வேர்க்கடலை சாப்பிட்டால் சுகர் கூடுமா? டாக்டர் சொக்கலிங்கம் நச் பதில்

முந்திரி பருப்பு, பாதாம் பருப்பு, வால்நட் மற்றும் வேர்க்கடலை ஆகியவற்றில் எந்த பருப்பில் அதிகமாக கொலஸ்ட்ரால் இருக்கிறது என்ற சந்தேகம் பலருக்கு இருக்கும்.

அதன்படி, எந்த விதமான பருப்பிலும் கொலஸ்ட்ரால் கிடையாது என புரிந்து கொள்ள வேண்டும் என்று மருத்துவர் சொக்கலிங்கம் தெரிவித்துள்ளார். அதன்படி, எந்த உணவு தாவரத்தில் இருந்து வருகிறதோ, அதில் கொலஸ்ட்ரால் கிடையாது என்று அவர் கூறுகிறார்.

இது போன்ற பருப்புகளை சாப்பிடும் போது அவற்றில் இருந்து ஏராளமான ஊட்டச்சத்துகள் நம் உடலுக்கு கிடைக்கின்றன. ஆனால், இவற்றை அதிகமாக சாப்பிடும் போது அதில் இருக்கும் கலோரிகள் காரணமாக உடல் எடை அதிகரிக்கும் அபாயம் உள்ளது என்று மருத்துவர் சொக்கலிங்கம் எச்சரிக்கை விடுத்துள்ளார்.

எனினும், வேர்க்கடலை சாப்பிட்டால் இரத்தத்தில் இருக்கும் சர்க்கரை அளவு அதிகரிப்பதாக தற்போது பலர் கூறுகின்றனர். இந்த தயக்கத்தினால் வேர்க்கடலை சாப்பிடுவதை நிறைய பேர் தவிர்த்து விடுகின்றனர்.

ஆனால், உண்மை என்னவென்றால் வேர்க்கடலை சாப்பிடுவதன் காரணமாக ஒருவரது இரத்தத்தில் இருக்கும் சர்க்கரை அளவு அதிகரிப்பதில்லை என்று மருத்துவர் சொக்கலிங்கம் திட்டவட்டமாக தெரிவித்துள்ளார்.

மாறாக, இதனை நெய், உப்பு போன்ற பொருட்களுடன் சேர்த்து தாளித்து எடுத்துக் கொள்ளும் போது தான் அவை கெட்டதாக மாறி விடுகிறது என்று அவர் குறிப்பிட்டுள்ளார். எனவே, இது போன்ற பருப்பு வகைகளை இயற்கையான முறையில் அப்படியே சாப்பிட வேண்டும் என்று மருத்துவர் சொக்கலிங்கம் அறிவுறுத்துகிறார்.