தமிழில் நடித்தது 8 படம்; முதல் படமே பெரிய ஹிட்: ஆனா இவர் இந்தியர் அல்ல!

சமூக வலைதளங்கள் வளர்ச்சி அடைந்த நிலையில், அடிக்கடி திரை நட்சத்திரங்களின் இளம் வயது புகைப்படங்கள் வைரலாக பகிரப்படுவது வழக்கம். அந்த வகையில், இப்புகைப்படத்தில் இருக்கும் சிறுமி யாரென்று உங்களுக்கு தெரிகிறதா?

90-களில் பாலிவுட் மற்றும் கோலிவுட் என்று பலருக்கும் விருப்பமான நடிகையாக வலம் வந்த மனிஷா கொய்ராலாவின் குழந்தைப் பருவ புகைப்படம் தான் இது. இவர், 1970 ஆம் ஆண்டு ஆகஸ்ட் 16 ஆம் தேதி நேபாளத்தின் பிராட்நகரில் பிறந்தார். இவரது குடும்பத்தினர் புகழ்பெற்ற அரசியல் பின்னணி கொண்டவர்கள்.

1989 ஆம் ஆண்டு வெளியான நேபாள திரைப்படமான 'பெரி பேதௌலா' வாயிலாக தனது திரைப்பயணத்தை மனிஷா கொய்ராலா தொடங்கினார். அதன்பின்னர், 1991 ஆம் ஆண்டில் சுபாஷ் காய் இயக்கிய 'சௌதாகர்' என்ற இந்தி திரைப்படத்தின் மூலம் பாலிவுட்டில் அறிமுகமானார்.

இதைத் தொடர்ந்து, 1995 ஆம் ஆண்டில் மணிரத்னம் இயக்கிய 'பம்பாய்' திரைப்படத்தின் மூலம் தமிழ் சினிமாவிற்குள் மனிஷா கொய்ராலா நுழைந்தார். இதையடுத்து, முதல்வன், இந்தியன், பாபா போன்ற சில திரைப்படங்களில் நடித்திருக்கிறார். குறிப்பாக, ரஜினி மற்றும் கமல் ஆகிய இருவருக்கும் ஜோடியாக நடித்துள்ளார் என்பது குறிப்பிடத்தக்கது.

தற்போதும் கூட விரைவில் வெளியாக இருக்கும், 'எமர்ஜென்சி', 'ஃப்ரீடம்' மற்றும் 'ஹீரா மண்டி: தி டைமண்ட் பஜார்' போன்ற பல திரைப்படங்களில் மனிஷா கொய்ராலா நடித்துள்ளார். தமிழில் மிகச் சில படங்களில் மட்டுமே நடித்திருந்தாலும், இன்று வரை தமிழ் சினிமா ரசிகர்களிடம் மனிஷா கொய்ராலாவிற்கு தனி இடம் இருக்கிறது.