பொள்ளாச்சியில் விநாயகர் சிலைகள் தயாரிப்பு பணிகள் மும்முரம்: விற்பனை மந்தம்; வியாபாரிகள் வேதனை

செப்டம்பர் 7 ஆம் தேதி விநாயகர் சதுர்த்தி விழா கொண்டாடப்படுகிறது. இந்து அமைப்பினர் மற்றும் பொதுமக்கள் விநாயகர் சிலையை வீட்டில் வைத்தும் பொது இடங்களில் வைத்தும் வழிபாடு செய்து நீர் நிலைகளில் கரைப்பது வழக்கம்.

பொள்ளாச்சி அருகே உள்ள ஊஞ்சாவேலம்பட்டியில் விநாயகர் சிலை தயாரிக்கும் பணி மும்முரமாக நடைபெற்று வருகிறது. பல்வேறு வடிவங்களில் பல வண்ணங்களில் மூன்று முதல் 10 அடி வரை விநாயகர் சிலை கம்பீரமாக காட்சியளிக்கிறது. சுற்றுச்சூழலை பாதிக்காத கிழங்கு மாவு மற்றும் காகித கூழ் மற்றும் எளிதில் தண்ணீரில் கரையக்கூடிய வண்ணங்களை தீட்டி விநாயகர் சிலை தயாரிக்கப்படுவதாக உற்பத்தியாளர்கள் தெரிவித்தனர்.

ஆண்டுதோறும் தயாரிக்கப்படும் விநாயகர் சிலை ஒரு மாதத்திற்கு முன்பே விறுவிறுப்பாக விற்பனையாகும், ஆனால் இந்த ஆண்டு விற்பனை மந்தமாகவே காணப்படுவதாக தயாரிப்பாளர்கள் வேதனையுடன் தெரிவித்தனர்.

தமிழக அரசு, காவல்துறை, மாசு கட்டுப்பாட்டு துறையின் கடும் கட்டுப்பாடுகளால் பொதுமக்கள் விநாயகர் சிலை வாங்க இந்த ஆண்டு தயக்கம் காட்டுவதாக தெரிவிக்கும் சிலை தயாரிப்பாளர்கள், புக்கிங் செய்து சென்ற விநாயகர் சிலையையும் கேன்சல் செய்து வருவதாக வேதனையுடன் தெரிவித்தனர்.

எனவே கட்டுப்பாடுகளை குறைத்தால் மட்டுமே இந்தாண்டு விநாயகர் சிலையை வாங்க மக்கள் ஆர்வம் காட்டுவார்கள் என தயாரிப்பாளர்கள் தெரிவித்தனர்.