’பீக்கில்’ இருக்கும் போதே அரசியலில் நுழைந்த நடிகைகள்!

இளம் வயதில் இந்தியாவின் எம்.பி.க்களில் ஒருவராக இருந்த வாரணம் ஆயிரம் நடிகை, திவ்யா ஸ்பந்தனா 2011-ல் காங்கிரஸ் கட்சியில் சேர்ந்தார். கன்னட திரையுலகின் கோல்டன் கேர்ள் என்று அழைக்கப்படும் இவர், 2013 ஆம் ஆண்டில் மக்களவையில் இடைத்தேர்தலில் மண்டியா தொகுதியில் போட்டியிட்டு வென்றார். அதன் பின்னர் கட்சியின் தீவிர உறுப்பினராக இருந்து வருகிறார், இதனால் தனது திரைப்பட வாழ்க்கையை விட கட்சி வேலைகளுக்கு அதிக நேரம் ஒதுக்கினார்.

2010-ல் திமுக-வில் இணைந்த நடிகை குஷ்பு, ஸ்டாலின் குறித்த சர்ச்சைப் பேச்சால், பிரச்னைக்கு ஆளானார். அதன் பின் 2014-ல் காங்கிரஸில் இணைந்து, செய்தி தொடர்பாளராக பணியாற்றினார். தற்போது அந்தக் கட்சியிலிருந்தும் விலகி பாஜக-வில் இணைந்துள்ளார்.

பாரதிய ஜனதா கட்சி, 2004 பொது மக்களவைத் தேர்தலில் ஹைதராபாத்தில் நக்மாவை வேட்பாளராக நிறுத்த விரும்புவதாக பேச்சு எழுந்தது. ஆனால் அவர் 2004-ல் காங்கிரஸில் சேர முடிவு செய்து ஆந்திராவில் பிரச்சாரம் மேற்கொண்டார். காங்கிரஸ் கட்சியின் "மதச்சார்பின்மை மற்றும் ஏழை மற்றும் பலவீனமான மக்களின் நலனுக்கான அர்ப்பணிப்பு" தான் அதற்குக் காரணம் என்றும் தெரிவித்தார்.

அதிமுக முன்னாள் முதல்வர் ஜெயலலிதா இருந்தபோது, அதிமுக-வில் இணைந்து பணியாற்றிய நமீதா, அவர் மறைவுக்குப் பிறகு அந்தக் கட்சியிலிருந்து விலகியிருந்தார். இந்நிலையில் சில மாதங்களுக்கு முன்பு பாஜக-வில் தன்னை இணைத்துக் கொண்டார்.

ரோஜா 1999-ல் தெலுங்கு தேசம் கட்சியில் சேர்ந்தார். அந்தக் கட்சியின் மகளிர் பிரிவின் தலைவராக இருந்தார். 2009-ல் நடந்த ஆந்திர மாநில தேர்தல்களில் தோற்றார். ஆகஸ்ட் 2009-ல், தெலுங்கு தேசம் கட்சியை விட்டு வெளியேறிய ரோஜா, ஒய்.எஸ்.ஆர் காங்கிரஸ் கட்சியில் சேர்ந்தார். 2014 பொதுத் தேர்தலில், நகரி சட்டமன்றத் தொகுதியில் எம்.எல்.ஏ.வாக வெற்றி பெற்றார். பின்னர் 2019 தேர்தலில் நகரி சட்டமன்றத் தொகுதியில் மீண்டும் போட்டியிட்டு வென்றார்.