முட்டையில் இந்த எண்ணெய் சேர்த்து யூஸ் பண்ணுங்க… தலைமுடி அடர்த்தியா வளரும்; டாக்டர் கார்த்திகேயன்

முட்டையின் மஞ்சள் கரு, வெள்ளை கருவை சாப்பிடுவது அல்லது பச்சையாக உடைத்து தலையில் பயன்படுத்துவது முடியின் ஆரோக்கியத்தை பெருமளவு பாதுகாக்கும். முடி ஆரோக்கியத்திற்கு வைட்டமின்கள், தாதுக்கள் தான் அதிகம் தேவையானவை. அதிலும் பயோட்டின், ஃபோலேட், வைட்டமின் டி போன்ற சத்துகள் முட்டையின் மஞ்சள் கருவில் அதிகம் இருக்கிறது. முடி வளர்ச்சிக்கு இது பெரிதும் உதவும். முட்டையில் செலீனியம், தத்துநாகம் போன்ற சத்துகளும் இருக்கின்றன.

டயட் இருப்பது, அதிக உடற்பயிற்சி செய்வது முடி இழப்புக்கு வழிவகுக்கும். உணவுப் பழக்கத்தை மாற்றவது முடி உதிர்வை ஏற்படுத்தாது. ஆனால் சாப்பிடும் உணவுகளின் அளவை குறைப்பது முடி உதிர்வுக்கு வழிவகுக்கிறது. இதனால் சாப்பிடும் அளவுகளை படிப்படியாக குறைக்கலாம். முடி வளர்ச்சிக்கு இனிப்பு அதிகம் உள்ள உணவுகளைத் தவிர்த்துவிடுங்கள்.

முட்டையின் மஞ்சள் கருவையும், ஆலிவ் எண்ணெய்யும் கலந்து அதை தலையில் தடவலாம். ஒரு மணி நேரம் அப்படியே விட்டு அதன் பிறகு ஷாம்பு போட்டு குளிக்கவும்.

இதே போல முட்டையின் வெள்ளை கருவுடன் தேங்காய் எண்ணெய் சேர்த்து உச்சந்தலையில் 20 நிமிடங்களுக்கு அப்படியே விடவும். முடி வளர்ச்சிக்கு புரத சத்து தேவை. ஒரு முட்டையில் ஆறு கிராம் புரதம் இருக்கிறது.

முட்டை ஒவ்வாமை இருக்கிறவர்கள் இதை தலைக்கும் பயன்படுத்த வேண்டாம்.

முடி வளர்ச்சிக்கு தினமும் கறிவேப்பிலை அல்லது நெல்லிக்காய் அல்லது பீட்ரூட் ஜூஸ் குடிக்கவும். இந்த மூன்று ஜூஸ்களையும் ஒரே நாளில் கூட குடிக்கலாம். இவை 360 டிகிரி ஜூஸ் என்று அழைக்கப்படுகின்றன. அதே போல பாதாம், நட்ஸ், இரும்புச் சத்து அதிகம் கொண்ட கீரைகள், சியா விதைகள் சாப்பிடுவது முடி வளர்ச்சிக்கு நல்லது.