பாலிவுட் நடிகை தான்; ஆனா தமிழ் ரசிகர்களுக்கு பிடித்த நடிகை: இந்த சிறுமி டாப் ஸ்டார்

நாளுக்கு நாள் வளர்ச்சி அடைந்து வரும் டிஜிட்டல் உலகில் சினிமா பிரபலங்களின் குழந்தைப் பருவ புகைப்படங்கள் அடிக்கடி வைரலாக பரவுவது வழக்கமான நிகழ்வு தான். அதன்படி, இந்தப் புகைப்படத்தில் இருக்கும் சிறுமி, பாலிவுட்டில் பெரிய ஸ்டாராக அறியப்பட்டவர். இவர் யார் என்று உங்களுக்கு தெரிகிறதா?

இந்திய திரையுலகில், இந்தித் திரைப்படங்கள் மூலமாக தனது தனித்துவமான நடிப்பால் முத்திரை பதித்த அனுஷ்கா ஷர்மாவின் குழந்தைப் பருவ புகைப்படங்கள் தான் இவை. ஃபிலிம்வேர் உள்ளிட்ட பல விருதுகளை வென்ற இவர், ஏராளமான ப்ளாக்பஸ்டர் திரைப்படங்களில் நடித்துள்ளார்.

அயோத்தியில் பிறந்து பெங்களூருவில் வளர்ந்த அனுஷ்கா ஷர்மா, தனது மாடலிங் பயணத்தை 2007 ஆம் ஆண்டு ஃபேஷன் வடிவமைப்பாளர் வெண்டல் ராட்ரிக்ஸ் உடன் தொடங்கினார். அதன் பின்னர், முழுநேர மாடலிங் தொழிலைத் தொடர மும்பைக்குக் குடிபெயர்ந்தார்.

2008 ஆம் ஆண்டு வெளியான 'ரப் நே பனா தி ஜோடி' (Rab Ne Bana Di Jodi) என்ற திரைப்படத்தில் ஷாருக் கானுக்கு ஜோடியாக நடித்து அனுஷ்கா சர்மா திரையுலகில் அறிமுகமானார். அவரது முதல் படமே வணிக ரீதியாகவும், விமர்சன ரீதியாகவும் பெரும் வரவேற்பை பெற்றது. அன்றிலிருந்து, தனது தேர்ந்த நடிப்பாலும், கதாபாத்திர தேர்வுகளாலும் பாலிவுட்டில் தனக்கென ஒரு தனி இடத்தைப் பிடித்துள்ளார்.

இந்திய கிரிக்கெட் அணியின் நட்சத்திர வீரர் விராட் கோலியுடனான அனுஷ்கா ஷர்மாவின் காதல், அன்றைய காலகட்டத்தில் ஊடகத்தில் பேசுபொருளானது. இந்த காதல் ஜோடி 2017 ஆம் ஆண்டு டிசம்பர் 11 ஆம் தேதி இத்தாலியில் மிகவும் கோலாகலமாக திருமணம் செய்துகொண்டனர்.