நடிப்பு மட்டுமல்ல... பல்துறை வித்தகர் இந்த சிறுவன்; யார்னு கண்டுபிடிங்க!

தமிழ் திரையுலகம் மட்டுமின்றி இந்தி, தெலுங்கு, ஹாலிவுட் என பல மொழிகளில் நடித்து தனது திறமையை நிரூபித்த ஒரு கலைஞரின் குழந்தைப் பருவ புகைப்படம் இந்த தொகுப்பில் இடம்பெற்றுள்ளது. இதில் இருக்கும் சிறுவனை உங்களுக்கு அடையாளம் தெரிகிறதா?

நடிப்பு, இயக்கம், பாடலாசிரியர், தயாரிப்பாளர் என பன்முகம் கொண்ட தனுஷின் குழந்தைப் பருவ புகைப்படம் தான் இது. தனது சகோதரிகளுடன் தனுஷ் இணைந்திருக்கும் புகைப்படம் இப்போது, இணையத்தில் ட்ரெண்டாகி வருகிறது.

'துள்ளுவதோ இளமை' திரைப்படத்தின் மூலம் தமிழ் சினிமாவில் அறிமுகமான நடிகர் தனுஷ், தொடக்க காலத்தில் கடுமையான உருவக் கேலிகளுக்கு ஆளானார். எனினும், அடுத்தடுத்து தாம் நடித்த திரைப்படங்கள் மூலம் தனது திறமையை நிரூபித்தார்.

அந்த வகையில், வெற்றிமாறனுடன் இவர் இணைந்து பணியாற்றிய 'பொல்லாதவன்', 'ஆடுகளம்', 'வடசென்னை', 'அசுரன்' போன்ற அனைத்து திரைப்படங்களும் வணிக ரீதியாகவும், விமர்சன ரீதியாகவும் நல்ல வரவேற்பை பெற்றன. குறிப்பாக, தேசிய விருது வெல்லும் அளவிற்கு தனுஷின் உழைப்பு அமைந்தது.

நடிகராக மட்டுமல்லாமல் தயாரிப்பாளராகவும் தனுஷ் சிறப்பான பங்களிப்பை அளித்துள்ளார். குறிப்பாக, இன்று சினிமா உலகில் வெற்றிகரமாக வலம் வரும் சிவகார்த்திகேயன், அனிருத் உள்ளிட்டோரை தனது தயாரிப்பு நிறுவனம் மூலம் அறிமுகப்படுத்திய பெருமை தனுஷுக்கு உண்டு.