியின் யோனி பகுதி விழுந்த இடமாக நம்பப்படும் இத்தலம், இந்து சமயத்தில் சக்தி வழிபாட்டின் தனித்துவமான அம்சங்களை வெளிப்படுத்துகிறது.

தட்சனின் யாகத்தில் அவமதிக்கப்பட்ட சதி தேவி, யாக குண்டத்தில் விழுந்து உயிர் துறந்தாள். அவளது உடலைத் தாங்கி சிவன் ஆவேசமாகத் தாண்டவமாடியபோது, விஷ்ணு தனது சக்கரத்தால் சதியின் உடலை 108 துண்டுகளாக வெட்டினார். இந்த உடல் பாகங்கள் பூமியில் விழுந்த இடங்கள் சக்தி பீடங்களாக போற்றப்படுகின்றன. அவற்றுள் சதி தேவியின் யோனி பகுதி விழுந்த இடமே காமாக்யா கோவில் என்று நம்பப்படுகிறது. இந்த சம்பவம் நடந்த பிறகு, மலை நீல நிறமாக மாறியதால் 'நீலாச்சல்' என்றும் அழைக்கப்படுகிறது.

இக்கோயில் 8 ஆம் நூற்றாண்டில் கட்டப்பட்டதாகக் கூறப்படுகிறது. பலமுறை இடிக்கப்பட்டு மீண்டும் கட்டப்பட்டதன் சுவடுகள் காணப்படுகின்றன. 1565 இல் கோச் ஹஜோ மன்னர் விஸ்வசிங்கின் மகன் நரநாராயணன் இக்கோயிலை மீண்டும் கட்டினார். 1665 இல் மேலும் புதுப்பிக்கப்பட்டது.

காமாக்யா கோவிலின் மிக முக்கியமான தனித்துவம், இங்கு எந்தவிதமான சிலையும் வழிபடப்படுவதில்லை. மாறாக, ஒரு குகைக்குள் உள்ள ஒரு கல் யோனி வடிவில் அன்னை தேவி வழிபடப்படுகிறாள். இந்த யோனிப் பீடத்திலிருந்து ஒரு இயற்கை நீரூற்று பாய்கிறது. இந்த நீரை பக்தர்கள் தீர்த்தமாகப் போற்றி எடுத்துச் செல்கின்றனர். இது பிரபஞ்சத்தின் தாய் சக்தியையும், படைப்பு சக்தியையும், பெண்மையின் வளத்தையும் குறிக்கிறது.

ஒவ்வொரு ஆண்டும் ஜூன் மாதத்தில் (ஆசாத் மாதத்தில்) நடைபெறும் அம்புபாச்சி மேளா, காமாக்யா கோவிலின் மிகப்பெரிய மற்றும் மிகவும் பிரபலமான திருவிழாவாகும். இந்த நாட்களில் காமாக்யா தேவி மாதவிடாய் அடைவதாக நம்பப்படுகிறது. அம்புபாச்சி மேளாவின் போது, பிரம்மபுத்திரா நதியின் நீர் சிவப்பு நிறமாக மாறுவதாகக் கூறப்படுகிறது.

இந்த மூன்று நாட்களும் கோவில் மூடப்பட்டிருக்கும். பெண்கள் மாதவிடாய் தனிமைப்படுத்துவது போல, தாய் பூமி இந்த மூன்று நாட்களும் அசுத்தமாகிவிடும் என்று நம்பப்படுகிறது. இந்த நாட்களில் பக்தர்கள் சமைக்கவோ, பூஜை செய்யவோ, புனித நூல்களைப் படிக்கவோ, விவசாயம் செய்யவோ கூடாது போன்ற சில கட்டுப்பாடுகள் கடைபிடிக்கப்படுகின்றன. மூன்று நாட்களுக்குப் பிறகு, தேவி காமாக்யா குளித்து, தனது தூய்மையை மீட்டெடுப்பதாகக் கருதி சடங்குகள் செய்யப்படுகின்றன. இந்த திருவிழாவின் போது, நாடு முழுவதிலுமிருந்து தாந்திரீக யோகிகளும், பக்தர்களும் திரள்கின்றனர்.

காமாக்யா கோவில் தனித்துவமான கட்டிடக்கலை அம்சங்களைக் கொண்டுள்ளது. இது ஒரு குன்றின் மீது அமைந்துள்ளது மற்றும் ஒரு பழமையான குகைக் கோவிலாகும். வெளிப்புறத்தில் கோவில் போல தோன்றினாலும், உள்ளே இருண்ட பாதாள குகை போல இருக்கும். கருவறையில் சிறு விளக்கு வெளிச்சத்தில் யோனி பீடத்தை தரிசிக்கலாம். காமாக்யா கோவில் வளாகத்தில் தச மகாவித்யா தேவிகளான திரிபுரசுந்தரி, மாதங்கி, கமலா ஆகியோருக்கும் தனித்தனி கோவில்கள் உள்ளன. மற்ற ஏழு மகாவித்யா தேவியரின் சிலைகள் பிரதான கோயிலைச் சுற்றியுள்ள சிறு கோயில்களில் பிரதிஷ்டை செய்யப்பட்டுள்ளன. குழந்தை பாக்கியம், திருமணத் தடைகள் நீங்குதல் மற்றும் கல்வியில் சிறந்து விளங்குவதற்காக இங்கு பிரார்த்திக்கலாம். இங்குள்ள யோனி பீடத்தில் இருந்து வரும் புனித நீர், பக்தர்களுக்கு அருளாசியாகக் கருதப்படுகிறது. உலகம் முழுவதிலுமிருந்து பக்தர்கள் இங்கு வந்து காமாக்யா தேவியின் அருளைப் பெறுகின்றனர்.