விரைவில் அரசியல் பயண முடிவு: மக்கள் மன்ற நிர்வாகிகளை சந்தித்த ரஜினி

தனது மக்கள் மன்ற நிர்வாகிகளை இன்று சென்னையில் சந்தித்தார் நடிகர் ரஜினிகாந்த்.

தனது அரசியல் பயணம் குறித்து இதில் ஆலோசிக்கப்பட்டது.

இந்த ஆலோசனைக் கூட்டத்துக்காக சுமார் 50 நிர்வாகிகளுக்கு அழைப்பு விடுக்கப்பட்டது.

கொரோனா பெருந்தொற்று பரவலை கருத்திற்கொண்டு இந்த கூட்டத்தில் ரஜினிகாந்த் காணொளி வாயிலாக பங்கேற்பார் என்று முன்பு கூறப்பட்டது.

இதற்கிடையே நேரடியாகவே அவர் நிர்வாகிகளை சந்தித்தது, அவரது ஆதரவாளர்களிடையே மகிழ்ச்சியை ஏற்படுத்தியுள்ளது.

ரஜினிகாந்தின் அரசியல் பிரவேசம் என்பது தமிழகத்தில் தொடர்ந்து ஒரு பேசுப் பொருளாகவே இருந்து வருகிறது.

ஆனால் அரசியல் கட்சி குறித்தும், முழு நேர அரசியல் பிரவேசம் குறித்தும் ரஜினி எந்த ஒரு அதிகாரப்பூர்வ அறிவிப்பையும் வெளியிடவில்லை.

2017 டிசம்பர் 31 ஆம் தேதி ரஜினிகாந்த் தான் அரசியல் கட்சி தொடங்கப் போவதாக அறிவித்தார்.

"எனது அரசியல் பிரவேசம் உறுதி. இது காலத்தின் தேவை" என்று அந்த அறிவிப்பின்போது அவர் பேசி இருந்தார்.

பின்னர் சென்னையிலுள்ள நட்சத்திர ஓட்டலில் பத்திரிக்கையாளர்களை சந்தித்த ரஜினிகாந்த், தனது அரசியல் நிலைப்பாடு குறித்து தெரிவித்தார்.

அதன் பிறகு கொரோனா பரவல் தொடங்கியது.

பின்னர் கொரோனா காலத்தில் தமது உடல்நிலை, வெளியே வந்து மக்களை சந்திக்கும் வகையில் இல்லை என மருத்துவர்கள் கூறியதாக ரஜினியே தெரிவிப்பது போல சமூக ஊடகங்களில் கடந்த அக்டோபர் மாதம் செய்திகள் பரவின.

அந்த கடிதத்தை மறுத்த ரஜினிகாந்த், ஆனால் அதில் கூறப்பட்டிருந்த செய்தி உண்மை என ட்விட்டரில் தெரிவித்தார்.

அதோடு, தகுந்த நேரத்தில் ரஜினி மக்கள் மன்ற நிர்வாகிகளோடு கலந்தாலோசித்து தனது அரசியல் நிலைப்பாட்டைப் பற்றி மக்களுக்குத் தெரிவிப்பதாகவும் விளக்கமளித்தார்.

இந்நிலையில் இன்று மக்கள் மன்ற நிர்வாகிகளை சந்தித்தார் ரஜினி.

இந்த ஆலோசனைக் கூட்டத்தில் நிர்வாகிகளிடம் கருத்துக் கேட்டார் ரஜினி. அப்போது அனைவரும் அவர் கட்சித் தொடங்க வேண்டும் என கூறியிருக்கிறார்கள். அவர்கள் பேசியதிலிருந்து சில குறிப்புகளையும் எடுத்துக் கொண்டார் ரஜினி.

சென்னை போயஸ் கார்டன் பகுதியிலுள்ள ரஜினிகாந்த் இல்லம் மற்றும் ஆலோசனை கூட்டம் நடைபெற்று வரும் ராகவேந்திரா மண்டபம் உள்ளிட்ட இடங்களில் ரஜினியை வரவேற்க அவரது ஆதரவாளர்கள் குவிந்திருந்தனர்.

ஆலோசனைக் கூட்டம் முடிந்து பத்திரிக்கையாளர்களிடம் பேசிய ரஜினி, ‘அவங்களோட கருத்தை என் கிட்ட சொன்னாங்க, என்னுடைய பார்வையை நான் பகிர்ந்துக் கிட்டேன். நீங்க என்ன முடிவெடுத்தாலும் உங்கக் கூட இருப்போம்ன்னு சொன்னாங்க’ என்றார்.

அதோடு, ’எவ்ளோ சீக்கிரம் முடியுமோ அவ்ளோ சீக்கிரம் என் முடிவை தெரிவிக்கிறேன்’ என்றார்.